【愛情】關於我一覺瞓醒發現喺初戀屋企⋯！: 76. 偶遇
「知珩！做人要向前望。」浩宜一手捉住我隻手，怕我會因為靖佑咁樣講而動搖一樣，「食回頭草唔得㗎⋯！」
「但係如果對對方念念不忘，而且對方真係好仔嘅話，食一次都無妨！」靖佑接住浩宜嘅說話，接住同我講
「喂呀！你唔好水佢啦！」浩宜伸手輕力咁打咗靖佑一下，「佢地兩個已經係平行線嚟，知珩值得更好。」
「雖然我都覺得知珩值得更好，但都要睇佢自己想揀邊一邊。」靖佑收起食花生嘅心，認真咁樣回答浩宜，「我都覺得單靠緣份冇咩用，都要睇佢地兩個人點諗，如果知珩最後係決定要揀阿瑜，咁我都會支持，而且你知㗎，佢念念不忘咗幾耐⋯」
「我冇念念不忘⋯」我耷低頭拎起手邊嘅凍奶茶同時低聲回答
「但你個天秤已經傾向佢嗰邊。」浩宜斷言道，「好明顯咁。」
「好啦好啦，唔好再講我啦！次次都淨係掛住食我嘅花生⋯」我撥撥手示意要轉話題，「講下你地兩個得唔得？」
「我呢啲日日蒲嘅人又冇拖拍，有咩花生比你食？」浩宜笑道，「靖佑佢又穩定交往中，得你又高質又單身又有得揀。」
「你冇喺蒲嘅時候見到邊個靚仔咩？」我好奇咁問，今次都輪到我食下花生啦掛，「冇拎人IG聯絡下？」
「冇呀⋯最近太攰，冇去Happy hour⋯」浩宜搖搖頭，「姐姐我唔想拍拖～」
「哦～介紹比你識？」靖佑靠住浩宜，用膊頭撞咗浩宜一下
「你介紹比知珩啦～佢需要多啲～」浩宜朝我抬一下下巴
「咁冇啦⋯」靖佑扮無奈咁聳肩，「阿瑜啦，佢好呀，我撐佢。」
「你比佢收賣咗呀？」我無奈咁托住下巴問佢
同佢兩個食飯真係食晒花生，耐冇見自然要八卦下對方嘅近況，浩宜一如既往咁唔想拍拖，靖佑一如既往咁穩定，我就一如既往咁⋯單身中⋯
「知珩！」
忽然間有人叫咗我一聲，我、靖佑同浩宜同時向聲音傳嚟嘅方向望去，係一星期淨係番兩、三日嘅同事卓卓
「咁啱嘅？」卓卓行過嚟我地嗰台，佢嘅身後有幾個男仔
「你同friend食飯呀？」我望向繼續前行嗰幾個男仔，又望一望卓卓
「係呀～」卓卓笑道，佢望一望靖佑同浩宜，禮貌咁點一點頭，「唔阻你地食飯啦～番工見～」
卓卓朝佢朋友嗰邊行，行咗兩步又回頭望一眼
「cafe同事？」靖佑望向卓卓嗰邊將佢打量一番，「幾靚仔喎～考慮範圍？」
「吓？」我無奈咁笑然後反一下白眼，「佢細過我㗎～」
「姐弟戀有咩問題？年下唔好咩？」靖佑望向浩宜，「見盡靚仔嘅浩宜覺得呢？」
「我麻麻囉⋯」浩宜有啲嫌棄咁搖頭，「同細過自己嘅男仔拍拖好難過自己心理關口，自己老啲咁⋯」
「我向來中意同年或者大過我。」我眼見靖佑準備問我，我即刻喺佢開口前答咗先
雖然話卓卓係生得幾靚仔，人又高大，但係可惜我呢啲姐姐對佢冇興趣，佢比我嘅感覺都係有少少稚氣，不過都唔怪得佢嘅
食完飯之後我地周圍行咗一陣，然後一齊搭車番去，我咁啱拎出手機嘅時候，阿立就啱啱好send message比我
「番到嚟地鐵站同我講」
「番緊嚟，下個站到」我回覆
「你仲要同佢報到？」企喺我隔離嘅浩宜咁啱見到我同阿立嘅對話
「佢有時怕我夜番，所以都會問我。」我只係點頭
「佢會嚟接你定淨係問你？」浩宜側住頭問
「唔⋯一時時？」我遲疑咁答，「有時都唔肯定佢係順路定特登嚟接我⋯」
「我都話佢好㗎啦，你又唔信。」靖佑嫌棄咁望咗浩宜一眼
「總之你唔好咁輕易比佢重新開始，太輕易得到嘅話，佢就唔會珍惜。」浩宜翹埋雙手一臉認真，「人就係咁犯賤，愈輕易到手嘅話就愈快會厭倦。」
「我冇直接答佢想唔想重新開始，我唔想因為一時嘅新鮮感而做決定。」我垂眸回答，我未唔清醒到要咁武斷去決定一件事
「雖然你嘅決定我都係會支持啦。」浩宜用一個高冷嘅表情講出令人暖心嘅說話
「你搵咩男朋友我地都會支持，不過唔好太差。」靖佑笑住咁挽住浩宜嘅手
「唉～好期待～」我笑道，心入面都有一絲期待，「好期待有邊個追到我地嘅冰山美人浩宜。」
⋯
翌日番工
今日卓卓有番工，難怪佢琴晚話番工見，原來今日會番
卓卓今日特別勤力咁，出餐出得快，行都行得快，笑容一直掛喺臉上，開朗陽光到有啲耀眼
過咗最忙嘅時候，卓卓先行入嚟水吧飲啖水休息
「辛苦你啦，今日咁勤力。」我將洗乾淨嘅杯放上杯架
「今日好精神，可以再勤力啲！」卓卓比咗個Okay手勢我，「琴晚又會咁啱見到你～」
「我都覺，好少會喺番工以外嘅時間見到你。」我轉身拎起抹布抹乾淨水吧嘅枱面
「果然係物以類聚，靚女嘅朋友都會係靚女～」卓卓忽然間喺度賣口乖，將我由上而下打量一次
「做咩突然賣口乖？」我有啲疑惑咁望住佢笑問道
「我冇賣口乖呀～知珩你又靚又有氣質都唔係第一日嘅事嚟啦～」卓卓豎起手指公比個讚，今日佢把口做咩咁甜？
「做咩突然讚我？好奇怪⋯」我瞇起眼望住佢，直覺話我知佢有古怪，「做咩呀？報咗更但番唔到工，想我幫你搵人頂？」
「唔係唔係！」卓卓連忙搖頭，「我點會做呢啲嘢？」
「咁你⋯」我滿臉寫住懷疑
IG Link: https://www.instagram.com/nd_cotttoncandy/?hl=zh-tw