【愛情】關於我一覺瞓醒發現喺初戀屋企⋯！: 57. 密碼

「呯呯！呯呯！」「噠噠噠噠！」

一大清早出面就傳嚟乒乒乓乓嘅聲，佢一朝早要拆樓係唔係⋯

「唔⋯」我一個轉身拎起被蓋住個頭，好想再瞓多陣，難得今日day off

過咗一陣之後終於安靜咗落嚟，同阿立一齊住，有時都係一齊折磨嚟，特別係喺我day off嗰日嘅朝早，佢次次都好似要拆樓咁⋯

「唉⋯先9點3咋⋯」我望到放喺床頭嘅時鐘，我就即刻卷埋張被再瞓多一陣，「瞓多陣再算⋯」





我都唔知過咗幾耐，好似都冇瞓好耐，我就比手機震動嘅聲嘈醒咗，佢放喺床頭櫃上面，同木板嘅磨擦聲嘈醒咗我⋯

「10半⋯我幾時較咗鬧鐘⋯？」我灘喺床上面伸手去拎手機

原來先唔係我嘅鬧鐘喺度響，係有人打電話比我，手機嘅螢幕上面寫住「阿立」兩個字

「喂⋯」我合埋眼迷迷糊糊咁開口

「喂？知珩？」電話裏傳嚟阿立焦急嘅聲音，「你醒咗未呀？」





「嗯⋯」我轉個身側身瞓，緩緩咁點頭，「醒啦醒啦⋯比你嘈醒咗⋯做咩打比我⋯」

「你仲喺屋企係唔係？我拎漏咗隻USB！但我今日要開會，所有嘢都喺晒我隻USB度！」阿立焦急咁講道，語速都特別快，「你可唔可以幫我去打開電腦，幫我將啲嘢掉上drive？」

「嗯⋯好⋯」我坐起身轉身坐到去床邊，著上拖鞋行出房，行到去阿立嘅房

我打開阿立枱上面嘅MacBook，佢點可能連平時跟身嘅USB都帶漏⋯？睇嚟今朝早佢真係好匆忙咁出門口⋯

「你USB密碼係咩⋯？」我插咗USB入去，但佢要密碼，「我唔知你密碼⋯」





「名＋中學個學生證編號。」阿立講道

阿立講完就冇再講，佢真係好肯定我會記得佢嘅中學編號⋯？好彩我以前背咗，所以我係真係大概記得啲⋯

「試一試⋯」我將零碎嘅記憶拉番番嚟，半信半疑咁打咗我印象中嘅數字排列，「嗯，跟住呢⋯？File咩名⋯？」

「開到之後你搵一個叫做What’s Fork Project嘅file，然後掉上我個drive度。」我好快咁睇咗一眼幾十個嘅file名，以最快嘅速度搵佢要嗰個file嘅位置，「搵唔搵到？」

「嗯，搵到⋯」我見到佢講嘅file，即刻幫佢處理咗先

「成個file幫我掉上drive，我會喺嗰度拎。」阿立又緊張咁講多次，「因為我陣間開會要用，所以一定要拎番⋯！」

「同邊個講電話？女朋友？」我聽到佢身後傳嚟同事講笑嘅聲音，「一大清早就要打電話，洗唔洗咁痴纏呀～」

如果我可以揀，我都想繼續瞓唔聽電話，但阿立十萬火急要，所以我先要喺完全未瞓醒嘅狀態下幫佢整





「嗯嗯嗯⋯係呀係呀⋯」阿立嘅語氣極敷衍，「唔痴纏啲嘅話我陣間開會死硬⋯等比阿姐省到立立令⋯」

我望住佢上載緊上去drive，不過file入面嘅嘢應該有啲多，個上載進度有啲慢

「你掉咗上drive未？」阿立呢句帶住催促我嘅意思

「掉咗啦⋯呵～欠⋯」我一時冇忍住打咗個大喊露，「佢未load完⋯」

「嗯⋯」阿立低聲回答，但下一秒又開始自言自語：「陣間開會⋯file啲嘢應該都齊，都唔怕嘅⋯我點解會連USB都帶漏㗎⋯貴重嘢跟身呀許翊瑜⋯」

「佢得啦，你睇下收唔收到⋯」我嘅意識都係處於迷糊狀態，仲係未完全清醒晒，「有冇呀⋯？」

「我宜家睇。」隔住個電話都可以聽得出阿立係一個認真樣，想努力保持平靜，但又不經意間滲咗啲急躁出嚟，「有啦有啦！Thank you～」





佢嘅語氣又變番平時偏柔和嘅佢，佢應該鬆一口氣啦真係

以前冇人同佢一齊住嘅時候，佢帶漏嘢邊個send番或者拎番比佢⋯？佢唔會係第一次拎漏嘢掛⋯？

「好啦你再瞓多陣啦。」阿立嘅語氣特別柔和，唔知仲以為我係小朋友，「我知我嘈醒你唔啱啦⋯」

「嗯⋯你趕住要嘛，我冇咁易嬲⋯」我幫佢閂番電腦行出佢房，「只係仲有啲未瞓醒⋯好彩我今日day off啫⋯」

「再瞓下啦，難得day off可以休息。」阿立輕輕一笑嘅氣音都好明顯，「今晚睇下你想食咩，請你食飯。」

「好呀～」我即刻精神咗少少，食物果然係人嘅精神食糧，「你快啲準備下開會嘅嘢啦，順便睇下啲嘢齊唔齊⋯！」

「好好好，唔該你啦。」阿立回答，「拜拜啦。」

佢啱啱咁趕住要，應該都係好快要開會所以先咁緊張，真係好彩我今日咁啱休息⋯





我拎住手機企喺走廊嘅中間，轉右望一望我間房，又轉左望一望廁所，我諗緊我要去邊⋯大腦有啲反應唔切⋯

「算啦算啦，刷牙啦，瞓唔番啦⋯」我邊自言自語邊搖搖頭，行到廁所門前開門，「起身啦真係⋯」

我一個人喺屋企冇咩嘢做，行到去廚房，見到啲衫都乾晒，咁就唯有⋯收衫啦～

同爸爸媽媽一齊住就唔洗自己做家務，但係自己出咗嚟就真係咩都要靠自己，所有嘢都要自己顧自己

「唉～好掛住咩都唔洗我做嘅日子呀～」我不禁慨嘆道

我將衫收落嚟，阿立嘅衫都收咗，不過貼身啲嘅就⋯佢自己收啦⋯

我攬住一大堆衫行到去梳化，邊睇電視邊摺衫，如果要我日日都喺屋企做家務，我真係會頂唔順





宜家呢個年代，女仔都要靠自己，要獨立啲先唔洗睇人面色，有工作有收入先唔會比人睇唔起

啲人成日話香港女仔拜金又物質，但諗深一層，住喺呢個城市嘅人有邊個唔拜金唔物質，下下都講住錢？

喺呢度，唔拜下金唔物質啲，連衣食住行都搞唔掂⋯呢個係我地嘅社會制度下嘅衍生問題

「摺衫摺衫～」我細聲哼住歌嘅旋律，將衫放喺大髀上面摺好




IG Link: https://www.instagram.com/nd_cotttoncandy/?hl=zh-tw