【愛情】關於我一覺瞓醒發現喺初戀屋企⋯！: 91. 明知故問
「哦⋯我記得啦～」我即刻記得邊個，佢有一排冇嚟，都唔太記得佢咩樣
「你地係⋯」女同事望向阿立嘅時候，佢嘅表情有啲微妙
「哦，我地一齊住。」阿立冇講得好清楚，只係好簡單咁講咗一個事實，不過呢一句令人好容易有暇想
我望住企喺佢隔離嘅女同事嘅笑容微微一怔，眼入面嘅光即刻黯淡落嚟，呀，我好似發現到啲咩不得了嘅事⋯
「哦，係呀⋯？」佢用僵硬嘅微笑同微微顫抖嘅聲線回答，「結婚，記得請我⋯」
用最禮貌嘅微笑講出最違心嘅說話，大概係呢種，我係女仔，都明白佢嘅感受
「我唔阻你地啦⋯！我去嗰邊買嘢⋯」佢擰轉身指一指我地嘅反方向，「拜拜。」
「嗯，拜拜。」「拜拜⋯」
我出於禮貌都同佢講聲再見，感覺⋯佢好似有啲難過⋯我望一望阿立，佢就好似咩都冇發生一樣
「借我過橋？」我側住頭望住佢
「冇。」佢搖搖頭，「我地一齊住係事實。」
「你呀⋯無情起嚟，真係一刀捅人嘅弱點⋯」我無奈咁望住佢，我曾經都比佢呢種無情捅咗刀
「唔通要比假希望佢？既然我已經好明確咁知道佢係中意我。」阿立反問我，喺我開口答佢之前，佢對我微微一笑，「對你嘅無情唔係我想，只係太介意⋯」
「係你唔嚟問清楚我。」我不滿咁反駁佢，諗番起都會覺得惋惜，「靖佑叫你記得請佢食飯。」
「我做咩要請佢食飯？」阿立無奈咁問我
「佢話因為多得佢唔同我住，搵咗你頂上，所以你先可以遇番我。」我笑住咁將靖佑講嘅嘢原句覆述一次，「所以你要請佢食飯。」
「叫佢等我地派帖，一次過請。」阿立嘅視線落喺我身上，然後又自然咁移開
「我幾時有話同你結婚？」我抿住唇，將嘴角往下壓，壓抑住笑意
「唔⋯宜家講？」阿立諗咗一下，然後一臉認真咁望向我
「以後再考慮。」我撇開臉唔望佢，不過我又真係冇諗到咁長遠，只要兩個人係相愛，有冇結婚證書呢張紙都一樣
我同阿立番到屋企門口，阿立開門，我先一步行入屋，阿立行喺我後面入嚟將門閂埋
「開燈，好黑呀⋯」我擰轉頭同阿立講，點知比佢剎一個措手不及，「喂⋯！許翊瑜！你嚇邊個呀！」
佢將我攬喺懷中，我抬起頭望佢，透過窗外打入嚟嘅微弱燈光望住佢
「咁突然嚇邊個⋯」我低聲抱怨咗一句，但手都係自動咁搭喺佢嘅腰上
「就係突然間好想攬你⋯」佢耷低頭湊近我耳邊講道
「嗯⋯」我默默咁同意咗佢嘅擁抱，可能因為我冇反抗佢嘅擁抱嘅能力
我抬頭起望佢，佢身上有陣淡香：「你身上有陣香水味⋯」
「可能係Ella噴咗香水，企佢隔離嗰陣掂到。」阿立低聲講道
我心入面即刻不滿，忽然諗起上次我番嚟，佢聞到我身上有阿逸嘅香水味⋯原來嗰種感覺真係好討厭，自己中意嘅人嘅身上有其他異性嘅香水味⋯
我同佢喺微弱嘅光下對望，心入面一股佔有慾湧上心頭，嗰個女同事，係中意阿立⋯睇得出、感受到⋯但，阿立係屬於我
我拉住阿立嘅衫角踮起腳尖，喺佢嘅唇上試水溫一樣輕輕咁錫一下，我望住佢嘅臉，睇佢嘅反應
佢將我攬得更實，將我要呼出嘅氣打斷回送番嚟，柔軟同熾熱嘅感覺落喺我嘅唇上，呼吸喺短時間內變快變急，心跳因為呼吸急速而跳得更快
