【愛情】關於我一覺瞓醒發現喺初戀屋企⋯！: 83. 重要嗎？
夜晚收工嘅時候，我一如既往咁同佢地一齊收鋪一齊走，咁慣以嚟都慣咗啦
「行未呀？」阿逸問道，「閂齊嘢啦係唔係？」
「Okay啦。」我行出休息室，望一望水吧嘅位置
「咁行啦。」阿逸講道
卓卓行另一邊，行同一邊嘅又得番我同阿逸，今日好安靜，仲多咗一份尷尬同唔自在⋯
不過佢唔出聲嘅話，我都唔太想特登搲嘢講，感覺會變得仲尷尬
我忽然感覺到阿逸嘅視線落喺我身上，我抬起頭先望向阿逸，阿逸望向前方，我跟住佢嘅視線一齊望向前面
「阿立？」我有啲訝異咁望住迎面走向我嘅人，「你點解⋯？」
「今日OT，順便過嚟睇下撞唔撞到你。」阿立行到我面前柔聲道，佢嘅視線隨即落喺阿逸身上，「嗨。」
「嗨⋯」阿逸嘅眉頭一皺，好似有啲意外會喺呢個時間見到佢
「你都係搭地鐵？」阿立望向阿逸，露出禮貌嘅微笑
「今日搭巴士⋯」阿逸望一望我之後回答
「我地搭地鐵番去？」阿立微微側住頭望向我
我感覺自己好似夾喺佢兩個中間咁，感覺有啲尷尬
我望下阿逸，又望向阿立，然後微微點頭：「嗯，好呀⋯」
感覺如果同阿逸一齊行嘅話，佢又會繼續覺得唔自在，連帶我都一齊唔自在⋯
「咁，聽日見啦。」我對阿逸點一點頭
「嗯，聽日見⋯」阿逸望我一眼又將視線移開，禮貌咁對阿立都點一點頭
阿立同阿逸對視，睇起嚟就係情敵相遇嘅情景
我企喺佢地中間硬係覺得唔自在，偷偷咁伸手戳咗阿立嘅手一下
「嗯？」阿立頓時望向我
「行啦⋯」我用眼神向佢示意唔好再企喺度維持呢個尷尬嘅狀況
我望下阿逸，感覺有啲唔自在，我即刻伸手捉住阿立嘅手肘，然後對阿逸露出同平時無異嘅微笑：「咁我地走先啦。」
「嗯，聽日見。」阿逸微笑回答，然後比我地先一步邁步向前行，行嘅步速都有啲快，有種想快啲逃離現場嘅感覺
我同阿立企喺原地望住阿逸嘅背影，阿立回頭望我，對我一笑：「行？」
「嗯⋯」我遲疑咁點一點頭，然後跟喺阿立嘅身後行
阿立今日做咩突然間嚟接我⋯？我嘅直覺話比我知，同立嚟接我嘅原因，一定唔只係因為OT順路咁簡單
「搞到你冇得同嗰個甜品師一齊走，真係唔好意思。」阿立忽然冷笑一下，然後陰陽怪氣咁同我講
我都話佢實唔係順路嚟接我咁簡單⋯畢竟阿立係嗰種好霸道嘅人，我同佢仲一齊嘅時候，同其他男同學講多兩句佢都要唔高興，笑一笑都要呷醋
要氹佢大半日先可以氹番好，只要係佢最寶貝嘅嘢，人地望一眼都係搶，佢都會唔高興好耐
「我又冇介意係唔係同佢一齊走⋯」我低聲咁用無奈嘅語氣講咗句
阿立擰轉頭望我一眼，單憑佢嘅眼神，我都可以感受到佢嘅不滿⋯我唔敢再講啲咩，選擇默默咁行喺佢隔離
我地一直都好安靜，冇人先打破沉默呢道牆，大家好有默契咁靜靜地行路
喺行出地鐵站嘅時候，我地沿路行番去，我微微耷低頭望住喺我腳尖前嘅樹葉，大概係今日風吹嘅時候又落咗一堆落嚟
「知珩⋯」阿立緩緩開口，佢嘅聲線聽起嚟有啲低沉，感覺有啲心事重重，「對你嚟講，我重唔重要？」
「呀⋯？」我比佢呢個突然嘅提問搞到大腦窒咗一下，但我冇問佢突然問起嘅原因，只係好誠實咁點頭，「嗯，重要。」
呢兩個字，係我嘅真心實意，我唔係為咗氹佢迎合佢而咁講，我係打從心底咁樣認為
佢同我之間有太多無法割捨嘅回憶，喺無形間將我同佢連繫住
我唔會對佢講大話，因為冇咁嘅必要，喺佢面前，我會想展露比佢睇我嘅真心，但同時我又會不禁卻步思考
「嗯，咁就得啦⋯」阿立將頭微微耷低同時低聲道，佢微微莞爾，笑容係幾唔明顯呢？
「唔⋯」望住佢嘅表情，我反而察覺到佢收喺笑容後嘅情緒，「你就係單純想知你對我嚟講重唔重要？」
「嗯，因為你話過我唔重要。」佢抬起頭望向我嘅時候，笑容仍然掛喺臉上，但同啱啱嘅笑容唔一樣，佢呢個笑容有啲隱隱約約嘅冷淡感，「我⋯記咗好耐⋯因為係你親口講⋯」
我聽到佢咁講，猛然一怔，成個人都窒咗一下
「我幾時—」「中六嘅第一個學期，你等我放補課，同你班friend一齊喺課室傾計嗰陣，你親口講⋯」
未等我問出完整嘅句子，阿立就搶先一步開口答我嘅問題，佢咁樣提起，塵封嘅記憶開始隱隱約約咁浮現出嚟
嗰日因為阿立要補課，我就同我嗰班幾個女仔喺課室一齊傾計
「知珩～你咁多人追，許翊瑜對你嚟講係唔係最特別嘅一個？」同我面對面坐嘅女仔問我，其他幾個女仔都望住我等我開口
「咁當然啦～」我理所當然咁答，但又忍唔住覺得難為情
「你就冇一刻想試下同其他人一齊？有得揀喎～」佢地當下嘅表情就好似拋出誘惑嘅蛇一樣，想揭開我嘅真實想法
「冇囉～佢最好！」我毫不猶疑咁就答佢，對我嚟講，佢就係最好
「咦～好肉麻呀⋯！」佢地即刻攬住自己，滿臉嫌棄咁講，但我反而覺得又甜又開心
講多兩句，佢地突然間話要玩情景題，抽到邊一個角色就要用嗰種語氣講嘢，我抽到嗰張寫住「渣女」兩個大字
「喂呀⋯！」我望住紙上嘅字無奈咁伏低喺枱
「好啱你呀知珩～冇試過就要試下啦～」坐我隔離個女仔輕輕咁推咗我嘅膊頭一下
IG Link: https://www.instagram.com/nd_cotttoncandy/?hl=zh-tw