男男路: 不懂得交際暗裡卻走近
不懂得交際暗裡卻走近
在樹海裏，有一個男子獨自搜索了一日一夜，他要找的是留下遺書的女朋友。樹海是遠近馳名、人所共知的自殺聖地，長年吊着很多自殺的屍體無人清理，所以也有很多靈異傳聞傳出。
他根據所定的路線沿路搜索，已經查看了過百具屍體，但始終找不到他的女朋友。
「或者，佢放棄咗自殺嘅念頭，已經返咗屋企。」他想。
但他沒有走回頭的打算，雖然很想找到她，但又不想找到她。他進樹海前已下定決心，找不到她不會離開。
皇天不負有心人，他終於在傍晚找到還在生的她，他喜極而泣，跑上前緊緊摟着她，而她卻手持小刀狠狠從後刺進他體內。血液飛濺，旁邊的樹染成血紅色，小刀貫穿他和她的身體，雙雙倒卧在血泊中，摟在一起安詳離世。
「嘩！」阿睎從夢中驚醒，驚魂未定，滿身大汗，花了足足三分鐘才冷靜下來，下床喝杯水又再睡了。
而同一時間，阿彤也嚇醒了，她連忙發訊息給阿睎，告訴他自己發了一個惡夢，可是得不到回答，等待期間不知不覺又睡着了。
而阿超也於此時醒了，他十分平靜，因為他已經親身經歷過一次，而且也夢到過很多次，所以他很快便再次睡着了。
翌日，他們為了一個新委託而再次聚在一起，這次委託是要做保鑣，保護一個遊客兩日一夜。起初他們也討論了很久︰普通遊客為什麼需要保鑣？三人均沒有接受過專業訓練，如何能勝任？會否有甚麼危險？但最後因為豐厚的回報，以及達成共識的免責聲明而接受了委託。
在機場等待期間，阿睎和阿彤又吵起上來。
「做咩琴晚唔覆我？」阿彤怒氣沖沖責罵道。
阿睎顯得十分無奈，低聲下氣說︰「唔好嬲啦，sorry，琴晚凌晨我瞓咗喇，今朝一見到我就已經即刻覆咗你。」在一旁的阿超已經司空見慣，正等待大事化小，小事化無的良機。
阿彤顯然不接受這解釋，依然火氣十足的說︰「喺琴晚我最需要你嘅時候你唔出現，之後先補償返，有咩用？琴晚我發惡夢勁驚想揾人陪，今朝咩事都無喇！」
「真係㗎？我琴晚都發惡夢扎醒咗，乜咁啱嘅？」阿睎試圖轉移話題，但阿彤並不接受，還想繼續責備阿睎，阿超逮住這機會趁機插話，打斷阿彤的連珠砲發。
「嘩？惡夢都一齊發？你哋有無咁夾呀？唔會發埋同一個夢啩？係就真係天都注定你哋係一對喇。」阿超開玩笑道。
阿睎當下即刻意識到這是阿超的助攻，故此立刻分享自己的夢，可是阿彤搖搖頭，表示自己的夢並不一樣，不過他們並未留意站在一旁的阿超正微笑並輕輕點頭，因為他也發了相同的夢。
「我發個夢恐怖好多，我夢見自己喺監獄，第二朝就要上刑場，雖然成個夢無人提起，但我意識到自己係一個外國貴族，而且唔係因為犯罪而被判刑，只係僅僅因為我係一個貴族所以就要死。個監獄又黑又凍，又有老鼠曱甴，我畀人虐打完又無飯食，又痛又餓，仲每日睇住一個屋企人上刑場被殺，身心都受盡折磨。我係成個家族最後一個受絞刑嘅人，而係受刑前嘅呢一晚，一個奴隸嚟救我，我哋差啲成功逃獄出城，點知最後都係畀人發現，之後我哋就畀人亂槍射死。」阿彤回憶起這個夢時忍不住流下眼淚。
阿睎看到後立即上前替她抹眼淚，而旁邊的阿超則瞪大眼睛，顯得有點難以置信。
就在此刻，一個手拿旅行袋、穿着很夏日、皮膚曬得黝黑的陽光猛男出現在他們面前。
「Hey，are you those guys？」陽光猛男以一口流利純正的英文問。
「Are you Rose？」阿睎以浸淫多年的英文回答。
「Yes，man，我就知我無估錯。」Rose又以字正腔圓的廣東話回答︰「我遠遠見到你哋個牌，oh my god，真係好old school，哈哈哈哈！」
