命中注定我與妳?: 25. 小小的漣漪

幫嘉怡佢地班整好大部份野，我就收到媽咪電話，去教員室幫佢拎野
 
嘉怡佢都跟埋我一齊去教員室
 
經過d獎杯櫃，我見到近年多左好多音樂獎杯，所以吸引左我停低腳係到睇
 
「二胡….柳琴…古箏….琵琶…月琴….」我係到喃喃自語自語，而嘉怡就面紅紅企係到
 
跟住我再睇下d得獎者個名
 




「孫嘉怡」、「孫嘉怡」、「孫嘉怡」同埋「孫嘉怡」
 
「全部都係妳拎架?」
 
「係…係呀….只不過係中樂少人參加者…」
 
原來就係佢…3年前婆婆就係用慧思同大坑真光換嘉怡過黎
 
「我讀書唔太叻架咋….所以咪幫學校贏多d獎囉」
 




我指住成績獎果塊Board係到串佢
 
「咁妳都話差?」
 
嘉怡面紅姐咁答我「咁…我同家琪姐比…就當然差啦」
 
「妳做咩搵家琪姐同自己比呢?」
 
我地行去教員室，幫媽咪拎左d野飲返4D班
 




大家坐係到休息飲野
 
「係喎，果時呢…你阿哥點追家琪姐架?」嘉怡有D八掛咁問
 
「果陣呀?阿哥同當時果個女朋友冇左，家琪姐姐見阿哥咁慘，咪陪下佢囉。佢地又係開放日之後去迪士尼玩，冇幾耐就開始拍拖啦」
 
「但係佢地點俾Miss Lam發現架?」
 
「果時美姐就快同偉叔結婚，咁阿哥同家琪姐去買裙，就係SOGO俾媽咪同姑姐斷正。然後媽咪通知婆婆，本來美姐唔俾佢地拍拖嘅，點知阿哥係呢到公開表示自己對家琪姐一心一意，而且唔會影響自己學業，美姐先批准」
 
「咁佢地都好浪漫下喎」
 
「浪漫個鬼」
 
「咁你阿哥會唔會鍾意家琪姐著校服先追佢架?」




 
「有可能架，佢之前個女朋友讀培道」
 
「白色高叉長衫」
 
「所以我話阿哥係死變態佬」我笑住講
 
「咁…你呢?」
 
「我?」
 
嘉怡點一點頭「嗯」
 
我腦中又出現左慧思著長衫校服個樣
 




「我同阿哥都差唔多啦。而且我鍾意女仔扎孖辮」
 
「孖辮呀?」
 
「雙麻花辮…即係….妳地學校以前規定扎果種辮」
 
「原來你有特殊癖好喎」
 
「咩…咩癖好呀?咁…我揀女仔都有條件架嘛」
 
「玩下你咋，咁你屋企以前咪好多我地D學生出現囉?」
 
「幾啦，家姐會帶同學返屋企，我細個又成日跟媽咪返黎….」我係嘉怡面前吞吞吐吐
 
「你睇你丫，真係好怕羞呀」嘉怡搣住我塊面講




 
俾慧思以外嘅女仔咁搣法，都係第一次
 
所以，我嘅內心泛起左細細嘅漣漪