命中注定我與妳?: 36. 心跳的一刻

嘉怡佢地嘅表演真係無懈可擊，所以佢地引黎我地學校嘅挑戰
 
係後台，成班中樂團係到傾演咩歌好
 
「佢地連平井堅嘅『瞳をとじて』都搬出黎，我地都出絕招啦」
 
「東京熱?」
 
「唔係呀!!!雖然我地經常夾呢一首」仲有成日一齊睇添
 




「我地出『風雲』?」
 
「好!!!!」
 
我地學校中樂團再一次上台，演出「風雲雄霸天下」
 
「風雲」呢一首歌係有好多中樂背景音樂
 
我地同學演奏呢首歌果時，氣氛係一流，差在未拎絕世好劍同雪飲狂刀出黎互劈
 




兩間學校同學都施展混身解數去表演，令到現場掌聲不斷
 
我地兩間學校嘅同學係休息室打成一片
 
教父亦都如佢所願同到嘉怡傾計
 
我係休息室中不停咁Snapshot，有好多同學嘅衰樣都俾我影低
 
不過有人做出一個好好嘅提議
 




「喂喂，不如我地臨時夾一首歌丫」
 
「有咩歌好夾先?」
 
大家係到諗果時，我忽然諗到一首歌
 
我地係冇預知嘅情況下，演奏出多年前被稱為神劇嘅「求婚大作戰」望題曲
 
而套劇嘛……其實幾似我同慧思嘅…
 
當「求婚大作戰」一奏起果時，現場氣氛真係非常震撼
 
原來好多人都睇過健三同吉田禮嘅故事
 
聯校演奏會完畢，大家都收拾好細軟離開




 
嘉怡係我等媽咪同姑姐果時走過黎
 
「喂!辛苦哂你啦今日」
 
「下?係咪妳辛苦d呀?妳地演奏左咁多首歌」
 
「丫，你唔辛苦咩?你睇你丫，咁熱仲拎住咁多野幫我地影相」
 
嘉怡果一刻係非常溫柔，佢完全係我鍾意果種類型嘅女仔
 
我望住嘉怡望到呆左，佢面紅紅咁問返我
 
「做…做咩望住我呀?」
 




果一刻我終於回過神
 
「冇…冇呀….我想問妳有冇USB?」
 
「有呀，做咩事?」
 
「我都要俾返D相妳架嘛」
 
「咁….可以等official嘅相丫嘛」
 
「乜妳認為我影果d，official會俾妳地睇咩?」我個樣笑得好奸
 
「你…你偷拍我地!?」
 
「係Snapshot，唔好講到偷拍咁cheap。Snapshot….不算偷，攝影師的事，能偷拍的麼?」




 
「你呀!!!影左d咩呀!?」
 
「妳俾USB我咪知囉」
 
嘉怡係佢書包到拎左隻USB出黎俾我，我睇睇，應該夠位嘅
 
「你點俾返隻USB我呀?」
 
「咪叫媽咪俾妳囉」
 
「叫Miss Lam俾我呀….」佢個樣有千萬個唔願意咁
 
「妳想我親手俾返妳?」
 




「咁你係男仔…俾少少風度啦」佢擰埋一面講
 
「風度?我地成班都冇架喎」
 
「乜…乜你咁架!!!」
 
差唔多玩夠佢啦
 
「好啦，我搵日俾返妳啦，約妳出埋街又點話」
 
「你話架」
 
「係呀」
 
嘉怡伸出手尾指「勾手指啦」
 
「咁大個人仲要勾?」
 
「細個老師教架，勾過手指尾就要做到」
 
於是，我伸出左手指尾同嘉怡佢勾住左