風之鍊金術士譚:與異世界女高中生之邂逅: 第12章: 鐵匠少女的委託
第12章: 鐵匠少女的委託
「就由鍊金材料方面開始講起啦......」
「知道！」
這曷因為，蘇菲亞在過去開始教漢什鍊金術的時候，也同樣是由鍊金材料這方面開始，所以漢什現在亦參考了這個模式來教巧晴。
接著，漢什亦先給了巧晴一本空的筆記本。
「呢本筆記係用嚟俾你用嚟記底你認為嘅重點，知冇？」漢什對巧晴說明著這筆記本的用途。
「知道......唔該哂你啊！」
「嗯......咁依家開始啦......」
之後，漢什把工房現時有，多種不同的植物類材料先一同放在一張桌子前，展示給巧晴看看。
「嗱......呢啲就係植物類嘅鍊金材料，首先最左上角嘅就係一束嘅玫瑰花......」
漢什拿起一整朵完整連根部的玫瑰花，對巧晴講解著。
「外形同我哋世界嘅玫瑰花都一樣......」巧晴心中想遁，同時亦像一個好學的學生般認真聽好漢什的講解。
另外，巧晴也開始用筆把當中的重點記下在手上的筆記本內。
接著，漢什在講解完的同時，亦把這朵玫瑰花交給巧晴，以令她用手試試觸摸著它的質地。
「而一朵植物嘅根部、葉、花蕊以至枝葉等，都可能會各自拆開單獨用嚟調合都會有唔同嘅功效，而成朵植物放入去都可能會有其他效果，所以喺整理同揀選材料調合時要注意……」
漢什繼續用心教導及指點著巧晴。
「嗯……原來係咁……都幾複雜嗰喎……」
「冇錯，因為鍊金術嘅原理簡單嚟講，就係用魔法將物件拆散，再重組結合，所以要選好正確嘅材料係事關重要，一有啲差池就可能會導致失敗或做咗第兩樣鍊成品。」
「明白，我一定會細心留意同記住！」
巧晴繼續把漢什所提及的理論，當中重要的部份記錄下來。
之後，漢什亦繼續以和剛才近似的形式，向巧晴講解著桌上展示的其他材料，或許是因為她在香港讀書時經常要背書及把教的知識記入腦的原因，因而巧晴的記憶力也非常好，輕易就把這些材料的名字及外貌記了入腦。
過了一會之後，房子的大門突然被拍了幾下，故此漢什聽到後立即過來迎接，而巧晴也跟隨......
「入嚟啦！」
其後，一名帶有尖耳朵，緋紅色的及肩短髮，穿著紅色短裙及披上同色披肩，配上打底褲及長靴，頭上載上玫瑰花裝飾的少女入內。
同時，她亦擁有如天使般可愛的童顏巨乳外表，使在場同為女性的巧晴，難免在心中有一絲的妒忌。
「咦……羅莎？你今日嚟係？」
漢什一見到該少女時，立即可以說出其名，看來他們兩人應該本身是互相認識的。
看來，這名緋紅色及肩短髮少女，其名字就是““羅莎””......