阿立攬住我一步一步小心翼翼同時，有啲焦急咁推我行，我一步一步向後退，直到行到餐枱邊嘅時候，阿立忽然一下抱起我，將我穩穩咁放喺枱邊坐好
「唔⋯！」我比佢突然冇知會嘅舉動嚇一跳，雙手即刻攬住佢嘅頸
「嚇親啦？」佢嘅語氣好溫柔，係我完全冇辦法抗拒嘅語氣
「嗯⋯」我用喉嚨發音，因為未回到氣嘅關係
周圍嘅空氣都係熾熱，我嘅雙腿微微張開，角度啱啱好係阿立企到嘅位置，姿勢有啲曖昧⋯
阿立主動湊近我，明明我同佢都未回氣⋯但係又急不及待咁想繼續⋯舌尖傳嚟嘅火熱觸感，令我身上每一條神經都繃緊起嚟
本來放喺佢後頸嘅右手輕柔咁摸過佢嘅臉頰，然後沿住佢嘅下巴而下，摸到佢嘅喉核
我嘅指尖掃過佢嘅喉核嘅時候，佢將雙臂間嘅範圍收窄，喉核上下滾動咗一下
我嘅尖指沿住佢嘅喉核再往下，勾到佢裇衫嘅衫領，摸到衫鈕，然後將衫鈕從衫鈕窿推咗出嚟
解咗一粒、兩粒、三粒、四粒⋯直接就摸到佢熾熱嘅肌膚，手由佢嘅小腹往上摸到佢嘅膊頭，將佢嘅衫領撥開
我耷低頭喺佢嘅膊頭上用力咁咬咗一啖，聽到佢咬緊牙關但仍然忍唔住發出低沉嘅聲音
「哈⋯哈⋯」我鬆口，用力咁喘住氣，用力到膊頭到一直縮起又放鬆
「痛⋯」阿立喘住氣，將頭靠喺我嘅膊頭上，右手攬住我嘅腰，左手㩒喺枱邊，「咬我⋯」
「你抵咬！」我幾乎已經係用氣音回答，連我自己都聽得出自己嘅語氣係幾不滿
「嗯⋯」阿立低聲回答，然後抬起頭望我
佢拉開我嘅薄外套，將右邊拉咗落嚟，我成個膊頭同入面嘅吊帶背心露咗出嚟，然後佢喺我嘅膊頭上咬一啖回報我
「呀⋯！」我搭喺佢膊頭嘅雙手用力捏咗佢嘅膊頭一下，「許翊瑜⋯！」
「李知珩，你呢一面，唔準比其他男人嘅見到⋯」佢嘅語氣充滿住警告同霸道嘅意味，「知唔知？」
「除咗你，冇人見過⋯」我柔聲回答，呼吸已經冇啱啱咁喘，「許翊瑜，你都唔準⋯」
「嗯。」阿立點點頭
真係癲咗啦⋯兩個未確認關係嘅人喺度做咩⋯？佔有慾，喺我聞到香水味嘅一刻好似海嘯咁直喺我心底湧出嚟，我討厭佢身上有其他女仔嘅味道⋯
難怪佢可以輕易咁拿捏我⋯喺其他人面前，我都會維護自己嘅形象，一直以一個美好嘅氣質形象喺大家面前
喺佢面前，我嘅所有都已經比佢睇過，佢知道我嘅弱點同軟肋，所以佢要拿捏我係一件輕而易舉嘅事⋯
「宜家，好似好少見到你夜晚喺廳做嘢⋯」我轉移話題問道
「嗯，你冇發現點解？」阿立輕輕攬住我，柔聲問道
「點解⋯？」我不解咁問
「因為宜家，有我接你。」佢用最簡單嘅解釋表明一切
原來平時我收工又或者夜番到嚟，佢都坐喺廳做嘢或者睇電視嘅原因，係因為我未番到嚟，佢等我門
我明白佢嘅意思，心頭一暖，對一個人嘅關心唔洗用口講，用行動去證明就足夠
「哦～我知呀～就係順口問一問。」我側住頭，將臉頰靠喺佢嘅膊頭上
「哦，知又要問，你只係要我比個確實嘅答案你啫。」阿立一眼睇穿我嘅心思，佢嘅懷抱好溫暖，身上嘅味道令我好安心
畢竟親耳聽到答案比自己估啱答案更安心嘛⋯
IG Link: https://www.instagram.com/nd_cotttoncandy/?hl=zh-tw