【愛情】關於我一覺瞓醒發現喺初戀屋企⋯！: 60. 非誰不可

「你都送到樓下啦，仲唔平安番到屋企？」我回覆佢，再加多個笑喊emoji

我喺經過阿立隔離嘅時候偷望咗佢一眼，佢邊食嘢邊睇手機，好似完全冇留意到我喺佢隔離行過一樣

「你咁晏先食嘢嘅？今日開OT呀⋯？」我行出廚房嘅時候主動咁關心一句，不過感覺更加似係我做錯嘢要低聲下氣

「吓？唔係呀，啱啱先餓所以先咁晏。」阿立抬頭望咗我一眼，好快又耷低頭，視線又一次落喺手機嘅螢幕上面

「哦。」我爽快咁點頭，畢竟我又冇做錯嘢，所以我冇心虛嘅必要，「咁我番房先啦。」





「嗯。」阿立唔在意嘅嗯一聲，連頭都唔點一下示意

喺佢身邊經過嘅一刻，我有諗過佢會唔會叫住我，佢係唔係在意所以先係呢個反應？

「會叫住我⋯？」我嘅餘光見到阿立抬起頭，我心入面有啲期望佢係要開口

但佢冇，佢冇出聲，下一秒又耷低頭睇手機，我嘅心即刻變到有啲空落落⋯

我加快腳步直接行番房，將房門閂埋坐低喺書枱前睇電腦，但心入面一直有種鬱悶嘅感覺





「哼⋯」我低聲哼咗一聲，悶悶不樂嘅感覺就喺胸口凝聚起嚟

「叩叩—」閂上嘅房門突然傳嚟兩下敲門聲，我猛然回頭望向門口

「阿立搵我？肯理我啦咩？」我第一個想法係咁樣，有少少開心

我打開門，阿立面無表情咁企喺我嘅房門前垂眸望住我，佢呢個眼神⋯好似有啲不妙⋯

「做咩呀？」我若無其事一樣問佢，特登用最平淡嘅聲線開口





「只係想提你，以後唔好遲過11點番嚟，我屋企有門禁。」阿立嘅額頭都寫住不悅兩個大字，語氣冷淡到好似我係佢睇唔順眼嘅人一樣

「我咪話咗比你聽我會遲番。」我有啲唔忿氣嘅同時，心入面又因為佢呢個態度而有愉悅感

「所以？」阿立微微彎腰，語氣都夾雜咗半挑釁嘅意味，微微上揚嘅嘴角根本就係講緊佢係特登

「咩所以唔所以？」我翹埋雙手撇開臉，「我同咗你講我遲番，你都答咗我okay！」

「你住喺我屋企，自然要跟我屋企嘅規矩啦。」阿立挺直腰板企好，擺出高冷嘅模樣，原來佢都唔係當冇嘢發生

「好，咁我下次早啲番。」我乖巧咁點頭答應佢嘅要求

佢見我答應佢，佢嘅表情都緩和咗落嚟，表情都冇啱啱咁濃嘅冷淡感

呢個人嘅霸道，我都係了解嘅，就算一齊嘅時間只有一年，我都已經感受到佢滿滿嘅霸道





「你仲有咩要講？」我側一側頭問佢，「仲有冇咩規矩？」

「冇啦，暫時。」阿立淡然咁答咗我一句

「好。」我認真咁回答佢

望住佢一個冷漠嘅表情，我偏偏有啲想笑

「笑咩？」我嘅嘴角先上揚咗1mm，佢就已經發現咗

「冇咩。」我即刻抿緊唇，收起笑容認真咁講，「總之我知㗎啦。」

介意就介意啦，又唔肯直接講，要兜個大圈暗示比我知佢係介意，不過唔坦誠嘅佢有時都可愛嘅





「知就得啦。」阿立傲嬌咁移開視線

佢轉身打算番房之類，但行咗一步之後又停咗落嚟，我以小幅度偷偷探頭望一眼

「做咩停喺度⋯？仲有嘢要同我講⋯？」我喺心入面偷偷咁猜測佢嘅心思，不禁又有啲緊張起嚟嘅感覺

