命中注定我與妳?: 4. 走失路嘅我地

我地三個送佢地去搭地鐵時，姐姐問家姐叫咩名
 
「我叫程詩敏，Jasmine。我知妳叫余家琪」
 
「係…」
 
「有緣嘅我地出年見啦」
 
係佢地入閘後，同時媽媽同姑姐都帶埋慧思出黎閘外
 




「好野呀哥哥!!!」
 
「咩事咁好?」
 
「我出年會搬去你樓下啦!!!」
 
「真係?」我有d開心感覺
 
「係呀浩翹，我地買左你屋企果座32樓，不過唔係你果款單位啦」
 




「咁係我屋企望唔望到妳地架」
 
「有機會架」
 
自此，我同慧思就只有五層樓距離
 
終於到阿哥中學放榜啦!!!佢派左去英皇書院，好近我地屋企
 
係中學註冊果一日，媽媽係飯檯上同爸爸打小報告
 




「小敏!妳今日係學校做左d咩黎!自己同爸爸講」
 
「呀……」家姐天不怕地不怕，佢只怕兩個人
 
爸爸，同埋校長婆婆
 
仲有曱甴
 
「小敏?妳做左D咩呀?」
 
「爸爸呀…我…今日…」
 
「好嚴重?」
 
「呢層…」




 
家姐好少可低頭唔敢講野
 
「今日佢一個波殺去個新生塊面到」
 
爸爸聽到之後都呆哂，俾唔到反應
 
「小敏妳做咩呀?」
 
「咁…果兩母女乞人憎嘛…咁樣對家琪…我地成班都吞唔落呢啖氣」
 
「唔?邊位呀?」
 
「係舊年，小敏係公園扶個病人去ba b診所睇症，佢地係一對好窮嘅母女。個女叫余家琪，佢用全級第一嘅實力考入英華，今日註冊果時俾佢d小學同學冷嘲熱諷。小敏見到就一個波殺埋去，仲俾契媽鬧左一餐」
 




「咁…個女有咩問題?」爸爸反問媽咪
 
「佢郁手喎，咁都冇問題?」
 
「妳都識話個學生俾人欺凌啦，阿女教訓其他人，有咩問題?」
 
「但係都唔好咁丫嘛」
 
「小敏妳係有正義感，不過下次呢，就等姑姐同媽咪處理啦」
 
「但係爸爸呀….果下真係好難忍架嘛」
 
家姐係一個正義嘅化身，所以我係咩情況下，都會全力支持家姐
 
「咁妳有冇俾婆婆罰呀?」




 
「婆婆叫媽咪罰我抄囉….10次校規」
 
「咁都夠啦」爸爸望住媽咪
 
「不過唔係佢自己抄呢!又迫浩揚幫佢抄」
 
冇錯!家姐就係咁惡
 
阿哥升左中學後，佢陪我嘅時間少左好多，而家姐就升F.3，佢又要顧排球隊，又要溫書，所以佢少左好多時間同我玩
 
但係佢依然會接我放學，或者夜晚陪我溫書
 
既然家姐唔得閒啦，唯有痴實慧思啦
 




通常我地兩個放學後，會去公公間診所到，由姑媽送我地返屋企再等媽咪或者姑姐返黎
 
每一日都係我地兩個人一齊溫書做功課。
 
係我地7歲果年，媽媽同姑姐帶我地去虎豹樂園到玩
 
但係我地覺得好無聊，所以就一齊周圍咁行
 
途中，慧思佢見到一隻貓
 
「哥哥，係貓貓呀!!!!」慧思係到追住隻貓跑
 
而我就跟住佢走，走走下，我同佢都唔知去左邊，所以佢開始驚同埋喊
 
「哥哥呀….點算呀!!!唔見左媽咪呀!!!」早就叫妳唔好自己周圍走架啦
 
慧思真係企係到喊，我係佢身邊諗緊有咩計果時，我抬頭望到一座建築物上嘅幾個大字
 
「香港真光中學」
 
咦?咁咪即係慧思學校?
 
佢仍然係到喊緊之下，我拖住佢行
 
「去…去邊呀?」
 
「搵人幫我地呀」
 
慧思緊緊捉實我隻手，同我一齊行去中學部
 
「唔該」我對住門口嘅工友講
 
「小朋友，你地咩事呀?」
 
「我地同屋企人走失左呀，叔叔可唔可以幫我地搵返佢地?」
 
「唔…你地叫咩名?」
 
「我叫程浩翹，讀聖類斯小學。佢係李慧思，佢係呢到讀小學」
 
「妳係我地嘅小學部學生?」
 
慧思點一點頭
 
「我地電話俾小學部，叫佢地幫妳啦」
 
「唔該哂」
 
好快，真光小學嘅當值老師趕到中學部，而姑姐同媽咪都好快黎到接我地走
 
「妳呀!做咩周圍走呀!?」姑姐似乎好嬲
 
「對唔住媽咪…」
 
「好彩浩翹叻仔咋!」
 
「知道…」
 
係姑姐行開左果時慧思仲係到喊
 
「妳呀！冇事啦」
 
「又俾媽咪鬧啦…」
 
「冇事嘅，錫返妳啦」
 
「唔?」
 
我雙手捉實慧思，再向佢個咀錫過去
 
唔知幾多秒後，我地先面紅紅咁分開
 
但係，我地都望住對方笑得好開心