男男路: 難道我可以扭轉宿命重遇你一次
難道我可以扭轉宿命重遇你一次
在高大的榕樹上，有一大一小兩個黑影在對峙。突然，一陣微風吹過，吹落了數片樹葉，大黑影亦趁此機會率先行動，撲向小黑影。然而，小黑影反應敏捷，輕巧迅速的跳到另一樹枝上，令大黑影撲了個空，差點跌落地。
「好惡，捉唔到你我跟你姓！」大黑影氣憤的說。
小黑影也嘲弄般回應︰「喵。」
大黑影調整好姿勢，再次向小黑影跳去，而小黑影也決定正面迎戰，跳向大黑影。
兩強相遇，必有一傷。刀光劍影、目露兇光，勝負在這一瞬間便已定下。
大黑影由數米高的樹上跌下來，摀着臉上新鮮滾熱辣的數條血爪痕，而小黑影則以勝利者姿態，屹立在樹枝上，高高在上的俯視手下敗將。
「你隻衰貓……」大黑影怒道。
「作死你呀，咁樣鬧我個女？又話阿超乜都得，點知捉隻貓都做唔到，無鬼用！」一個中年肥婦喝罵道。
大黑影──阿超連忙站起身拍拍灰塵，對中年肥婦恭敬蝦腰道歉，然後爬上樹再次嘗試捉貓。
「乖女，快啲落返嚟啦，媽咪帶咗你最愛嘅罐罐嚟呀！」中年肥婦在樹下喊道。
「無用㗎，我已經試過哂，呢招唔work。」阿超邊說邊爬近小貓，將牠逼到絕路，自言自語道︰「周秀娜，你今次仲唔死？」
阿超縱身一躍，小貓眼見無處可逃，發出最後有如嘲諷的「喵」聲後，便直接向中年肥婦懷內跳去，中年肥婦發脹的身軀就如氣墊般，令小貓毫髮無損、安全着陸，而阿超則再次撲空，又再墮地一次。
「好惡呀你隻……」本身怒氣沖沖的阿超被中年肥婦厲了一眼，立即轉口風︰「可愛嘅主子，咁乖識返主人身邊，唔好再四圍走啦！」小貓鑽進中年肥婦的懷內，懶洋洋的睡着了。
「楊小姐，隻貓而家就順利咁返咗去你身邊，咁之前我哋講好嘅酬勞，都方便而家畀埋我啦可？」阿超擠出燦爛的笑容。
「畀咩呀畀？而家係阿女自己返嚟我度，唔係你捉佢返嚟，我點解要畀？你都做唔到嘢，仲想呃我包米？」楊小姐理直氣壯道。
阿超一時間對不上嘴，只能吐出數隻字︰「咁唔啱數喎……」而楊小姐一於愛理不理，轉身就離開。
「喂，死肥婆！」突然有一個看不過眼的路人亂入，對着楊小姐罵道︰「人哋無功勞都有苦勞，唔係佢爬上去幫你捉隻貓，隻貓會返去你度？講吓道理好喎！雖然唔知你哋deal咗啲乜，但一定係有限錢，你咁cheap都唔會畀得多，佢撻咗落嚟兩次，醫藥費都要啦！」
說出此番說話的是一個梳着逗號頭的白淨男生，阿超未及看清他的臉，其他圍觀的人便你一言我一語的走近，圍着說楊小姐的不是。
「你估你人多我就驚你呀？包米重我唔拎返去，你要你自己執啦，我當畀乞兒，哼！」楊小姐說完便把五公斤米丟下，然後急步離開了。
阿超連忙上前取回酬勞，然後起身想跟逗號男道謝，但他已悄無聲息的在人群中消失了。
「下次見到佢一定要同佢講返聲唔該先得。」阿超心想︰「不過佢身影有種熟悉嘅感覺，唔通……」
「Twinkle twinkle little……」此時電話響了，是Michelle來電，阿超立即接聽︰「喂，點呀俏秘書，你又知我啱啱搞掂單job嘅？」Michelle是他請的秘書，替他安排行程和處理雜務，是他的得力助手。
「老闆，好難唔知喎，你而家咁出名，條片已經瘋傳，啱啱已經有幾個friends share畀我啦，啲網民仲叫你捉貓俠添，睇嚟嚟緊會有好多捉貓嘅job，你駛唔駛整返套捉貓戰衣？」Michelle淘氣的說。
「死靚妹咁串？信唔信我炒咗你？」阿超最常用這句回應她。
「係炒就快啦，記得補返足啲錢畀我喎，等我可以揾返份正常嘅工。不過炒咗我，你仲點揾到人同你癲，肯唔一定用錢出糧都制？」Michelle一語道破，把阿超按在地上摩擦。
「講笑啫，唔駛咁認真嘅，世間只有你好嘛。係喎，啱啱拎到包米，今晚可以有飯開，唔駛再食麵。」阿超興奮地說。
「咁開心？今晚一於開埋上個月單送清水同蠟燭job得嚟嘅豆豉鯪魚賀一賀佢啦！」Michelle說完便掛斷電話，而阿超也加快腳步回萬事屋。
「Twinkle twinkle……」鈴聲又再響起，阿超看都沒有看便接了︰「點呀秘書大人，係咪要斬料加餸？」
