【愛情】關於我一覺瞓醒發現喺初戀屋企⋯！: 108. 擋箭牌
「嘩，多謝晒～」我冇感情波動咁感謝佢啲好意，「要咩呀？」
「特飲啦～」趙梓穎掀一掀餐牌，睇咗兩眼，「Thank you～」
「你今日冇堂咩？咁得閒過嚟？」我問行到吧枱前坐低嘅趙梓穎
「搞錯呀卓思齊！」趙梓穎皺起眉頭不滿咁抱怨起嚟，「我啲堂同你一樣㗎先生！上咗成個sem都唔知有冇搞錯呀！」
「我點知你有冇其他堂要上？」我無奈咁拎咗個特飲杯落嚟
「今日你企呢度呀？」趙梓穎問道
「唔係呀，同事去咗食飯。」我講道
趙梓穎突然間靜咗落嚟，我下意識就抬起頭去望，一望佢就見到佢用手機對住我，佢唔係要影上IG呀嘛⋯？
「喂喂喂，小姐你做緊咩呀？」我側住頭、一隻手叉住腰望佢
「開心share下囉～」趙梓穎笑道，「你繼續啦～」
要實際咁講起幾時同趙梓穎識嘅話，其實我都唔太記得，我唔太清楚班上嘅事，只係知道佢同班上面嘅女仔好似唔係幾夾
某一次做group project同咗我地一組，然後佢就埋咗我地男仔呢堆，不過我又冇咩所謂嘅，佢唔係啲黑人憎嘅人
睇嚟趙梓穎真係po咗喺story，因為佢一放低手機，我即刻就feel到手機震咗下，應該係IG嘅通知
「你po咗啲咩喺story⋯」我無奈咁問佢，然後幾沖好嘅特飲連埋杯墊放喺佢面前
「po咗你嘅英姿。」趙梓穎同其他嚟cafe嘅女仔一樣，一定要同特飲打卡
「多謝晒⋯」我無奈咁擰轉身洗一洗手
「最近成日都唔同我地食lunch⋯」趙梓穎忽然又抱怨我，「約咗邊個食lunch要拋棄朋友啦？」
「鬼有成日？間中一次咋嘛。」我反咗個白眼
「幾時一齊食飯？」趙梓穎問道
「叮鈴鈴鈴～」cafe嘅門推開，我望咗門口一眼，原來係知珩食完飯番嚟
「唔係呀，我已經冇理佢囉！」浩宜跟喺知珩嘅身後入嚟，我同佢對上視線，佢隨即露出笑容：「嗨～」
「嗨⋯！」我有啲意外今日會見到佢，我感覺到我嘅心情都寫晒喺面度，「原來你地約咗食飯呀⋯？」
「係呀～」浩宜坐低喺吧枱前面，我對眼都要痴住喺吧枱移唔開，「知珩話我知你今日有番工。」
「哦係呀⋯今日唔洗番學。」我微微點頭，餘光見到趙梓穎仲喺度，我就唔想咁明顯
「卓思齊，你份assignment做完未？今晚截。」趙梓穎邊睇手機邊問我
「吓？我做完交埋添啦！」我講道，「你未交咩？」
「我交咗啦⋯」趙梓穎開咗交功課嘅link比我睇，佢前日已經交咗，「你估我係你？」
「你飲唔飲嘢呀？」我行去問浩宜，一行到佢面前我就忍唔住緊張起嚟
「好呀，要杯latte。」浩宜毫不猶疑道
「開心啦你，今日又放假啦。」知珩行到落單機前落單，然後轉身行番去咖啡機前
「開心呀～打工人嘅快樂就係放假，忙咗成個月，放番日都好正常啫係唔係呀？」浩宜笑道，伸手撥一下頭髮，「順便嚟探下你唔好咩？」
明明我知道呢句係對知珩講，但浩宜講嘅時候，我都係會忍唔住心跳加速；就算係一個微笑、撥一下頭髮，我都覺得個心要跳出嚟咁濟
我冇去諗我係唔係真係咁中意佢，但好似真係咁中意佢⋯一見鍾情我本來都唔信，但宜家又覺得可以係一回事
「我走啦，聽日見。」趙梓穎幾飲完嘅特飲放喺枱上面
「哦，聽日見。」我微微點頭
我行出去要執枱嘅時候，趙梓穎離開座位，佢望咗浩宜一眼之後擰轉頭望我，同我揮揮手之後就推門行出去
「叮鈴鈴鈴～」
「你朋友呀？」浩宜望向我問道
「嗯，大學同學。」我拎住特飲杯行番入水吧
「追緊你？」浩宜好奇咁問
「吓？唔係唔係！我地只係朋友。」我好肯定咁回答浩宜，唔想佢誤會啲咩，「真係朋友。」
「哦～」浩宜擺出恍然大悟嘅表情，但我點睇都係唔信我嘅表情，「真係朋友～」
「卓卓，幫我喺櫃度拎箱新嘅外賣杯出嚟。」知珩對我講道
「哦好呀。」我即刻轉身行去廚房，捧住一箱新嘅外賣杯出嚟，「擺邊呀？」
「拆出嚟擺番上去，留⋯一筒喺度啦。」知珩思考咗一陣，就指一指櫃同咖啡機隔離嘅紙杯架
「好。」我放低個箱，代知珩爬高爬低，咁我都明嘅，粗重嘢我做都好正常
「你做咩恰佢？」我聽到浩宜問知珩，「你啱啱先食完飯休息完，做咩點人做？」
「我邊有恰佢？份內事。」知珩用無奈嘅語氣回答，「你唔洗咁維護佢。」
知珩咁樣一講，我就感覺到自己面一紅耳一熱，然後偷瞄浩宜一眼
「我仲要靠思齊幫我擋嗰個垃圾ex㗎～」浩宜見我望佢，佢就托住下巴望我
叫名有啲太犯規，心跳得太快，於是手一震，手上拎住嘅一筒紙杯即刻「啪」一聲跌落地
知珩頓時擰轉頭望我，我即刻有少少慌張咁彎腰去執，然後扮到冇事發生咁繼續擺我要擺嘅嘢
「你咁識搵人做擋箭牌呀⋯」知珩輕嘆一口氣，「但你個ex都唔係啲講兩句就縮嘅人⋯」
「思齊會保護我㗎嘛～」我嘅餘光見到浩宜望住我，我自然而然咁就將視線移向佢，「係咪？」
「嗯⋯」我唔敢同佢對視，只好將專注力都放喺眼前嘅工作然後微微點頭
IG Link: https://www.instagram.com/nd_cotttoncandy/?hl=zh-tw