「咁old school真係唔好意思喎，或者下次要機場開廣播用埋projector將你個樣投射出嚟，等你嚟揾我哋會好啲。」阿超不客氣道，打從第一眼看到Rose後，便對他沒有好感。
「Hey，bro，don't be serious，我份人比較直啫，唔好介意。」Rose嬉皮笑臉道，同時他留意到剛哭完的阿彤，於是很紳士的上前親吻她的手背，然後變了一個小魔術，變出了一枝玫瑰花送給她，並說︰「You are the apple of my eye，鮮花配美人，但你嘅美令枝玫瑰都相形見絀。」
阿彤聽完頓時面紅起來，害羞的笑了，開懷的說︰「你咁識氹人嘅，溝死女啦，係咪驚畀啲女尋仇所以先要揾保鑣呢？」
Rose聽到「保鑣」二字便嚴肅起來，義正辭嚴的說︰「唔係你哋諗得咁簡單，不過你哋唔駛知咁多，知越少對你哋越安全，你哋只需要好似朋友咁同我出街，暗中保護我就得，唔駛好似啲專業嘅body guard咁突兀，自然就得，最好唔好畀人知你哋係保護緊我。」
他們三人聽完後表現得更好奇，可是既然Rose都說得這麼清楚，他們也不便過問。
「咁首先送你去酒店放低啲嘢先，你book咗邊間酒店？」阿超問。
「Hotel？I haven't booked it，我諗住到埗再random揾間就算。」Rose不在意的說，對他而言，住哪根本不重要。
「咁危險？咁咪無得叫酒店做定功夫？對你安危有好大影響喎……」阿彤說。
「咁住你度咪好安全囉，你會保護我，right？」Rose即場調戲阿彤，並走到她身旁。
阿睎妒火中燒，即時插進他倆中間把他們分隔開，並摟着阿彤說︰「唔可以，點可以無啦啦畀個陌生人住喺個女仔屋企，no way！」
Rose看到後忍不住大笑，拍着阿睎膊頭說︰「Just kidding，man，我想體驗呢度嘅生活同文化，所以會住青年宿舍，我一早諗好揀好，don't worry！」說罷，Rose拿出電話展示了地址，他們便往目的地進發。
期間，Rose和阿彤有說有笑，小聲講大聲笑，偶然又在耳邊細語，完全旁若無人，看得阿睎牙癢癢，異常憤怒，要不是之前阿彤跟他說︰「佢鬼仔性格熱情啲啫，唔好介意，我唔會蝕底畀佢嘅。」他真的會拉Rose出來毒打一番。
坐在阿睎身旁的阿超把一切都看在眼內，他對阿睎的心情感同身受，安慰說︰「係你嘅就點都唔會走，我知阿彤係鍾意你嘅，佢都係想做好單委託啫，要對佢有信心。雖然點都係會妒忌㗎啦，但都只有自己『咕』一聲吞咗佢，我成日都係咁，無事嘅。」
阿睎點點頭沒有回話，但雙眼視線從未離開阿彤，而幸好Rose也很有分寸，所有行為說話都點到即止，沒有過火，而阿彤也刻意迴避較敏感的話題和身體接觸，全程車都相安無事。
抵達青年宿舍把行李放好後，Rose便嚷道︰「好肚餓，我哋去食大排檔，聽講嚟到一定要食，我有做過research，知邊度最正，let's go！」說完拿着一個手提包便衝了出去。
阿睎不屑的嘀咕︰「最好佢自己知點樣去。」阿超聽到後只能苦笑，並勸阿睎大方點。
最終一行人在阿超帶領下，去到大排檔勝地朝聖，Rose也嚐到了夢寐以求的大排檔名菜──避風塘炒蟹。
「Lunch就食呢啲好滿足，今晚要食埋煲仔飯。」Rose才剛吃飽，還搓着肚便已經想好了下餐吃甚麼。
「同我去一個地方。」他煞有介事的說，整體氛圍也變了，阿超三人沒有多問，很自然便跟住他走了。
