【愛情】關於我一覺瞓醒發現喺初戀屋企⋯！: 106. 危機意識

⋯

⋯

⋯

喺我地嘅休息日，睜開眼嘅時候，我見到知珩仍然瞓得好冧，好似都冇察覺到已經係朝早一樣

身上著住鬆身嘅T-shirt，本來就因為唔係佢著開嘅碼數而鬆嘅衫，經過瞓一晚轉左轉右之後，衫領都差唔多移到露咗膊頭出嚟





我輕手輕腳、靜靜咁幫佢將衫領拉番上去，遮住喺鎖骨同膊頭上粉紅色嘅痕跡

「唔⋯」知珩忽然皺起眉頭，然後向我嘅方向挪動少少

琴晚先沖好涼嘅我一早就喺房，打算喺知珩番嚟之前再睇一陣電腦

「我沖完涼啦～」知珩行入我房嘅時候，仲要特登通知我一聲

「好呀，咁你想⋯呢件衫⋯」我擰轉身望佢嘅時候，見到知珩一個沾沾自喜嘅表情，佢耷低頭望一望自己身上嘅衫又望一望我，「你件新衫幾好睇喎～」





我嘅衫我點會唔認得？特別係著嚟著去都係嗰幾件嘅屋企衫，我托住下巴打量佢，佢係有意要咁做，仲要擺出一個等我讚佢嘅表情

「對我唔友好呀⋯」我輕嘆一口氣，起身走向知珩

喺我行到佢面前嘅時候，知珩啱啱好將房門閂埋，我捉住佢嘅手腕，佢抬頭定睛望住我

「危機意識有啲不足？」我伸手將佢嘅衫領拉好，若隱若現嘅誘惑最致命，「我都覺得，有時做大人係比較好⋯」

唔⋯不過我琴晚嘅自制力都係唔錯，只係留咗少少痕跡，畢竟一嚟就咁得寸進尺好似唔太好





我已經瞓唔番，既然係咁就起身開電腦執下相，等知珩真係醒嘅時候先再食早餐

我一直坐喺電腦前面工作，以前中意影相，最後做嘅工都係做攝影師，只係冇咗當初嗰份純粹嘅喜歡

當中意嘅嘢變成金錢嘅樣嘅時候，你會發現你中意嘅嘢會開始變樣，由令你放鬆嘅興趣變成令你煩惱嘅事

不過生活就係咁，生活唔可能盡如人意，細個嘅時候大人話努力讀書先可以做到自己想做嘅嘢，大個咗先發現有啲嘢唔係努力讀書就可以解決

放喺枱頭嘅手機一震，我拎起望一眼，Ella將佢最近做緊嘅project send咗過嚟比我：「我整咗兩個version，幫個眼睇睇邊一個好啲～」

呢次嘅細project我同我嘅上司推薦咗Ella，佢嚟咗公司都大半年，我覺得可以比佢試下自己做一份project，唔洗跟喺我手下做嘢，都算係比機會佢

Ella嘅能力唔差，只係懶，唔想做又唔願花時間做，所以之前一直冇比佢試獨立跟project嘅機會，不過宜家佢終於都似番個有責任心同上進心嘅攝影師

「第一張嘅色調柔和啲，視覺效果舒服啲；第二張就同主題配合啲」我睇完之後真係認真回覆佢





「咁我再執一執，試多幾個再睇睇啦～」Ella回覆

「唔⋯早晨⋯」忽然一雙手從後攬住我嘅膊頭，我稍微回頭，知珩原來都已經起咗身

「早晨，瞓醒啦？想食咩？」我將手機放低喺枱上，手搭喺佢攬住我嘅雙臂上

「食唔食米線？突然好想食⋯」知珩迷迷糊糊咁講，睇嚟床氣都未完全散晒，「叫外賣送上嚟？」

「好呀，你都諗好晒啦⋯」我無奈咁拎起手機打開外賣app落單，「去刷牙洗面啦。」

「同邊個傾緊計⋯？」知珩指住我嘅手機問

「同事。」我冇咩要隱瞞，直接就轉咗去啱啱WhatsApp嘅頁面比佢睇





「係唔係就係上次同你一齊嗰個女同事？」知珩問起嘅時候，我下意識就擰轉頭去望佢一眼

「哦係呀。」我微微點頭，「佢問我嘢，我答番佢咋。」

「哦，我只係隨口問下。」知珩鬆開手，唔太在乎咁聳肩，然後行咗出去

「呷醋？」我離開書枱前嘅位置，行到去廁所門前，靠住門框望住洗緊面嘅知珩

「冇呀～」知珩望住鏡中嘅我笑道，轉身將水彈喺我面上，「同事嘛，而且你都拒絕咗啦，當人地聽唔明定當我聽唔明？」

「你咁大方嘅⋯？」我心入面略有不滿，雖然有自信係好事，但我都想佢緊張下

我行到知珩身後從後攬住佢嘅腰，將下巴抵喺佢嘅膊頭上，佢伸手撥一撥我今朝早梳過嘅頭髮

「冇大方，我好小氣。」知珩刷完牙之後擰轉頭望我，下一秒轉身面向我之後直接踮起腳尖錫我





知珩好輕，我好輕鬆咁就將佢抱起，知珩即刻捉實我膊頭唔鬆手；我直接行番房，將佢拋低喺床上

「一大清早唔可以⋯」知珩嘅屁股坐到落床嘅一刻，佢即刻向後挪，「節制啲⋯」

雖然佢口喺咁講，實際上佢冇太用力咁反抗，不過都真係，一大清早，就應該節制啲

「節制。」我緩緩點頭，伸手輕捏佢嘅臉頰一下，「我去做埋啲手尾先。」

「Okay～」知珩比咗個okay手勢，我行番去書枱坐低

我擰轉頭望知珩一眼，佢已經直接灘番低喺床上面，又真係完全唔避忌⋯

「呀～好肚餓呀許翊瑜～」知珩好似用盡力量嗌出嚟一樣





「知啦知啦～落咗單啦～等多陣啦～」我無奈咁笑，如果話覺得我會太縱容佢，咁我都唯有承認我會係

⋯

⋯

⋯

我坐喺lecture hall嘅後排，坐喺後面邊恰眼瞓邊聽書；唔知點解今個sem咁黑仔，唔係8半就係9半堂，唯一可以番晏嘅當放9半，夜晚9半！

「救命⋯我就嚟瞓著⋯」趙梓穎坐喺我隔離打晒喊露，就嚟流眼水

「阿銘已經瞓咗。」我望向我嘅左邊，阿銘已經直接放棄咗掙扎，直接伏喺度瞓著咗

思淼今日揀咗逃學，直接冇番嚟⋯會唔會太過分？

只有我同趙梓穎仲死撐緊，忍住睡意繼續聽書，不過我嘅大腦已經就嚟死機轉唔郁⋯

「喂！落堂啦！」

「嗯⋯」我感覺到有人一直捉住我嘅手臂搖，我抬起頭，即刻下意識咁向後縮咗一下，「嚇死人咩哄咁埋⋯」

「嘖⋯我好心叫醒你呀！仲埋怨我⋯」趙梓穎對我反個白眼，然後繞過我伸手拍阿銘，「醒啦！」

「落咗堂啦？」我望一望周圍，呢一下先反應過嚟其他人好似都已經走晒

「落咗啦⋯你見唔到人都走晒咩？」趙梓穎執緊佢枱面嘅嘢，將iPad收番入袋




IG Link: https://www.instagram.com/nd_cotttoncandy/?hl=zh-tw