風之鍊金術士譚:與異世界女高中生之邂逅: 第41章: 出發應邀的前夜
第41章: 出發應邀的前夜
「係喎，不如一陣間黃昏收鋪後，過一過去蘇菲亞姐姐嗰到坐吓囉？順便都想通知佢聽日會去布拉諾嘅事......」在使者離開後不久，漢什忽然突發其想建議道。
「都好嘅，我都想同佢哋聚吓舊，尤其係呢幾日發生咁多事，甚至遇到九死一生嘅經歷。」巧晴亦附和著漢什。
「我可唔可以一齊去啊？」羅莎表示有意想一同前往。
「當然冇問題啦，而且蘇菲亞都好耐冇見你啦。」漢什表示這當然可以。
「因為我近來都比較忙，唔係看鋪就係出去搵礦石。」羅莎摸頭感到有些不周到地說。
「唔緊要，大家都識咗咁耐，蘇菲亞姐姐同伊娃佢哋都會瞭解嘅。」漢什認為羅莎不需為此介懷。
「我冇嘢吖！」羅莎擺出調皮的笑容回應。
接著到了下午時，漢什和巧晴亦繼續經營工房，期間羅莎也會選擇坐在店面和巧晴閒聊解悶，直至近黃昏時才關店。
在關店後，漢什、巧晴及羅莎三人就一同從工房起行，前往蘇菲亞家的飾品店。但在走出工房後不久，羅莎突然醒起有一件重要的事。
「唔好意思啊，去蘇菲亞姐姐嗰度之前，我想先返一返去武具店度一轉啊。」羅莎把剛剛醒起的事向同行的其餘兩人說出。
「武具店嗰度有急事？」漢什並未有覺得羅莎麻煩，反而是關心著她是否家中有急事。
「唔太算嘅，只不過係想同叔叔佢講我聽日會同你哋去布拉諾嘅事啫。」羅莎有點慌忙地澄清道。
「原來係咁，咁當然可以啦！」漢什爽口地答應。
故此，因羅莎的懇求，在漢什他們前往找蘇菲亞前，途中也特意繞道先前往羅莎家的武具店，讓羅莎通知艾米爾先生自己會跟漢什他們前往布拉諾的事，而艾米爾得個後亦樂意地讓她去。
然後，在離開了武具店後，三人就繼續前往蘇菲亞這裡，途中卻湊巧碰到正在外出買菜的伊娃。
「咦？係漢什、巧晴同羅莎喎，乜咁啱嘅，做乜你哋三個會無端端一齊嘅？」
伊娃感到驚喜不已地和他們三人打招呼，並好奇問他們為何會一同行動。
「你識羅莎嘅乜伊娃？」巧晴好奇地問伊娃。
「因為其實我同伊娃都係好好嘅朋友，只算近排我比較忙屋企鋪頭嘅事先少咗見面。」羅莎向巧晴說崗自己和伊娃亦是相熟的朋友。
「仲有都冇同巧明你講過㖭，其實我、伊娃同羅莎自細已經識，細個一齊玩嘅玩伴嚟。」
此時漢什亦向巧晴補充說自已和伊娃及羅莎三人，是從小就認識的青梅竹馬朋友。
「朋友……唔知Mandy同諾誼佢哋依家點呢……好懷念以前一齊放學，約出嚟行街Shopping嘅時光喲......」一聽漢什提及朋友這詞時，巧晴亦一時有些感觸而頓時想念自己在香港的朋友。
「巧晴你做乜事啊？唔舒服？」漢什見巧晴像發呆般時，亦立即關心她是否有甚麼事。
「唔唔......我冇乜嘢啊。」巧晴先以令別人感到放心的語氣回道。
「嗯。」
同時，漢什亦向伊娃說出自己現時正在和巧晴及羅莎，一同前往她家見蘇菲亞聚舊，兼想順便一同吃晚飯的事。
「原來係咁吖……當然可以同好歡迎㖭吖，相當家姐佢都好高興你哋嚟一齊食飯嘅。」伊娃感到興高采烈地說歡迎漢什他們。
「伊娃你都仲係咁爽朗嗰喎。」羅莎讚嘆著伊娃剛才的語氣。
「駛乜講，我依家就去買餸嘅……我會順伊買埋你哋嗰份㗎啦。」伊娃眨眼說道。
「咁真係多謝哂你啊！」巧晴合上雙手向伊娃表示感謝。
「所有你哋先去我屋企間飾品店先啦，我諗蘇菲亞而家應該喺度看緊鋪㗎。」伊娃亦叫漢什他們先到自己家等候。
「好喔，咁就麻煩哂你啦。」漢什回應道。
「唔洗客氣喎。」