在車上，阿睎忍不住問Rose︰「係咪應該同我哋講吓去邊先好啲呢？等我哋可以分析定路線，同做好風險管理，將危險減到最低，始終呢個係我哋嘅工作。」
Rose聽了後也一改之前的嬉皮笑臉，嚴肅認真的說︰「You' re right，我一陣要去水塘交收，你哋三個企遠啲唔好畀人見到，otherwise你哋會有生命危險。」
「唔得，我哋要保護你㗎嘛，企咁遠有事我哋跑到過去都遲啦，點可以企咁遠！」阿彤立即反駁。
「我哋扮行山，咁就可以自然啲又近你啲。」阿超提議。
「Well，不如阿彤扮我girlfriend同我一齊去交收，你哋就扮行山，咁又有一個喺我身邊保護我，你哋又自然啲。」Rose也提議。
「唔……」阿睎想拒絕的時候，阿彤打斷了他說︰「好，一於咁話。」
「喂！好危險㗎，點可以畀你冒呢個險？你有事我點算？」阿睎嘗試說服阿彤放棄這念頭。
「咁你會保護我㗎嘛，況且呢個係我哋嘅job，接嗰刻都預咗會有危險，但我哋嘅服務宗旨你唔係忘記咗呀？」阿彤振振有詞，反而說服了阿睎。
「放心啦阿睎，有我喺度睇住佢，佢唔會有事，我都唔想少咗個人。比呢啲更危險嘅場面我都經歷過無數次，超有經驗，唔駛擔心。」阿超信心十足。
Rose在一旁靜靜看着，並沒有參一腳，因為他正全副心思放在一會的交收上。
「Rose，可唔可以講我哋知係交收啲咩？」阿彤再次問道，希望他會說。
「My answer is no，唔可以。」Rose堅持初衷，阿彤也沒有再追問。
到了水塘，大家各自去到安排好的位置後，便靜待對方出現。等了約十分鐘，來往的只有行山人士和釣魚人士，並沒有交收的人出現。
又再過了十分鐘，阿彤被蚊叮了很多口了，雙腿都紅紅腫腫而且痕癢無比，Rose也注意到，於是在口袋拿出一小瓶液體，噴灑在阿彤的雙腿及雙臂同時說︰「呢枝嘢係我家傳秘方，我自己調配嘅，估唔到呢度都咁多mosquito，好彩有帶喺身。」說也神奇，不消十秒，阿彤整個人立即不再痕癢，紅腫也消退了。
此時阿超發現了甚麼，透過耳機跟大家說︰「我同阿睎應該已經暴露咗，啱啱行過嗰啲行山同釣魚人，有一部份應該係對方嘅人，因為佢哋邊行邊四圍望，有一個發現咗我哋之後，其他個個行過都望住我哋。好彩我哋有個人設係龍友影風景，所以佢哋都仲係懷疑緊啫，我哋換換location，你哋執生。」說完他倆便離開原地，選了一個距離較遠，但依然能夠清楚看到阿彤和Rose的地點，唯一缺點是有突發事件要花更多時間才能到達救援。
就在阿超和阿睎去到新地點兩分鐘後，交收的人終於出現了，對方是一個小孩子，大約十歲左右，他提着一個白色手提袋，在確認過Rose袋裏的東西後，雙方便交換手提袋，然後各自離去。
整件事很順利亦很普通而且很正常，唯一奇怪的是在一旁的阿彤全程露出詫異表情，而當Rose宣布交易完成可以離開之後，阿超和阿睎立即跑來跟阿彤會合，並詢問詳情。
「佢地只係交易啲卡，仲要係以物易物咁互換。」阿彤完全不解，這樣也需要請保鑣保護嗎？
「唔好睇少呢啲卡，」Rose突然插話︰「我啱啱嗰張連埋手頭呢幾張，夠買層樓，咁你話駛唔駛請保鑣？」眾人聽完後都嚇呆了，完全想不到一張小小的卡牌竟然值天價。
「而家先係你哋工作嘅開始，直到離開水塘之前都唔好掉以輕心，啱啱個kid只係傀儡，我手頭嘅卡隨時落山前會無咗。」Rose認真起來了。
「點解咁肯定？」阿超問。
「因為我同佢trade嗰張係fake，佢一發現就會派人嚟搶返。」Rose急步走，但說話卻很輕鬆，似乎已經不只一次這樣交易，難怪要保鑣。