阿立一擰轉頭，我即刻當冇事發生一樣企番好，對佢露出自然嘅微笑，我嘅變臉速度都好快

「你⋯就唔驚你個同事知道我地一齊住？」阿立問道，佢三句離唔開阿逸

「佢唔會知呀～我又唔會特登同佢講。」我一臉輕鬆咁講道

「佢知嘅話，對你嚟講都唔好？」阿立呢句說話好似有弦外之音一樣，我覺得佢有另一層想表達嘅意思

「冇咩好唔好，大家都單身，又冇話咩嘅。」我不以為然咁聳肩講道，我可以話我係特登咁講





「都啱嘅。」阿立意外地冇反駁我，反而係同意咗我講嘅嘢，然後就轉身番房

阿立以前都有試過係呢種冷淡嘅反應對我，大概係我同班上面其他男仔傾計傾得好開心嘅時候⋯

睇起嚟冇咩嘢，但氣場完全唔一樣，亦可以聽得出佢嘅冷言冷語

我望住佢行番房閂埋房門，大概係唔高興啦⋯唔高興我夜番，更唔高興有人送我番嚟⋯大概係⋯？

我都覺得我有啲太衰，特登去試探佢，想睇下阿立會係咩反應，但阿立又何嘗唔係試探緊我？

我同佢講嘅重新開始，第一步係先互相試探對方嘅真誠度

拎喺手中嘅手機一震，我轉身行入房，坐番喺書枱前面，螢幕一亮，係浩宜嘅錄音，睇嚟佢懶到都唔想打字





「我唔覺你個ex會咁蠢，睇唔出你係想定唔想」

最近發生嘅事我都同浩宜講咗，我所有嘅秘密都可以同浩宜分享，佢會好好咁分析比我

「不過宜家一齊都未有定論，未必真係近水樓台先得月」

「可能同你個同事相處多啲，唔咁抗拒嘅話，又會發現新嘅嘢」

「我冇抗拒好唔好？」我回覆浩宜，「只係唔想比個假希望佢」

「佢又未表白，佢表咗白你再認真諗下都唔遲呀～」

「佢表白我先嚟拒絕佢唔會太遲⋯」我回覆

「人地宜家未表白你就拒絕會唔會太早？」浩宜又反問我番轉頭，「人地咩都未做你就要拒絕，會唔會睇定啲好啲呢？」

我聽完浩宜嘅兩段錄音，我都有啲猶疑起嚟，我點解成日都會比浩宜搞到我猶疑呢樣猶疑嗰樣？

「你唔好一嚟就預設咗先～你同佢分開咗幾年又最近先聯絡番，冇必要即刻留一個位比佢。」浩宜喺新一段錄音嘅語氣都特別認真，「你睇清楚先啦，你都話你個同事幾好，既然幾好，咁咪再認真考慮下先囉！聽日又唔係世界末日～」

「知啦知啦，我都冇留位比佢⋯」我將手機嘅咪位放到嘴邊，無奈咁㩒住錄音講道，「我都話我係考慮、睇下我同佢都係認真定只係一時嘅新鮮感先⋯你唔洗咁緊張⋯」

「我冇緊張，只係唔想你咁快下決定，將自己嘅選擇縮窄到得番你個ex一個啫～」浩宜講道，「你唔係非佢不可，佢亦唔係非你不可呀～」

浩宜講嘅後半句好似⋯喺我面前搭咗一下手指一樣，令我一下就清醒過嚟，但同時心情都墜咗落嚟一樣

世上的確冇人話冇咗邊個唔得，冇人係非邊個不可，只係太過執著先會覺得非某人不可

「我又唔係非佢不可⋯」我默默咁拎起手機，指尖喺鍵盤上輕敲輸入




IG Link: https://www.instagram.com/nd_cotttoncandy/?hl=zh-tw