漢什他們三人就先和要去買菜的伊娃暫別，並在行多一會後便到達了蘇菲亞家的飾品店，同時亦如伊娃所說，蘇菲亞她的確正在代出門去買菜的伊娃看店。
「咦？係漢什喎，仲有巧晴同羅莎你哋都嚟咗......你哋好啊！」蘇菲亞一見到漢什他們進入店內時，也感到有點驚喜。
「你好吖蘇菲亞姐姐，我哋今日係想同漢什羅莎佢哋，一齊嚟呢度坐吓食餐飯，順便可以互相聯誼吓咁。」巧晴搶先向蘇菲亞說出他們三人現在來這裡的原因。
「係吖，你好啊蘇菲亞姐姐，我哋都有啲時間冇見啦。」羅莎也依舊爽朗率直地向蘇菲亞問好。
「原來係咁，不過我依家代伊娃佢看緊鋪，你哋去後面坐一坐陣先啦，招呼唔周到，唔好意思啊吓。」蘇菲亞著漢什他們先到調合房處等候，同時因自覺得招呼不周而一絲抱歉著。
「唔緊要，咁蘇菲亞姐姐都要看鋪㗎嗎。」漢什表示非常諒解。
「係喎，你哋同時有冇撞到伊娃啊？」蘇菲亞在漢什他們準備去後面調合房時，追問著他們有沒有碰見到伊娃。
「有啊，我哋亦同伊娃佢講咗會嚟呢度食飯嘅事，所以佢都話會得登買埋我哋份量嘅餸嘅。」巧晴主動急不及待地暢快說出剛才巧遇伊娃的事。
「嘿嘿，咁你哋都算幾有緣嗰喎。」蘇菲亞對此感覺到高興。
之後，漢什、巧晴及羅莎先一同到店面後的調合房，並在這裡的梳化坐下，但由於是三個人一同坐的關係，他們亦坐得稍為迫一點，但巧晴及羅莎亦不太介意。
至於蘇菲亞的方面，她就選擇繼續看店，以等候伊娃買完菜後回來。
在過了一陣子後，伊娃也在買完菜後，左右各拿住一個裝住食材的麻袋回到飾品店……
「啊妹你返嚟啦，漢什同巧晴羅莎佢哋嚟咗啊，而家就坐喺調合房度。」蘇菲亞善意向剛回來的伊娃，說出漢什他們來了及在調合房中等候的事。
「嗯，我知道喔，頭先喺街度先撞到佢哋。」伊娃向蘇菲亞回應道。
於是乎，伊娃亦急不及待地進入調合房以見漢什及巧晴他們......
「咦，伊娃你返嚟啦！」巧晴率先呼叫著伊娃。
「嗯，買完餸返嚟啦，買埋你哋份量㗎啦。」伊娃向漢什他們展示已裝滿大半食材的麻袋，來證明自己的說法。
「咁真係麻煩哂你啦。」漢什站起身向伊娃感謝道。
「唔洗客氣，今晚就等我同家姐佢煮餐豐盛嘅大餐啦。」伊娃睜一睜眼，並奔放大方地說著。
「唔該啊吓。」羅莎也多謝伊娃的好意。
接著，伊娃也先把今日買好了的食材放置在廚房備用，然後就通知蘇菲亞一同準備做飯，於是蘇菲亞當日把店舖關門，並和伊娃一同前往廚房，期間雖然巧晴、羅莎甚至漢什也表示想幫恨，但亦被蘇菲亞她表示心領他們的好意並婉拒之。
而在伊娃和蘇菲亞把晚餐造好後，亦立即通知漢什他們三人過來飯廳這裡享用，他們三人一進入飯廳時，已放在餐桌上豐盛的菜色亦即時映入眼簾。
「今餐咁豐富嘅？」巧晴忍不住垂涎三尺問道。
「因為咁難得除咗漢什同巧晴之外，連羅莎都嚟埋，所以咪專登煮餐豐富嘅晚飯，一齊食開心啲啊嗎。」伊娃帶住真摰的笑容解釋道。
「咁真係唔該曬喎！哈哈......」羅莎因而覺得驚喜著，並感謝伊娃及蘇菲亞會這樣特意關照自己。
「唔好講住啦，快啲坐低開始食啦，趁而家啲飯餸仲熱辣辣嘅。」蘇菲亞著其他人先開始享用桌上的菜色，趁著它們還是熱騰騰。
「係喎，咁我哋唔客氣啦！」
之後，漢什他們三人，以及蘇菲亞及伊娃兩姊妹，亦坐埋餐桌一同享用這頓豐富的晚餐，期間也理所當然地開始交談著，主要是大家的近況，包括羅莎在說自己在武具店遇到的一些趣事。而漢什則約莫說了巧晴學鍊金術的進度，他自己尋找令巧晴回去方法的進度，和巧晴開始學習劍術的事......