「喂，你條友咁跣我哋？」阿睎氣憤的罵道。
「所以at the beginning我已經同你哋講，你哋知得越少越好，anyway，我都會好好保護你。」Rose牽着阿彤的手温柔的說。
「你快啲放開佢，」阿睎衝上前拉開Rose的手，站在阿彤前保護她，厲聲斥責︰「你自己死好啦，唔好拉埋阿彤落水。今日我都忍夠你，成日借啲意搏懵抽水，我唔發火你當我病貓？」
「Relax，bro，與其喺度嘈，不如快啲走先，其他嘢之後再算。」Rose此刻只想盡快逃離現場，對於阿睎的指控施以「拖字訣」。
「講清楚先好走！」阿睎堅決拒絕。
「唔好咁啦阿睎，成件事都唔係你講咁嘅，而且而家逃生真係最優先嘅事，我哋全部都畀人點哂相㗎啦，有啲咩等安全先再講啦……」阿彤幫口道，阿睎聽到後十分詫異又失望，想不到自己一心為阿彤着想，換來的卻是她的拒絕，他已經氣得說不出一句話。
「阿睎都只係緊張你，你咁講好傷佢心㗎……」阿超替阿睎抱不平。
「Come on，你哋唔走我自己走㗎啦，我未想死住。」Rose不耐煩的催促道。
「我係當事人，我無感覺到唔舒服，okay？你哋唔走我就同Rose一齊走先。」阿彤重申自己立場。
「好，估唔到你係咁嘅，一見到人哋靚仔啲就暈哂浪，無哂判斷力，是非不分，好，我明哂，你咁想跟佢走你就走，唔好後悔！」阿睎一時火大，說了一些氣話。
阿超立即意識到說話的嚴重性，迅速打圓場道︰「阿彤，佢只係緊張你，驚你畀人呃，嗰啲全部都係晦氣說話，唔係真㗎……」
「我自己有分數！」阿彤語氣也很重，差點把阿超嚇壞，說完她便離開了。
「阿睎，快啲氹返佢啦，仲未遲㗎……」阿超轉而目標勸說阿睎，但他氣未消，完全聽不進。
「佢要跟人走就跟，我無佢咁好氣。」阿睎朝相反方向走去。
「喂，阿睎！」阿超站在原地叫喊︰「你咁做會後悔㗎，我唔想你會後悔，快啲氹返佢啦！」阿睎頭也不回，徑自走了，留下阿超獨自一人不知如何是好。
在權衡完事情輕重緩急後，他決定先護送Rose離去，再截返找阿睎。
下山過程很順利，沿途並沒有遇到剛才交收的人，只是一路上Rose和阿彤有說有笑，根本不像要急着逃亡，這令阿超感到很無奈。
到了車站，阿超問阿彤︰「Rose已經安全到埗，我要返轉頭揾阿睎，你跟唔跟埋我一齊去？」
阿彤想了一想，還是搖頭，拋下一句︰「佢唔知錯唔駛旨意我睬返佢！」之後便與Rose一起離開，阿超只能搖頭輕嘆，然後獨自踏上尋找阿睎之旅。
在山上尋人一點也不容易，路也不只一條，每次碰到分岔路都只能碰運氣。可是今天山上特別熱鬧，因為剛才交易那幫人已經發現了卡是假的，正尋找Rose的蹤影。
「捉到嗰條友，應該都引到其餘啲人嚟救佢，除非佢係condom。」一個梳着油頭的人說。
「特登留一個喺度，我就覺得係陷阱，老闆太大意，無啲警覺性。」另一個戴金絲眼鏡的人說。
「弊！阿睎畀成哋捉咗，快啲同阿彤講先。」阿超立即撥打阿彤的電話，而阿彤也很快聽。
「聽住，阿睎畀佢哋捉咗，我要你幫手一齊去救佢。」阿超懇求道。
「講真，我對你真係好失望，估唔到你會同佢一齊講呢啲無聊低質嘅藉口，我話你知，我係唔會中計！」阿彤斬釘截鐵的回答。
阿超眼見阿彤態度如此堅決，也放棄再說服她，決定自己隻身前往救人，嘗試電影主角的威能──一個人解決整個集團。
阿超決定由剛才兩人着手，先解決油頭，再要脅金絲眼鏡說出藏身地點。他在地上拾起一枝大小、長短和軟硬適中的樹枝，偷偷走到兩人身後大棍一揮，油頭應聲倒下，金絲眼鏡驚恐萬分，所有事情也和盤托出。