「吓……？」電話傳來的是一把男聲，他不好意思的說︰「唔好意思，請問係咪乜都得萬事屋？」
阿超一聽，知道自己出糗了，連忙道歉道︰「唔好意思，我啱啱以為係我同事打嚟。呢度係乜都得萬事屋，請問有咩幫到你？」
「唔緊要，阻住你食飯唔好意思，我都有話直說，我叫阿瞳，有嘢想委託你哋，唔知你哋接唔接？」阿瞳說。
「我哋乜都得萬事屋專為大眾解決問題，乜都得，乜都接得，乜都做得，你講啦。」阿超經常把服務宗旨掛在口邊。
「我想請你哋幫我揾一個人。」阿瞳說。
「尋人？」阿超聽到後立即興緻勃勃，連忙答應，並相約他到萬事屋詳談。
「我返嚟啦！」阿超甫進門便大叫，Michelle立即出迎──那包米，然後笑罵道︰「慢吞吞，想餓死人咩？」
「喂，Michelle，唔好煮飯住，幫幫手執執個場先，一陣有客。」阿超邊說邊收拾混亂的廳。
「咩客咁巴閉，要你咁隆重其事，特登執個場？」Michelle半開玩笑問。
「呢單唔同呀，尋人，大單嘢嚟。」阿超已經在腦內幻想出一段媲美電影的刺激冒險。
「Dee……dee……」門鈴在此時響起，阿超立即應門︰「嗨，阿瞳，入面請坐。」說完做出請進的手勢。
阿瞳禮貌的說聲「唔該」後便進內，阿超跟在他身後，而伴隨着他身後的那獨特的古龍水氣味亦勾起阿超的回憶。
「記住呢隻味，我知你好鍾意，下世我都會繼續用呢隻味。」一個民初衣着的女子在床上奄奄一息，臨約前吐出最後一句︰「笑返先啦，我只係行先一步，我哋下世都會再遇到再一齊㗎嘛，係咪？」之後便含笑而去。
「喂，老闆，喂喂……」Michelle推了阿超一下，令他回過神來。
「唔好意思，啱先你講到邊？」阿超尷尬的問，但心內卻在想︰「應該係咁啱同一隻味啫，畢竟呢種只係好普通嘅花香味，唔好亂諗。」
「唔緊要，我啱啱話估唔到咁有緣，竟然撞返你。」阿瞳說︰「見到係你我就放心，知無揾錯人。」
阿超看着阿瞳，上下打量一番，看着他那俊美得像女生的臉，配上那逗號頭，頓時認出他就是剛剛替他出頭的人，與此同時，亦有種莫名的親切感應運而生，這感覺有點微妙，好像很熟悉，但又有點陌生。
「我想揾嗰個人其實我都唔知係咪真係存在。」阿瞳凝重地說。
「點解咁講？」阿超和Michelle異口同聲道。
「因為由細到大佢都一直出現喺我夢入面，佢會有唔同造形，但我感覺到都係同一個人，但我從來都睇唔清楚佢係咩樣，每次當我有機會睇到嘅時候，佢都會化作一縷青煙消散，不過我覺得我係識佢嘅。」阿瞳憶述。
「Ching，你呢個確定唔係夢魔？」Michelle衝口而出，被阿超白了一眼，連忙賠過不是。
「呢單嘢幾有趣，我覺得有三種可能。」阿超開始認真起來︰「一，巧合。只係咁啱得咁橋，人係一種好常欺騙自己嘅生物，成日會畀自己嘅感覺同記憶混淆，而夢又係日常生活嘅延伸，正所謂『日有所思，夜有所夢』，所以你覺得熟悉，都係虛假嘅感覺；二，撞邪。可能係有隻鬼一直纏住你，要喺你身上得到某啲嘢；三，前世記憶。你夢入面係你嘅前世記憶，因為你不停輪迴，所以會有唔同嘅造形，至於點解感覺係同一人，因為『百世修來同船渡，千世修來共枕眠』，大概佢係你嘅命中注定，所以大家一齊經歷緊。」
阿超說到這特意停下來看一看阿瞳的反應，而阿瞳也沒有令阿超失望，露出一副茫然的表情，最後阿超補上一句︰「你願意相信邊樣？」
整個空間變得安靜了，每一下呼吸聲都被無限放大，大家都等待阿瞳回答。一分鐘、五分鐘、還是十分鐘？時間不知過了多久，終於他開口了︰「我個人理性科學啲，巧合應該係最合理嘅解釋，但我心同直覺要我揀前世記憶，所以拜託你幫我揾呢個名中注定出嚟。」
「無問題，Michelle，準備合約。」阿超一邊命令Michelle辦事，一邊跟阿瞳說︰「放心交畀我哋乜都得萬事屋，保證幫你辦妥，不過之後可能要你畀多啲資訊我哋，合作愉快。」阿超伸出友誼之手，阿瞳也爽快答應︰「靠哂你！」
簽好合約後，阿超讓阿瞳先回家，着他盡可能把所有夢境都寫下，並約好星期六再會面，進行第一次的尋人行動。