十八歲談了十次戀愛，我得到了甚麼？: 第二段戀情(2)

自從嗰日之後，我每日放學之後都多咗一樣嘢要做。

應該係叫做去多一個地方，因為我要送佢返屋企。

我間學校喺大埔，而佢住喺上水。

搭小巴只係講緊半個鐘左右嘅車程，車程唔算短都唔算長。

//





「唔洗送我返去啦。」佢睇咗睇錶：「都六點喇，你來回已經坐底七點。」

因為佢今日遲到，所以要留堂留到六點先有得走。

其實我知道加埋等車嘅時間一定係八點打後先返到屋企，但我都係好倔強咁要求送佢返屋企。

「我送你返去啦，咁夜自己返去好危險。」我搭住佢。

其實我都唔知有咩咁危險，不過我覺得送佢返屋企係我應該要做嘅嘢。





我覺得作為一個男朋友係應該要送女朋友返屋企，無論佢住喺邊都好。  

可能有人會覺得應該要視情況而定，但我覺得呢樣嘢係不分情況。

//

呢個時候嘅我已經係中四、五，但我依然都係冇成長過。

都係咁貪玩、冇分寸、唔上進、自以為是，仲要…好咸濕。





//

今日我同佢一齊放學，然後佢咁同我講…

「隻腳好痛，唔想行。」

你唔想行？我有辦法。

「咁我公主抱你啦。」

呢到有個好重要嘅資訊，就係當時我哋喺學校門口。

另外就係…

當時佢著緊裙。





「唔要。」

我秉持住「女仔嘅唔要啫係要，要都係要」呢個道理去公主抱起佢，然後…

佢發曬老脾。

佢用堪比保特嘅跑速向前衝，而我就係後面追，唔講仲以為玩緊跑Online。

//

佢跑咗唔知幾耐之後就喺一個涼亭到坐咗落嚟，而我都終於有得停低落嚟唞下同埋氹佢。

「做咩咁嬲嬲豬啊？」我問佢。





講真，我當時完全唔知咩事。

「你做咩要喺學校門口抱起我啊？」