無錯，如此順利皆因這是阿超的預想畫面，有了這預想，他信心十足，一切按計劃行事。走到他們身後大棍一揮，樹枝應聲截斷，油頭卻毫髮無損，這跟阿超的預想有些少出入，但也沒有問題，畢竟身經百戰的他一對二是輕鬆之事，如果對方沒有電槍的話。
一陣刺痛的感覺，阿超便昏倒了。醒來之後，他平躺在一個狹小的空間中，雙手被反綁，雙腳也被綁着，而阿睎則躺在他身邊，同樣被五花大綁。
「你無事就好。」阿超率先開口。
「咁嘅情況我唔覺得我哋可以算係無事，不過好彩得你畀人捉埋，最少仲有阿彤可以救我哋。」阿睎自我安慰道。
阿超聽到後本想說出實情，但又於心不忍，於是只好附和他說︰「係，真係好彩，我哋好快就會得救，不過我哋都要諗吓點樣自救。」
阿超看了四周，判斷出這是車尾箱，但並沒有任何工具可以利用，要鬆綁只能靠雙手解開，或者靠另一條繩，以兩條繩互相磨擦，最終弄斷宅。
「幫吓我手。」阿超將自己的計劃告訴阿睎，但阿睎卻半信半疑，而且質疑道︰「點解要咁麻煩？用刀割斷佢咪得，我褲袋有瑞士軍刀。」
「你唔早講？」阿超聞言反應很大。
「你唔早問？」阿睎不徐不疾的答︰「不過我自己拎唔到出嚟，要人幫手先得。」
一輪折騰之後，他們總算重獲自由，下一步便是逃生。他們剛才的擾攘也沒有人來阻止，阿超推斷附近應該無人，但安全起見，他還是稍微打開車尾箱查看外面環境，結果跟他推測一樣，可是地點卻令他毛骨悚然。
「停喺呢度似樣咩？我哋一直命懸一線緊，咁都無事真係感謝主。」阿超連忙道謝，他們正懸空在懸崖一邊，半輛車在空中。
「我哋點逃生先？亂郁隨時一齊跌落去。」阿睎問。
「等人嚟救就不設實際嘅，靠自己啦。」阿超說完再重新檢查一次車尾箱，然後對阿睎說︰「車尾箱同後排座位係通，喺呢度碌返入去再走會安全啲。」
語畢，兩人把座位調低，然後爬到車箱再離開，過程非常順利，順利得令人懷疑，為何大費周章捉他們回來但卻沒人看守，任由他們逃走呢？
他們沒有多想，或者是剛巧換班，所以才有空檔吧？但一定是千載難逢的機會，他們用最快的速度逃離現場，直奔下山。
「呼，真好彩，估唔到咁都走得甩。」阿睎鬆了一口氣。
「係，應該係前世積嘅福。」阿超看着阿睎說︰「你個頭有塊樹葉。」說完便伸手替他撥去樹葉。
「唔該哂。」雖然外人看來有點奇怪，但他倆都不覺尷尬。
一會後，車來了，他們乘車去跟阿彤會合。車上他們聊了很多話題，由孩提時代談起，直到他們相遇，甚至對以後的想法等，彼此都了解了不少。
「你覺得有無前世？」阿超問。
阿睎想了想，肯定的答道︰「我覺得有，點解突然咁問？」
「你記唔記得你同阿彤發嘅惡夢？」阿超問。
阿睎點頭，阿超續說︰「你哋發嘅夢我都發過，甚至可以話我都經歷過，因為嗰啲正正係我嘅前世，亦都係你哋嘅前世。」
阿睎認為阿超在開玩笑，於是笑道︰「你又點會知前世係點？而且一個夢又點會同時係我哋三個嘅前世呢？今次個笑話唔好笑，無諗過就爆肚唔work。」
「哎呀，你咁清醒嘅，咁都呃你唔到，睇嚟我仲未夠班。」阿超自嘲以解尷尬，同時都驗證了阿睎真的把上世的事都忘記了。
「不過記得一陣要同阿彤道歉，始終佢係女仔，受軟唔受硬㗎。」阿超語重心長的說，阿睎卻只是支吾以對。
他們在煲仔飯勝地下車，直奔阿彤所在的店，阿睎和阿彤再次見面，兩人都有很多話想說，但偏偏都不想做先開口的那一個，所以只是簡單打招呼後便繼續吃飯，氣氛尷尬得直達冰點。