「吓，原來巧晴你都開始學劍術啦，你要加油啊！」蘇菲亞知道了巧晴開始學習劍術的事後，對其表示支持並鼓勵她要加把勁。
「冇錯吖，我同家姐點都會支持妳㗎！」伊娃緊握著拳頭鼓勵巧晴。
「好多謝你哋啊。」巧晴甜笑道謝。
然後，在談下談下的中途，漢什和巧晴也向蘇菲亞及伊娃分享了他們自己之前在波塞克山，尋找波莫利亞殞石時，所遇到的驚險及接近於九死一生的經歷。
「嘩！咁你哋呢次都算好好彩啦。」伊娃對此居然會露出和羅莎之前差不多的反應。
「嗯，的確......,我喺森林毒素發作瞓底嗰陣，都以為自己真係會死，好彩最後有個叫西爾芙嘅風之精靈救番我哋咋。」巧晴仍是心有餘悸地回想起來。
「巧晴，妳仲係好驚啊？」伊娃有點擔憂地問巧晴。
「依家我已經唔算太驚啦，而且我依家都仲係生勾勾呢。」巧晴此時變得豁然地說出自己現時的心情。
「呵......咁就好啦。」同桌的漢什頓時也算是放下心頭大石。
「不過講番起嚟，漢什你呢次的確有啲算係保護巧晴不力啊，令到佢要受呢啲苦。」蘇菲亞同時亦不忘以說教的語氣，直接指出漢什對巧晴有些保護不周。
「唉……好對唔住啊……」漢什此刻亦只能搖頭嘆息。
「唔洗道歉喎，我都冇怪你。」巧晴表示並未有因此而怪責漢什。
而再過了一會後，漢什見晚餐也不差多吃完後，在和巧晴及羅莎心有靈犀般點頭同意後，決定就現在向蘇菲亞及伊娃說出自己將會在明日和巧晴及羅莎，一同應公爵他的邀請，前往布拉諾城堡見面的事。
「蘇菲亞......其實今日嚟，係有件好重要嘅事想同你講㗎......」漢什先買個關子般向蘇菲亞表示有事要給她說。
「係乜事啊？好大件事㗎？」蘇菲亞見漢什心不在焉的語氣時，就估是否為不太好的事情。
「呃，其實係因為巧晴……」
接著，漢什就向蘇菲亞及伊娃，如實道出因巧晴受到了波莫利亞公國公爵意外的見面邀請，而她需要前往公國的首都布拉諾赴約，而自己會和羅莎陪同巧晴同行前往的事宜。
「原來係咁……咁祝你哋一順風喎！」蘇菲亞聽完後表示祝福漢什他們，並未有一絲的擔心。
這可能是為，蘇菲亞亦知道漢什以前都是獨自在布拉諾諗鍊金術兼魔法，所以他都算熟悉這個地方，有他帶著的話巧晴應該不會有太大問題。
「不過你今次要好好保護巧晴佢，唔好再發生上次嘅事啦。」但蘇菲亞也不忘向漢什叮囑道。
「但如果羅莎佢都喺度嘅話，應該唔會有太大問題嘅。」此時同桌的伊娃也補充說道。
「點解咁講嘅伊娃？」巧晴不解地向伊娃問道。
「因為我對羅莎佢嘅能力好有信心，話哂喺我記憶中，佢十二三歲嗰陣，已經夠膽帶住枝艾米爾叔叔俾佢嘅手槍加刀仔，一個人出去野外啲山洞度採集礦石同啲鍛造用嘅材料㗎啦，所以佢戰鬥實力同膽量應該都唔差嘅。」伊娃向巧晴表示對羅莎的能力充滿信心。
「咁都係我本身份人比較大膽啫。」羅莎對伊娃這突如其來的讚許表示謙虛著。
「我真係咁差咩......」漢什一時三刻有些無地自容著。
「都幾㗎，不過有埋羅莎喺度同行就放心番啦。」伊娃繼續對漢什挖苦道。
「嘿嘿......」巧晴此刻亦為此苦笑著。
晚餐過後，蘇菲亞及伊娃亦照常收拾餐桌，這次巧晴亦熱心自動請纓去幫忙，而蘇菲亞今次則未有婉拒。
與此同時，在和伊娃及蘇菲亞兩姊妹一同收拾餐桌的時候，巧晴回想起在共餐時和她們兩姊妹的言談中，慨嘆及敬佩著生性樂觀及對人和藹可親的處事態度，尤其是在從漢什口中得知她們曾經經歷了戰亂，以至雙親身亡的事後。然而她們並沒有就此一沉不起，終日自怨自艾和封閉自己，這亦令到巧晴感觸很深。
然後，在餐桌收拾好後，漢什及巧晴他們見時候不早，亦決定先離開回家，準備明早出發去布拉諾的東西，他們三人在和蘇菲亞及伊娃作簡單的道別後，就離開了蘇菲亞的飾品店各自回家。
在回到工房後，漢什和巧晴亦要開始預先收拾相應的行裝，因為漢什估計這應該需要去好幾日，即是幾乎肯定會在布拉諾這裡過夜，最後亦因此感到相當緊張，當天整晚也感到有些的忐忑不安......