【愛情】關於我一覺瞓醒發現喺初戀屋企⋯！: 66. 限定
「一直，都咁好⋯」阿立閂上雪櫃門嘅同時平靜咁講咗一句，我嘅目光由下移到正前方，心臟嘅緊縮冇舒緩嘅跡象
「聽住先啦～以前咁樣講完我地就分手啦～」我壓抑住我嘅開心，努力咁令肌肉唔好將嘴角撐起，以輕鬆嘅表情答佢
「以後再一齊嘅話，就唔再分手啦。」阿立輕笑一下，睇起嚟好似講笑，但我又有啲想佢係講真
我呀⋯始終都係冇將心入面嘅位置完全騰出嚟，係唔係因為曾經充滿希望同愛嘅我地，最後係失望而回，所以我冇放低？
我好過份⋯心入面冇騰一個位出嚟，一邊抱住想試下放低阿立接受其他嘅追求；另一邊又抱住唔想放手，想再一次嘅期望
如果你話唔公平，的確係唔公平，但人心唔係機器，始終會偏袒⋯
就好似你中意食蘋果，士多啤梨都可以，但兩樣嘢同時出現，你個心已經先決定好要揀蘋果
我唔想即刻好衝動咁比個答覆任何人，因為我覺得浩宜講得啱⋯時間會證明真心，到時會知道到底呢個真心，係真係真心真意定只係一時嘅新鮮感
⋯
⋯
⋯
「唉⋯落雨呀⋯」我行落巴士，雨水就滴喺我頭上面
今日係陰天，但我唔記得帶遮⋯早知出門口見陰天就番轉頭去拎啦⋯
我喺路上急步行，我怕陣間又會再大雨啲，畢竟由巴士站行番去cafe都有一段距離
「哎⋯！嘖⋯今日都太黑仔啦掛⋯！」我急步行到半路嘅時候，聽住雨嘅聲音變大比啱啱更嘈
好嘅唔靈醜嘅靈⋯我呢頭講完怕會更大雨，嗰頭雨就落密咗，就咁放眼望都可以見到一條一條嘅雨，排列得比啱啱毛毛雨更密
「哎⋯」我今次直接跑起嚟，直接跑番去cafe好啦
再跑前多幾步，我見到前面有一個熟悉嘅身影拎住遮，我又再加快腳步追上去，呢個背影我好肯定係佢
「知珩！」我跑上前跑到佢隔離
「早晨⋯你冇帶遮呀？」知珩望住我兩空嘅雙手，拎住遮嘅手遞高遮埋我
「嗯⋯」我無奈咁笑住講，自然地伸手代知珩拎住遮，「早知我今朝出門口嗰陣番轉頭拎遮啦⋯」
「嗱，紙巾。」知珩喺袋入面拎咗包紙巾，抽咗一張遞比我
「唔該唔該⋯！」我唔敢怠慢即刻伸手去接，悄然咁望咗知珩一眼，「今日陰天，搞到個人都好似好攰未瞓醒咁⋯」
「冇太陽真係好容易影響心情。」知珩抬頭望一眼灰濛濛嘅天空
我將遮傾向佢嗰邊，怕雨水會淋到佢，畢竟人地遮埋我，而且⋯
「希望收工嗰陣唔好落雨啦～」知珩收回視線望向我，佢對我微微一笑
淨係一個笑容，已經令我有啲心癢又心動⋯
實際上係幾時開始有呢種感覺，我都唔太記得，已經係好一段時間前嘅事
兩年前佢啱啱嚟cafe做，佢話佢冇學過沖咖啡，只係識最基本，於是跟住我學沖、學拉花
以前佢好少笑，對客人都唔會有燦爛嘅笑容，真係當一份工咁做；後來可能大家熟咗啲，佢做得開心，先開始有好少嘅笑容
「我拎住。」知珩喺我地番到cafe門口嘅時候將遮拎番住，「你開門嘛。」
知珩擔住遮，我踎低開門，我推住門比知珩先入去，知珩將縮骨遮先放喺一邊吹一吹乾
其他人未番，cafe只有我同知珩喺度，好多時最早都會係我，然後係知珩，再之後就係樂恩
我換上圍裙就行入廚房，將琴晚整好嘅甜品成盤拎出嚟
「Okay⋯」我低聲喃喃自語一句，捧住盤行出去外面嘅甜品櫃
「今日嘅限定甜品係咩呀？」知珩嘅語氣帶住期待，大概係佢一日中語氣最反應佢心情嘅時候
「今日限定係青提乳酪撻～」我側過身讓少少位比知珩望一望我手上嘅盤，「陣間拎比你試。」
「好呀。」知珩望我一眼對我一笑，然後又拎起枱上嘅杯去洗一洗
我將甜品都擺好喺甜品櫃入面，一個接住一個排一條直線，望住甜品櫃嘅整齊，心入面就有種講唔出嘅愉悅感
「阿逸⋯！」我聽到知珩叫我，即刻擰轉頭望向佢，「可唔可以幫我拎包新豆落嚟？」
知珩踩喺矮櫈上面，但手都係掂唔到第二層，放喺近佢嗰層嘅豆都用晒
「哦好呀！」我將盤放到一邊，拉番埋甜品櫃嘅門就即刻走向知珩
我踩上矮櫈，捉住其中一包嘅袋邊將佢成包拉落嚟放喺水吧嘅枱上面
「唔該～」知珩落喺我身上嘅目光一瞬即逝
知珩嘅動作好熟練，唔講都唔覺佢嚟咗咁耐，由咩都唔熟手卡住卡住嘅小薯仔到宜家做咩都似模似樣
我行入廚房拎咗一件比普通限定甜品嘅尺寸細啲嘅出嚟，經過放餐具嘅地方嘅時候，順手拎咗一隻甜品羹
「嗱！今日嘅限定甜品，青提乳酪撻～」我行到吧枱前，將甜品放到將水吧同吧枱中間嘅木板上
「睇起嚟好靚～」知珩帶住期待已久嘅表情拎起甜品羹
我嘅甜品向來都係知珩先試食，佢中意食嘅話，嗰份甜品通常都會賣得好好，所以都算係先求個上上纖嘅意思
「好唔好食呀？」我有啲自信同時又有啲擔心，但知珩嘅表情將我嘅顧慮打消
「好食！」知珩拎住甜品羹嘅右手，用指尖抹一抹嘴角，然後用力咁點頭
「你話好食就得啦～」我見知珩點頭，心入面鬆咗一口氣，「咁今日應該嘅銷量一定好好！」
「關咩事？」知珩抿一下唇，抹一下嘴角，一下莞爾，我又唔爭氣咁動心，「你整得好食，啲人自然會嚟買啦～」
我嘅雙手因為想掩飾心動嘅眼神，唔自然咁拎起抹布放喺枱上摺嚟摺去
「係呢，最近⋯都唔見你個朋友嚟買咖啡嘅？」我隨便搵一個話題出嚟講，唔想比佢察覺到我嘅表情
IG Link: https://www.instagram.com/nd_cotttoncandy/?hl=zh-tw