萬萬想不到，先開口打破冷場的是Rose，他真心替兩人高興︰「I thought你兩個咁耐唔出現係畀佢哋捉咗，luckily你哋無事。快啲叫嘢食，今餐我請。」
阿睎聽到後很是不滿，決定點多點不同食物報仇，而阿超則點了一個飯後，將剛才發生的事完整講一次，Rose聽完後臉色一沉，鄭重的說︰「今晚我哋有排煩，食飽啲，可能呢餐係last supper。」
眾人不解，但Rose並沒有多加解說，直到阿超發現阿睎背上貼了一塊不起眼的貼紙，再查看自己的背也有相同貼紙，這才恍然大悟。
「仆街！唔怪之得我哋咁輕易逃走到，原來佢哋喺我哋身上裝咗追蹤器。」阿超連忙把阿睎和自己身上的貼紙撕下丟出街外剛才駛過的車上。
「It's too late，佢哋已經到咗，食埋餐飯再分頭逃走，撇甩佢哋之後喺酒店等啦。」Rose淡定冷靜的說，看來這種情況他已經歷過很多次，已經駕輕就熟。
他們像沒事般邊吃邊說笑，而被騙的那幫人已經坐滿旁邊的桌子，對他們虎視眈眈，隨時準備動手。
「買單之後我行後門走，你哋規劃好路線未？」Rose貼心的問，而他們也已經想好逃跑路線，之後Rose便放下飯錢再召來侍應收取，自己藉言去洗手間然後往後門走去。
阿超三人也同時站起，光明正大往大門走去，奇怪的是那幫人始終沒有動作，只是坐下來吃飯。
「點解會咁？佢哋唔追我哋任何一個，任由我哋逃走嘅？」阿彤不解。
「弊，我諗我哋中咗計，快啲跟我嚟。另外錢我哋收齊哂未？」阿睎邊問邊往後門跑去。
「未，一個崩都未收過。」阿超好像已經意會到發生什麼事，跟着一起跑去，而阿彤雖然還未知發生甚麼事，但還是跟着跑去。
「今次真係貪字得個貧，我哋唔記得咗佢係一個大騙子……」阿睎說，但在後門已經找不到Rose的蹤影了。
「做咩呀？唔係去酒店咩？」阿彤問。
「返去都已經無意思，唔會再見到佢，我哋中咗佢計喇。」阿睎一拳搥在牆上說。
「你講得啱，佢作為職業騙子，我哋都畀佢呃咗，就算去到酒店都唔會揾到佢，直接去機場都可能仲有機，但又唔確保佢係咪真係即走，定經水路、陸路去其他地方。」阿超垂頭喪氣道︰「而且我哋都真係畀佢玩到陀陀轉。」
阿彤總算明白了Rose是騙子的事實，但卻不明他如何愚弄他們，於是阿超再加以解釋︰「成件事一開始已經畀佢玩緊，佢一嚟就離間你同阿睎，令到你哋關係破裂，等佢脫身前隨時有個人質喺身邊，我哋無得亂嚟。然後到交收之後我哋畀人捉咗，我估都係佢啲人做，基本上畀佢呃嗰個人從來都只係一個人，唔係一個組織，而山上嗰啲都真係行山人士，餐廳嗰啲都真係食客，貼紙都真係貼紙，無咩追蹤功能。」
「唔係喎，」阿彤表示不同意，提出了異議︰「但嗰啲山友同食客真係啤住我哋㗎喎，如果係普通人又點會咁樣？」
「係誤導。」阿超說︰「一個簡單嘅心理控制技巧，佢一直嘅鋪陳，令到我哋入咗佢圈套，佢講咩我哋都會腦補當真，你要知人腦其實真係好易呃。」
「你試吓而家返入餐廳，睇吓啲食客仲有無用監視嘅眼光望住你。」阿睎說。
阿彤耍手擰頭連忙說不，接着不甘心的說︰「咁樣畀佢呃我真係唔鋸，我一定要教訓佢，你哋有無咩計仔？」語畢望向阿超和阿睎，但他倆一時之間也想不到辦法。
此時，機靈的阿彤偷笑了，洋洋得意的對他們說︰「你哋無計，但我有噃。」他們聽到後也很吃驚，連忙追問，起初阿彤並不想多說，但經他們一番吹捧後，她終究還是忍不住透露了。
「其實喺機場嗰時我已經一眼就睇穿咗佢，佢呢啲男人，我年終都見唔少，所以先故意扮中佢圈套，睇吓佢葫蘆入面賣咩藥，你哋仲誤會我，我真係好嬲！」阿彤故作生氣，嚇得阿超和阿睎連忙下跪道歉。
