［一齊推理］《住進吊死你的房間》: 寫後感

多謝你睇晒成個故事。

《住進吊死你的房間》算係我係連登寫嘅第三個故事（唔計有篇棄故），覺得係連登寫故最好嘅地方，就係可以直接收到你哋嘅評語、正評、負評。

我只要一得閒就會上去睇有冇新reply，keep住check正評數，每次有人覆，或者多一個正評，都係推動我繼續寫落去嘅動力，所以如果唔係連登連載，可能我唔會寫完呢個故事。

《住進吊死你的房間》係我第一次挑戰寫推理故，通常我睇完一齣戲，或者打完某隻遊戲，就會想自己都寫到一個咁嘅故事出嚟。最初有諗住寫推理故嘅諗法，應該係睇完Knives Out ，到之後玩Disco Elysium，有股衝動想寫一篇「邊個係兇手」嘅故事。特別係Disco Elysium，比佢個種抑鬱，自言自語嘅風格吸引，誠意推薦比鍾意玩對話，偵探遊戲嘅人。

一開始嘅諗法係寫一個偵探同喋喋不休嘅屍體發生嘅故事，慢慢因為自己忙緊搬屋，又加埋自己搬屋時候嘅生活體驗落去。寫緊嘅其間，不停搵偵探戲，偵探小說嚟睇，睇到神劇Mind Hunter 覺得純粹靠對話、心理描寫，就搵到兇手係件好型嘅事，慢慢就變成宜家咁。





之前都有講過，我覺得推理故事，首要嘅嘢係解迷合理，自己睇得越多推理故事，我覺得如果睇完嘅反應係「車～咁架咋」，係比「痴線，都唔合理」好少少，所以我嘅目標都係咁，希望自己算係做到。

次要重要係遵守規則，Google完，原來推理故事有好多規則，推理小說十誡、二十法則，例如兇手唔可以係偵探本人、唔可以有超自然力量、主角獲得嘅線索要同主角一樣咁。

我寫故嘅時候都有類似咁嘅傾向，會定好多規則比自己跟，好似呢篇故事大部分啲人都係冇名、死者先會出名、除咗對話「你」一定係指女主角等等，其實仲有好多，覺有啲咁嘅規則，先會幫到我寫落去。

上兩篇故都係寫到三萬至六萬字到，原本想試下呢篇可以挑戰自己寫長啲，但最後都係五萬字到就完咗。

將成個故事叫做「第一片段」，因為之後想寫「第二片段」。





我宜家已經開始諗新一篇嘅推理故，算係呢篇嘅續集，應該會繼續係呢個post 到寫，等我一陣，過一兩個月返嚟呢個post可能就會有。

最後，回顧返《住進吊死你的房間》，雖然有啲沙石，未係一篇十分滿意嘅作品，但我覺得係一篇「算係咁嘅」故事。如果你睇完，有興趣睇下我寫嘅其他故，以下係其他故嘅link 同我ig


我的存在是同班同學的一個幻想
https://lih.kg/2364136
- 分享自 LIHKG 討論區

施比受




https://lih.kg/2628420
- 分享自 LIHKG 討論區

IG:
https://www.instagram.com/any__dear

BTW其實故事嘅第二片段已經係連登寫緊，有興趣可以去睇下，比個正評，留下言。

［一齊推理］《住進吊死你的房間》
https://lih.kg/3109023
- 分享自 LIHKG 討論區