【愛情】關於我一覺瞓醒發現喺初戀屋企⋯！: 111. 失敗的滋味

「啱啱做咩當睇唔到我？」浩宜問出令我意料之外嘅問題

「冇呀，我有同你打招呼。」我淡然咁笑一笑，只係想令氣氛冇咁尷尬，「而且見你同同事一齊。」

「哦，咁啱大家一齊收工，本來話去飲嘢，但都係放棄咗⋯」浩宜笑住搖頭，睇起嚟有啲攰，「好攰呀今日，番屋企再飲～」

「嗯⋯」我望咗佢一眼，然後微微點頭，一時間之唔知要講啲咩先叫唔過界，「好⋯」

「好冷淡⋯」浩宜無奈咁望住我，唔係佢婉拒我在先咩，宜家話我冷淡，「心情唔好？」





「一般，冇咩特別。」我聳肩，望住浩宜好似咩事都冇咁，我就覺得鬱悶

「嗯？真係？」浩宜瞇起眼有啲懷疑我，「係唔係呢兩個禮拜太忙所以好攰？」

提起呢兩個星期嘅時候，佢係幾自然？只係一個順便嘅關心，原來佢都知我地兩個星期冇聯絡過，即係佢等緊我主動搵佢⋯

「冇好忙。」我小幅度咁搖搖頭，毫不留情咁駁回佢呢個講法，「你到啦。」

「係喎，原來都番到嚟。」浩宜抬頭向上望眼前嘅住宅大廈，「都冇留意添～」





「番去休息啦。」我微笑道

「今日你好似一直心情唔太好，好似小朋友扭計。」浩宜笑住伸手摸一摸我個頭

小朋友，對佢嚟講我細過佢，所以喺佢眼中我係小朋友，但明明只係區區四年、明明我可以有能力保護佢，但佢下意識會將我當小朋友咁看待⋯

「可能啦⋯」我提手捉住佢隻手，將佢隻手從我嘅頭頂拎番落嚟

我冇放手，默默咁捉住佢嘅手腕；佢望住我嘅時候，眼神冇一絲嘅不解，亦冇掙脫⋯





「我唔係會死纏爛打嘅人⋯」我緩緩道，然後鬆開手，「你嗰日講嘅嘢，其實我都明⋯」

浩宜連同佢嘅微笑都愣咗一下，好似我直接拆穿咗佢想極力無視嘅事一樣，冇得若無其事落去

「所以，你快啲番去啦⋯」我都可以感覺到自己喺講呢句之前，咬住牙根嘅力度有幾大，係我鼓起勇氣後先講出口嘅說話，「再見⋯」

唔需要等佢親自開口，我都可以知道我同佢嘅結果係bad ending⋯「再見」兩個字，係唔係代表我選擇咗放棄⋯？但似乎我冇咩勝算

浩宜輕皺一下眉頭，表情有啲複雜，或者係意外我嘅投降，我好想再解讀多啲佢內心嘅想法，想再掙扎一下，想再比少少希望自己，都係唔想放棄住⋯

我同浩宜四目相對，佢咩都冇講，一句說話都冇，似乎係佢最後嘅回答；我講咗，我唔會死纏爛打，就真係唔會⋯

「好好休息。」我抱住失敗嘅感覺微微點頭，失敗嘅滋味真係唔好受

我鬆開浩宜嘅手，喺轉身走之前望多佢一眼，佢望住我嘅眼神我都唔知道我可以點解去解讀，我想有少少希望，但我又唔想自己誤解太多⋯





今次，我真係轉身走，鼓起勇氣咁轉身走⋯

⋯

⋯

⋯

「好飽呀～」我摸住我脹起嘅小腹，因為難得出嚟食晚飯所以食得太飽，「又要減肥啦⋯」

「都唔洗減啦，已經好瘦啦。」阿立同我拉開少少距離打量我，「再減就得番骨啦～」