「係咁嘅……」
在說著的同時，羅莎也把自己背著的背包放下，並把其打開掏出一袋的礦石。
「你幫我將呢啲礦石用鍊金術鍊成鐵同銀。」
「冇問題……呢啲礦石係你出鎮外啲礦洞度執嘅？」
漢什見羅莎她還陀著一枝逐發手槍，加上其長靴及帶著背包的穿著，因而推斷出她應是剛剛從野外回來。
「係啊……因為我屋企嘅武具店需要用到鋼鐵同銀，所以我側朝早就出咗去收集咗一堆返嚟。」
「原來係咁……」
「話時話……呢個女仔係邊個嚟㗎？你哋兩個識得嘅？」巧晴此時從後對漢什問著羅莎她的身份。
「你講羅莎佢？佢其實係……」
「漢什……做咩你有個女仔喺你工房度嘅？」
羅莎此時也察覺到巧晴的存在，於是打斷了漢什的說話問及其身份。
「漢什……我諗你唔係因為一個人打理工房太悶……所以就喺唔個邊度捉個靚妹返嚟啊……」羅莎調侃著漢什。
羅莎很明顯是對於漢什和巧晴目前的關係起了疑心，加上巧晴本身可愛的外表及有少許嬌小的身材，也令羅莎可能智誤會巧晴是被漢什從不知何處所利誘到工房的女孩。
「不如你聽我解釋先......」漢什嘗試為自己釋疑。
「孤男寡女共處一室，一定係有景轟啦......」羅莎繼續一片標籤著漢什的樣子。
「唔係啊......其實巧晴......」漢什感到不知所措。
「唔好意思啊......其實漢什唔係啲咁嘅人嚟㗎，佢真係冇對我做啲乜嘢，呢點我可以保證。」突然之間，巧晴出乎意料地主動為漢什辯解著。
「巧晴你......」
「咁啊......如果呢位妹妹都咁講，或者......」
羅莎聽到巧晴主動這樣說後，也開始冷靜下來想想。
「我係凌巧晴，叫我巧晴就可以，係漢什嘅鍊金術助手。」
巧晴主動說出自己是漢什助手的事，以令羅莎可以相信及釋除疑慮。
可能是因為巧晴同樣是女生的關係，羅莎是偏向信任巧晴的說法，所以亦認同漢什應該是正人君子，沒有對巧晴作出一些不道德的行為。
「原來係咁......或者我真係多慮咗啲嘅......對唔住啊漢什，係我失儀啦......」於是乎羅莎也為自己無端的失儀對漢什誠懇致歉。
「唔緊要......你信我就得㗎啦。」漢什落落大方地回道。
「話時話......你係叫羅莎啊呵……唔通你都係漢什佢嘅朋友？」此時，巧晴再次有禮貌地問著羅莎她的身份。
「係喎......唔記得介紹返自己㖭！我叫做羅莎，我同漢什算係由細識到大嘅朋友，係响塔洛夫度嘅一間武具店店主嘅女，平時主要會响店度幫我叔叔手㗎。」羅莎對巧晴簡單地自我介紹著。
「但不過......巧晴你個名都幾特別喎，唔似係呢度嘅人，唔通你係嚟自外國嘅？仲有點解你無端端會做咗漢什嘅助手……因為之前都冇聽佢提過想搵鍊金助手……」
同時，羅莎從巧晴的姓名，推斷出巧晴應該最少不是來自波莫利亞公國的人。
而漢什在想了一想後，決定將巧晴是異世界人一事說出。
「羅莎，其實巧晴佢係……」
「漢什……都係等我講啦。」
就在漢什開口的時候，巧晴率先打斷了漢什的說話。
接著，巧晴就說出自己從因為漢什鍊金調合意外的緣故，被帶來這個世界，直到現時當了泛午的助手以學習鍊金術的經歷。
「原來係咁......仲以為你係漢什响唔知邊度拐帶返嚟嘅小妹妹㖭。」
「小妹妹......」巧晴對自己居然被當作““小妹妹””感到有點微言。
「其實我今年十六歲㗎啦……」
「即係仲大我一年……真係睇唔出喎……」
可能巧晴身材偏向嬌小的關係，所以羅莎亦沒想到巧晴是比自己大一年的。
「即係計番......羅莎你只係十五歲咋？」
「係吖。」
「咁你都發育得幾好喎！」巧晴直言羨慕著羅莎的身材。
在羨慕的同時，巧晴雙眼亦不禁稍稍望一望了自己身上只是算有些““微微起伏””的部份，亦覺得比起羅莎，自已真是有點自慚形穢......
然而，巧晴亦想起以前在香港中學的時候，亦有因為自身身形的緣故，而被人誤當作低年級學生的經歷，所以巧晴對羅莎的反應基本上是見怪不怪了......