「我喺佢身上放咗個tag，根據地圖顯示，我估佢去緊機場。」阿彤邊說邊召車，準備動身前往機場。
「一陣有咩計劃？」阿睎問。
「你哋咩都唔駛做，甚至唔駛出現，我會拎返所有我哋應得嘅嘢。」阿彤胸有成竹，阿超和阿睎便決定讓她放手去做，自己只在遠處觀看。
眾人趕到機場，根據tag的定位，終於找到Rose。此時的Rose看到阿彤並未顯得很驚訝，相反還稱讚她︰「Well，個委託已經完咗，但你都揾到我，我都要讚讚你，你果然係最smart嗰個，而家你打算點？Leave with me？」
阿彤笑着說︰「唔好喇，容乜易下次又畀你賣甩，我唔會次次都揾得返你嘅。」
「You're so funny，你比嗰兩條仔都醒，點會揾唔到我呢？Come with me，同我一齊你會有更好嘅未來。」Rose繼續利誘阿彤，但她依然不為所動。
「我諗我最好嘅未來已經出現咗，唔會有更好。」阿彤意志堅定，還叮囑Rose道︰「唔好話我唔提醒你，你今次真係招惹錯人，聽佢哋兩個講，同你交易嗰條友來頭堅唔細，黑白兩道都識人，佢一早已經喺海陸空三路發哂消息，你小心啲。」
Rose聽到後大笑說︰「想以其人之道還治其人之身？無用嘅，我唔會中計。」
阿彤也笑了，詭異的笑聲伴隨着她身影的遠去而漸漸消散，留下Rose一人在疑神疑鬼，而正好此時有一班人朝他的方向走來，他雖然對自己很有信心，但為了安全起見，還是迴避了。
「乜唔係唔驚咩？」Rose被身後突如其來的一句嚇得跳起，回頭一看發現是阿彤才定下心來。
「我無驚，只係咁啱要行嚟呢面啫。」Rose嘴硬說。
「唔驚就最好喇，你睇吓嗰班人，我估應該係你一直以嚟嘅仇家，因為我上網揾到一啲關於你嘅嘢，你呢程機小心啲，拜拜。」阿彤邊說邊指着遠處的一班人，正好他們有部份人正看過來，Rose表情有輕微變化，但還是強逼自己鎮定。
此時又有數個人從不同方向朝他的所在處走近，他的危機意識告訴自己這趟旅程會很危險，於是追上阿彤要求她保護，怎料阿彤一口拒絕，Rose也慌了。
「I am begging you，呢次你真係要help我，唔係我實死梗……」Rose苦苦哀求。
阿彤以勝利者的姿態微笑着說︰「咁呢單算係新委託，連埋舊嗰單，一次過找咗數先。」
Rose遲疑了，阿彤立即察覺到，於是向着人群大叫︰「喂，喺呢度！」Rose立即摀着她的嘴，乖乖掏出錢並問︰「要幾多？」
阿彤回答︰「你覺得你條命值幾錢？你估佢哋每人願意出幾錢嚟揾你？」
Rose不發一言，拿出電話把銀行的積蓄都轉到阿彤戶口，阿彤確定收妥後便離去，Rose連忙抓住阿彤說︰「收咗錢就想走？」
此時，之前一直在遠處等待的阿超和阿睎也都出現了，阿睎率先開口︰「你仲未明？呢招你唔係最耍家咩？」
「你再望吓周圍啲人，你覺得佢哋真係望住你咩？」阿超心裏也暢快多了。
Rose再看看四周，剛剛狠狠盯着自己看的人，現在的焦點都不在他身上，是臨時演員嗎？
「Misdirection，你最叻嗰招，覺得點？我學唔學到精粹？」阿彤得意道。
「可惡，你呃我？快啲畀返啲錢我！」Rose憤怒了，一拳朝阿彤打去，阿超反應快擋開了，阿睎以重拳還擊，一拳便把Rose擱倒。
Rose眩暈了一會，眼白白的看着他們三人帶着錢揚長而去。
阿彤和阿睎也和好如初，只是在阿睎心入面，阿超已由當初的情敵，變為經歷生死的好兄弟，佔據了一個重要地位。