「哦～咁識講嘢嘅？」我將我同阿立之間嘅距離縮番短，親密咁右手拖住佢嘅手，左手挽住佢嘅手臂，「咦⋯？」





隔離嘅櫥窗吸引咗我嘅目光，我拉住阿立行過去睇

「想買？」阿立望到櫥窗入面放住嘅嘢嘅時候，即刻露出明白嘅樣

喺櫥窗入面放住唔同款式嘅對戒，係一間專買婚戒嘅專門店；唔知點解我一下就比佢吸引咗，可能因為又有射燈照住，又特別顯眼

「係買都唔係我買啦～」我望住唔同款式嘅戒指，心入面好似都已經挑選緊中意嘅款式

「你中意咩款？講定先。」阿立輕嘆一口氣之後認真咁望住櫥窗入面嘅婚戒，「中意誇張啲？閃啲？簡單啲？邊啲？」

「簡單啲，呢幾款都幾好睇～」我指款其中三對嘅款式，「唔中意太閃太高調⋯」

「Okay，知啦。」阿立點頭

望住佢認真睇戒指嘅樣，心入面覺得好踏實，唔係只有我一個人諗緊以後，佢都有放喺心上面





「識揀㗎啦～」阿立嘅目光仍然停喺櫥窗入面嘅戒指

「好呀。」我側住頭定睛望佢，喺見到佢嘅認真嘅時候，我都會忍唔住嘴角上揚

同另一半討論未來，唔係一件充滿幸福感嘅事咩？代表住大家嘅目標一致，對未來嘅家有所期盼

「陣間去唔去買雪糕番屋企？好似食晒，要入貨啦。」阿立擰轉頭望我

「都好喎～最近喺網上見到出咗新嘢，想買嚟試～」我諗起最近好似出咗新口味嘅雪糕，即刻覺得好期待

「你成日都睇到有新嘢出嘅⋯？」阿立有啲無奈，將行喺路邊嘅我默默咁換番入去埋邊

行到超市門口嘅時候，我小跑過去拎咗架手推車，對於自己咁快手拎咗架車，我有啲沾沾自喜咁擰轉頭望向慢慢行過嚟嘅阿立





見阿立行到過嚟，我就退開兩步等阿立推車，我就可以騰出手揀雪糕啦～

我搶先一步去到雪櫃前面，睇咗想食咩雪糕先，睇中就直接打開櫃門拎

「有冇你想試嗰隻？」阿立推住車行過嚟，望一眼我手上拎住嘅兩盒雪條

「冇⋯」我扁起嘴搖一搖頭，「早知去7仔睇下啦⋯」

「宜家去囉。」阿立拉住購物車退後兩步，「都唔係好遲。」

「唔要⋯去埋就會遲番到屋企啦！個節目陣間就播啦！」我再拎咗兩盒雪糕擺入車入面，「我想番去睇～」

「你決定啦⋯」阿立無奈咁彎腰壓喺車嘅扶手上面，「洗唔洗食薯片呀？一次過買埋啦，你中意食嗰隻番咗貨啦。」

「唔洗買住都可以⋯」我閂埋雪櫃嘅門，行到阿立嘅身邊，「屋企仲有薯片。」

「Okay～」阿立調整好車嘅方向，就推住車去收銀處比錢

我輕力咁摵咗阿立嘅手臂一下，只係偷偷地曳一下，我一摵佢，自己都忍唔住偷笑

「小學雞摵我做咩？」阿立冇縮手，唔知係唔係忍住咗痛感

「你就小學雞！」我又輕摵多一下，我又點會捨得大力摵佢，「唔係個個都可以見到我咁小學雞㗎～」

「唔⋯都係嘅。」阿立諗咗一諗，點一點頭

任性係被愛嘅證明，因為知道有人會縱容佢嘅任性，雖然太任性會引起反效果




IG Link: https://www.instagram.com/nd_cotttoncandy/?hl=zh-tw