【已完結】【廣東話】《魔都姬神：退魔巫女千夜》（走甜健全作死日更小說企劃）: 其之二

其之二



「妳打來真係剛剛好…」電話裡頭係黑服一郎，負責連絡善後同安排委託等後勤工作的退魔協會特工。

「係咪通知我評核可以升為Ｃ級呀？」千夜滿心歡喜，只可惜換來冷水。

「當然唔係，隻嘢弱到俾妳一刀分屍，無降為D以下垃圾評級算人至義盡。」





「唉…咁人咃窮呀嘛計多少少幫補下都好呀！」

「廢話就少講喇，認真同妳講返…」黑服一郎一貫語調平淡無咩明顯感情起伏咁話「…緊急狀況，現場需要退魔師增援。」

千夜見係咁亦都認真返咁話:「係！咁地點係…」

———同一時間，港灣再發展區，廢棄大樓———

由於泡沫經濟破綻，浪費大量資源嘅人工島綜合新區變成無人鬼城，好自然亦成為罪惡溫床。





「Echo team enemy insight...Engage!」
「Delta team under fire! repert! Delta under heavy fire! 」
「Alapha1 is DOWN! alpha 2 take command!」
「Roger!」
「HQ！LZ1 is lost!plan B,LZ3 recommend!」

一身黑色強化裝甲全副武裝的AD(Anti Demon)警察，對人外/妖魔特別任務連，可以話人之中龍精英中嘅精英。
但係響而家卻陷入進退兩難，甚至滅團嘅危機之中。

「投入所有預備隊同外圈警戒人員作為增援！」





「指揮官，三分鐘前所有可用單位已經全部調動晒喇！」副官抑制住自己感情盡量冷靜咁講。

「撤退！全員撤離現場！」

指揮官握實拳頭，感受到無比屈辱，畢竟響十幾分鐘前行動剛開始果陣，包括佢在內所有人都信心十足。

…無錯，當初無人預計到應該響壓倒性優勢下輕鬆完成嘅行動，竟然會變成一場惡夢。

「由一開始得到嘅情報就係錯嘅…唔係…根本係個陷阱，成個局一早設好晒等我哋踩入去！」

「而家講咩都無用，最重要係想辦法救返班手足出嚟！救得一個得一個！」

「你講咩呀，一個都不能少！幾多兄弟入去，就要帶返幾多出嚟！由成立至今嘅信條，AD TEAM嘅基石！」





「認清現實啦，大家都知盡晒力…」

「Charlie6 forced landing!」

「放低面子搵幫手啦，再咁落去…」

「幫？而家十萬火急你叫我可以搵邊個嚟幫！？」指揮官拉住副官怒斥：「你係咪想話，廢到要你教我點做！？」

「你知我唔係咁嘅意思，但係…」

「但咩係？你響警校讀屎片畢業？你話我知，憑咩要將警察份內事交俾班唔三唔四嘅神棍？！」

呢個時候，一直響一邊默默望住呢一切，夜媽媽帶黑超黑西裝嘅黑服一郎開口。

「增援仲有三分鐘就到，麻煩指揮官授權情報分享，以便我方跟進。」





「你邊位？我從來無要求過增援！」

「聯合國授權，日本內閣直屬神靈廳駐外特派員，退魔協會特工黑服三佐…」



［次回待續］