「呃......講返正題啊......原來巧晴你係第二個世界嘅人嚟......的確有啲令人意思不到......」羅莎感到有些意外地說道。
「咁巧晴你.....而家會唔會仲會好憎漢什㗎？始終都係佢令你要流落到呢度……」羅莎有點婉轉問巧晴。
「咁坦白講......我而家係未完全原諒漢什佢㗎......」巧晴如實說出自己還是不能完全原諒漢什。
「巧晴......」
「不過......佢之後都曾經响我有危險嘅救過我，而且又肯冇條件咁收留我......同開始為咗我去埋口苦幹咁研究可以送我返去嘅方法......都算係將功補過吖......」但巧晴仍然能夠客觀地說出漢什的優點。
「而且唔想發生嘅都發生咗啦，漢什佢又冇心嘅，再不斷咁怪責漢什都冇補於是㗎啦......所以就不如一齊全力去搵出可以令我返到去嘅方法啦。」
相當難得的是，巧晴卻能夠豁然開朗地面對現時的處境。
「所以……巧晴你就主動要求漢什佢教你鍊金術，仲做埋佢嘅助手係咪？」
「嗯。」巧晴點頭回答。
「巧晴......你真係樂觀同豁達喔......」羅莎最後不忘稱讚著巧晴的態度。
「多謝你讚我啊！」巧晴微笑道謝。
「雖然我唔知你講嘅異世界中嘅家鄉......嗰個叫““香港””嘅地方係乜嘢......但如果你有咩問題嘅可以隨時嚟武具店度搵我㗎。」
「咁你間武具店係响？」巧晴對羅莎問道。
「你叫漢什帶你去咯，佢知喺邊嘅。」羅莎手指住漢什說道。
「咁好啦......到時漢什你帶路啦。」巧晴以銳利的眼神望住漢什說道。
「係......」
基於在場兩名少女無形的壓力之下，漢什只好無奈就範。
接著，羅莎察覺了原來已不知不覺地在此一同聊天了一段時間，於是覺得時間也差不多了，就決定先回家幫忙看店。
「咁我大概聽朝聽朝會嚟拎我今日要鍊成品，你整唔整得切吖？」
在準備離開前，羅莎亦向漢什給了訂金，同時向他表示自己之後會來拿回其所要鍊成品的大概時間。
「你等一等先！」
之後，漢什先去調合的工房，快速地檢查一下自己材料櫃內的材料及現有的銀條及鋼鐵的貯存情況......
「冇問題吖......今日內應該整到。」漢什在檢查完後，回到店面回應了羅莎的要求。
「唔該哂啊......咁我哋聽朝見啦！」
「再見......路上小心啊。」
「拜拜啦漢什......巧晴。」
之後，羅莎就離開了工房，回到自己家的武具店去幫忙看店。
在送了羅莎離開後，漢什也拿起羅莎交給的那袋礦石材料，和巧晴回到鍊合的工房內。
漢什首先把這袋的材料放在一旁，以待稍後作整理。
「唔好意思啊，今日我可能要先開始造羅莎佢委託嘅物件先......不過都可以順便稍稍咁教吓你整理材料嘅……」漢什感到有試抱歉地對巧晴說道。
「唔緊要。」
「嗱……咁先戴一戴手套先，因為要用嚟保護好啲材料同自己雙手，因為有啲材料可能會係腐蝕性或者表面會出現高熱或過冷嘅現象，所以戴手套亦可以保護好自己雙手。」
漢什給另一對本是後備的手套給巧晴，同時也順道說明要戴上的原因。
「明白。」
接著，漢什和成為了其助手的巧晴在均戴上了手套後，也開始一同先執了足夠的材料，並把羅莎剛才給予的礦石也帶出來，一同放在工作枱上……
之後，漢什也開始先以剪刀及小刀整理好它們，以作稍後用調合之用。
在整理的期間，漢什決定讓巧晴嘗試以最簡單的方式，以剪刀來處理植物類的材料……
「你試吓獨立咁剪出根部同花蕊啊。」漢什對巧晴指示道。
「知道......我會試吓㗎啦！」
之後，巧晴遵循漢什的指示處理著這些的材料。
「咦……都做得唔錯喎，新手嚟講甚至已經算係完美啦。」漢什稱讚著巧晴。
「我都只係跟你指示去做啫......」巧晴謙卑回道。
最後，在漢什和巧晴一同幾經辛苦後，終於在入夜時，調合好了羅莎要求數目的鋼鐵塊及銀條。
在完成後，漢什和巧晴兩人也有點感到筋疲力盡。於是他們兩人也在完成後不久，在吃了晚餐及梳洗後，先回到臥室好好睡一晚休息，以養足精神應付翌日的工作……