風之鍊金術士譚:與異世界女高中生之邂逅: 第28章: 波莫利亞殞石？賢者之石的材料？
第28章: 波莫利亞殞石？賢者之石的材料？
「嗯……」巧晴在一大清早在床上醒來。
而本是同床共寢的漢什，此時依舊也起了床離落地下準備早餐。
「粗略計一計，我嚟到呢個世界已經成個月啦。」巧晴坐在床上憂愁地想起來。
原來不經不覺間，巧晴在這個世界已經一個月，雖然她也開始漸漸被迫適應了這個世界的生活，但卻未有因而樂不思蜀，反而是仍然會無時無刻思念著在香港的家人和朋友。
還有一點的是，巧晴從來到這個世界的第二晚開始，基本上就每晚都是和漢什在臥室中的雙人床同床共寢，但他們兩人也會很有默契地從沒作出任何踩界或色情的事，一直維持室友兼朋友的關係。
「仲有即係我已經冇返學成個月......都唔知之後追唔追得番上學校嘅進度㖭㗎......就算而家返到去都好，點同學校解釋我無喇喇失驚無神擴課成個幾月㗎......唔通真係講穿越咗去異世界咩......講出嚟都冇人信啦！」
巧晴果然是品學兼優的乖學生，到了異世界整整一個月都仍擔憂著自己的學校成績。
「唉......而且如果我再咁一直冇原因咁缺課落去，學校分分鐘唔會再幫我保留學位，當我自動退學㗎，我當初辛辛苦苦讀書而得番嚟嘅Band1學校學位，分分鐘就因為呢件事而冇埋唉......」巧晴開始有些杞人憂天著自己的中學學位。
「咕嚕嚕......」巧晴的肚子開始打著鼓。
「不過唔好諗住啦......都係落去食早餐醫咗肚先有氣力㗎嗎，漢什佢應該差唔多煮好早餐㗎啦。」巧晴摸摸自己的肚子說著。
接著，巧晴就先作簡單梳洗，之後就直接到樓下的客廳以準備進食漢什快將煮好的早餐。當她到達時，漢什亦碰巧煮好了今日的早餐，故此巧晴就直接坐下享用。
而理所當然地，今早的早餐又是芝士配硬綁綁的麵包，再鋪上一塊薄切的火腿，典型的西式簡易早餐，但卻幾乎日日如是，而且有些清淡及是冷食的，故對於巧晴來說其實已經有些厭倦。
「漢什……我係咪已經嚟咗呢度成個月啦？」在進餐的期間，巧晴突然情緒有些低落地問漢什。
「計落好似都真係啦……做咩事啊巧晴？成個人心事重重咁嘅？」
「一個月……我已經流落到呢個世界一個月啦……」巧晴雙眼開始閃著淚光。
「巧晴......我已經好努力幫緊你搵方法返去㗎啦，樂觀啲啦。」漢什只能繼續安撫巧晴。
「但都咁仲係冇任何線索呀！連點樣造嗰粒乜嘢賢者之石......要用嘅材料同方法都......一個都搵唔到吖......咁我仲點樂觀喎！」巧晴帶有點淚光並開始有些激動地說。
當刻的漢什一被巧晴這樣反駁著，一時三刻也不知如何安撫是好......
「唔通我真係一世喺度？」巧晴開始落淚並追問著。
「一定會有方法嘅，食埋早餐再一齊開始諗好冇？」漢什嘗試打發巧晴。
「但唔通真係最少如蘇菲亞佢咁講，起碼要十年先返到去？」巧晴仍感到激動地說著。
「我會繼續努力㗎，無論付出任何代價我都會令你返到去㗎！」漢什握拳保證道。
「咽......咁好啦......頭先我有啲激動咗……唔好意思啊……」巧晴暫時冷靜下來。
接著，巧晴就收起了眼淚，繼續帶有忐忑不安並仍然思鄉的心情，與漢什一同吃完早餐，並在一同清潔好碗碟後，漢什決定今日再為巧晴研究可以回去的方法。因之前只顧住教巧晴鍊金術及劍術，同時要兼顧工房的經營，所以一直未能抽空作這件事。
「今日我再開始加油幫你睇書研究吓啦，今日工房都係唔開住啦。」漢什對巧晴說明著。
「嗯......咁麻煩哂你喇。」
首先，漢什這次就憑直覺拿了一本講述水晶與鍊金術的書來看，並開始在書枱上閱讀著。
在讀了沒多久後，漢什憑書中的內容發現了一些可能與製作賢者之石有關的線索。
「係乜嘢事啊？」巧晴站在旁問道。
「我啱啱响書到發現到可能係有助製造出賢者之石......當中材料嘅頭緒啊。」漢什如實道出。
「講真嘅？」
心緒本是有些低落的巧晴，聽到漢什這句話是，感覺就像忽然見到了曙光一樣。
「嗯......首先，我諗你應該未聽過一種叫““波莫利亞殞石””呢隻水晶㗎嗎？」漢什先向巧晴賣一賣關子。
「唔知呀，係乜嘢嚟㗎？」巧晴搖頭示意不知道。
「係一種非常稀有嘅材料，外形一般係綠色半透明嘅水晶，一般會喺一啲偏遠嘅水晶洞穴，會有極低機會會採集到......」漢什開始說明著。
「呃......咁同賢者之石嘅關係？」
「呢本書記載住......歷史上有記錄，波莫利亞殞石係調合賢者之石會用上嘅其中一種材料嚟。」漢什終於說出最關鍵的地方。
