【愛情】關於我一覺瞓醒發現喺初戀屋企⋯！: 48. 極力推薦
「應該嘅～唔通由得佢喺度阻住？」阿逸擺出理所當然嘅模樣，對我笑一笑，「佢下次再嚟再騷擾你，你同我講就係。」
啱啱阿逸行出嚟企喺嗰個人面前嘅時候，我心入面即刻鬆一口氣，可能因為阿逸好可靠，所以見到佢行出嚟嘅時候我都安心啲
「佢既然係真係阻住你做嘢直接同佢講就得，唔洗怕啲咩。」阿逸認真咁講，「如果唔係佢下次又嚟纏住你。」
「佢係客，難開口嘛。」我無奈咁嘆氣，「下次我會開口同佢講㗎啦。」
「下次唔知點開口就叫我啦，不過我諗佢下次都唔敢㗎啦～」阿逸微微一笑，佢呢個微笑睇起嚟就好似叫我唔洗擔心一樣
今日真係又遇到個麻煩客，我最怕見到佢，每次佢一嚟都要撩我講嘢，我唔答佢佢都會繼續講，所以我都怕咗佢⋯
「知道。」我點點頭示意明白
⋯
夜晚收工之後，我去到同靖佑約好嘅餐廳，今日晏晝佢突然間約我要我同佢食飯
「我到啦～」我行到靖佑對面坐低，佢揀咗個窗邊卡位坐，「今日咩日子呀？你做咩突然間約我食飯嘅？」
「唉！唔好提啦！」靖佑嬲爆爆咁揮一下手
「做咩呀？同男朋友嗌交啦？」我見佢呢個反應，直覺就覺得同佢男朋友離唔開關係
「佢囉！比我捉到同個女仔friend一齊去食飯！」靖佑皺起眉頭，仍然係好不滿，「重點係佢居然冇先同我講聲！」
「佢都唔係第一次㗎啦，你都知佢係咁⋯」我落完單之後將餐牌放喺櫈上面，「而且佢又多friend呢～佢本來都係啲好識去social嘅人嚟。」
「佢去唔係問題，但佢都唔同我講聲，佢當我咩人？」靖佑仍然好唔高興，但我理解佢嘅唔高興
「你同我講有咩用？你同佢講清楚咁樣唔可以先得。」我理性解釋比佢聽，「學浩宜所講，唔解決現有問題，問題就會一直存在，到最後你地又會因為同一個問題而嘈交。」
「我知⋯」靖佑啱啱氣沖沖嘅氣勢即刻弱咗幾分，「等佢道咗歉先再算⋯」
「好啦好啦，唔好講佢搞到自己心情唔好啦！」我安撫靖佑嘅情緒同時想佢暫時唔再諗男朋友嘅事，「我地講下其他嘢分散下先～出嚟食飯唔好唔開心嘛～」
「好呀！」靖佑即刻打起精神露出笑容，忽然間講一句：「點呀？同阿瑜一齊住，尚好嗎？」
靖佑將話題掉到去我身上，我知道佢一定會問起關於阿立嘅事，不過佢宜家未知我同阿立本來係識，所以⋯要答得小心啲⋯
「幾好呀⋯」我微微點頭，我覺得同佢一齊住又冇話好唔好嘅，至少仲係唔錯，「有你喺度佢點敢恰我呀～」
「阿瑜幾好㗎，聽我男朋友講。」靖佑呢句好似有啲咩隱藏意思咁，忽然間提起又拉啲咩話題出嚟，「雖然成日換女朋友⋯有冇信心改變佢？」
「係咩？」我擺出一個冇興趣嘅樣，平靜咁答佢一句，「冇信心⋯」
同一個成日換女朋友嘅人一齊嘅大忌，就係覺得自己有改變佢嘅能力，抱住呢種想法嘅話，最後都係會輸得一敗塗地
「你唔係單身咩？阿瑜都係。」靖佑嘅意思聽起嚟好似係想撮合我同阿立，「如果你兩個一齊嘅話唔係啱啱好咩？」
「邊度啱啱好⋯？」我有啲無語，不過心入面都想聽下佢嘅講法
「啱啱一齊嘅時候係熱戀期嘛～日日都想見住對方，又難捨難離，但如果你地已經一齊住嘅話就冇呢個問題啦～」靖佑咁樣講又好似真係好有道理
「咁樣唔會加快冷淡期嘅來臨咩？」我嘅頭腦仍然好清醒，我都唔算係戀愛腦
「你唔好講啲未到嘅嘢啦⋯」靖佑反咗個白眼嫌棄咁講，「諗下拍拖開開心心咁算啦～」
「但呢個係一定會出現嘅問題嚟，到時熱戀期幾sweet都冇用，最後都係一句冇feel結束。」我嘅嘴角冇感情咁上揚起嚟
「嗰個人都係過咗去嘅人啦～你都係時候要向前望，搵過個新嘅男朋友啦～」靖佑輕嘆一口氣
靖佑係知道我中學拍拖嘅事，但佢唔知道同我拍拖嗰個人係阿立，所以佢先會咁樣講，我仲未有打算話比佢知阿立就係我嘅初戀
「大學嗰陣李毅遠對你咁好，都打動唔到你，可能阿瑜可以呢～」我望住靖佑樂觀咁樣講，心入面冷笑咗一聲
李毅遠做咗好多令我中意做嘅事，但偏偏就係冇嗰種為佢心動嘅感覺，至於阿立⋯
阿立就再講啦⋯我同佢之間以前嘅事都未完全解釋晒，宜家嘅我同佢又係一齊住嘅合租關係，將來嘅事我更加唔敢講
「唔知呀，順其自然啦～」我托住下巴笑咗一笑，講出我喺人地提起阿立嘅時候我一定會講嘅一句，「冇人話一定要拍拖嘅～慢慢嚟囉～仲有時間可以睇清楚邊個係真係啱嘅人。」
「可以嘅話，考慮一下阿瑜啦～我男朋友都話佢真係唔錯㗎～」我就知道靖佑冇咁容易放過我，佢興致勃勃咁向我提議起嚟，「大家都單身，又同一屋簷下，可能會日久生情呢～」
「唔知道㗎～到時真係有先再算～」我只係微微聳肩，「以後嘅嘢好難講。」
你覺得以一句「冇feel」而結束咗嘅兩個人，真係可以翻轉頭同番對方一齊？真係有可能突然間又有番feel？
以後嘅事以後再算，將來係點樣冇人知，真係一齊就係有緣份，最後都冇嘅，大概係注定係對方人生中嘅一個過客
「嘢食到～食嘢先啦～」靖佑拎起筷子準備食飯，「今日都餓咗一日啦⋯」
「你睇你，嬲到都唔記得肚餓啦⋯」我夾咗一塊牛肉入佢嘅碗入面，「嬲還嬲都要食嘢㗎～」
「嗯！果然都係朋友可靠！」靖佑拎起手機望一眼，睇嚟佢男朋友都冇send message比佢
「好啦好啦！食完飯先再嬲佢啦！」我笑道，「如果唔係邊有氣力繼續嬲？」
「嗯嗯！」我一講完，靖佑即刻點頭同意，食啖飯又夾個餸
IG Link: https://www.instagram.com/nd_cotttoncandy/?hl=zh-tw