「咁你講嘅波莫利亞殞石邊度可以搵到啊？」巧晴一聽到賢者之石這關鍵字時，立即顯得十分著緊地問道。
「不過實不相瞞啊......其實我枝魔法杖......頂上嘅魔法水晶就係用波莫利亞殞石所鍛造而成㗎。」漢什指住放在工房內一旁的魔法枚說著。
「吓！真係......」巧晴目瞪口呆地說著。
「嗯，珍珠都冇咁真啊。」
「咁你依家拆出嚟俾我咪得囉。」巧晴提議道。
「唔得啊，份量完全唔夠，同為粒魔法水晶係調合咗其他物料，已經唔係純正波莫利亞殞石啦，所以就算拆出嚟都用唔著。」
漢什當面回絕，同時也編好了理由來解釋。
「吓......即係得物冇所用啫。」巧晴頓時失望道。
「不過我哋可以去試吓採集新嘅返嚟嘅。」漢什像重新燃起了希望般向巧晴說道。
「當真嘅？」巧晴反問著。
原來，漢什突發奇想醒起在塔洛夫約西南面遠處，有一座叫作波塞克山的山。這座山是有一個算大的山洞，內裡薀藏了不少而不同種類的水晶，簡直可以說是一個藏有水晶的礦洞一樣。
「咁由呢度過走要幾耐㗎？」巧晴即時心急地問道。
「行路大半日左右啦，由於要穿過好幾個森林，所以租隻騎馬去都唔會快到，反而會仲咁唔方便。」
漢什這樣說，即是基本上代表步行前往已是最好的選擇。
「吓......要行咁長時間？」巧晴愕然說著。
「嗯......你唔想去嘅話可以唔去嘅，我自己一個去都可以。」
「想瀨低我？唔啊，我都去！」巧晴以倔強的語氣說出自己的意向。
「你唔怕危險咩？」漢什反問道。
「危咩嘢險呀！我依家都已經識得用刺劍去戰鬥㗎，唔會係你嘅拖油瓶囉。」巧晴有點硬朗地表示道。
雖然，巧晴現在可以說是只算學會刺劍劍術的皮毛，但漢什認為她都可算是有基本的自衛能力，同時在自己戰鬥時作輔助都應該沒太大問題，反正他自己也一定會加緊護住巧晴。
「不過巧晴有時佢都算係個幾硬頸同倔強嘅女仔嚟呢......」同時漢什也在心中評價著這一刻的巧晴。
「咁我哋一齊去啦！」
「好喔。」
在漢什考慮了一會後，還是決定讓巧晴也一同跟隨前往波塞克山找尋新的波莫利亞水晶。於是乎，漢什就決定今日先準備一下相應的裝備，亦由於預計需要耗費大半日的路程並應該會一出就要好幾日才回來，故此無可避免會在外過夜，所以同時需準備能在外夜過夜的物品。
最後，漢什就決定在翌日一大早就出發，而巧晴亦同意這樣的決定。
不知不覺地到了晚上，由於要在明天清晨就要起床及需養足體力出發的關係，所以他們兩人亦選擇比起平時早一些上床準備就寢。
而他們兩人也仍然是睡在同一張在兩樓臥室的雙人床，漢什臥在床上後不出多久就先行入睡，但相反巧晴可能是由於有些緊張於明天前往波塞克山的事，而一直在床上輾轉反側無法入睡......
就在巧晴在床上不斷郁動的時候，由於漢什就直接打側睡在她旁邊的緣故，她不慎無意地輕輕拍到了漢什的背部，使漢什因而再次醒一醒來。
「嗯.....邊個......乜嘢事啊？」剛被弄醒的漢什朦朧地問著。
「整到你......對唔住啊。」巧晴立即向漢什道歉。
漢什聽到是巧晴的聲音時，也轉身面向巧晴看她是甚麼事......
「你瞓唔著啊？」漢什見巧晴仍睜開眼睛時問道。
其實打從在巧晴穿越到這個世界以來，漢什他一直也非常關心著巧晴，她有甚麼事都基本上會第一時間去理會。
「嗯嗯。」巧晴輕輕點頭默認。
「點解嘅？張床瞓得唔舒服？」
經漢什這樣一問，巧晴卻一時間不知如何回答是好。
其實，巧晴在這裡初期的時候，由於不太習慣與當時不算相熟的漢什，這樣的異性同床的關係，因而顯得有些不自在而會失眠一小段時間才能睡著，但現在基本上已習慣與漢什同床。
故此，巧晴這次真正失眠的理由，其實主要是因為她擔心明天去波塞克山的旅途，因為她從未試過在這世界作遠行，加上她預先知道會穿越森林及山洞，因而難免擔心安全。
但是，她也不想和漢什說臨陣退縮，自己獨自留在工房等漢什出去再回來......
「無咩嘢......可能只係比平時早瞓咗，而有啲唔習慣啫。」巧晴有點敷衍地編作一個原因來回應。
然而，巧晴還未想著把自己心底下的真正原因如實向漢什道出來。
「嗯......不過聽日一朝早就要出發㗎喎，你唔瞓多啲點夠精神啊......」
「呃......」
「一係你試吓數棉羊，咁可能幫倒你瞓得著呢。」漢什提出了一個對巧晴來說是過為老套的方法。
巧晴對於漢什這個極為老套的建議感到無言。然而，漢什未等到巧晴如何回應時，就已再次進入夢鄉。
同時巧晴有見及此也不再打擾他，自己在約半小時後亦終於開始感到了睡意而漸漸地睡著......