哇我有超能力呀!!但係點解得五秒咁撚少?!: chapter.37 超能力

「connie...會死？」我清楚聽到彼得所講既野。

connie響彼得宣佈佢將會死之後，好似變得更加虛弱，甚至要雙手捉實阿星先企得穩。

「阿星，你知道我所言非虛，你知道得好清楚，因為無經過實驗驗證我係不嬲都唔會隨便講出口。」

「...」我企響阿星背後，睇唔到阿星既表情，但係就見到佢一路打手勢既右手震緊。

「真係可惜，眼前呢位叫connie既小姐甚至比貝蒂更加美麗動人，但係一樣將會因為星‧巴利你而死，響你身邊既女人可真係多災多難。」





「我講過你無資格提起貝蒂！」阿星再次咆哮，又再響褲袋拎出一堆黑珠向彼得扔過去─

「雖然有白色藥丸，但係比你咁炸法一樣會痛，」彼得手上既黑棍比阿星更快散射出無數黑色幼絲，每一條幼絲各自接觸每一粒黑珠，「而且你要用我最強既研究領域對付返我？」

所有黑珠擦過彼得身邊，然後落地，並無發生爆炸。

「阿星，的而且確你響開發黑核質上面比我犀利太多，但係只係屬於範疇上既優勝，你可以將黑核質擴展到建築，醫療，人文科技，運輸等等，但係黑核質最初既研究方向，係開發黑核質釋放能量既極限，響呢個研究方向上面我消耗最多時間同時我係最強既研究員！」

「你以為你扔左黑鞋我就搵唔到你？天真！所有包含釋放能量反變方程式既黑核質我都可以追蹤果股幅射，你身上既黑珠全部都係追蹤器！」





「...」阿星注視彼得，但係左手響背後開始示意我要點樣用支錐刺。

「阿星你仲想走？咁睇黎我要再犧牲多一個人你先明白你自己係害緊幾多人...就犧牲你後面果位女仔？」

我意識到彼得指既...正正就係eva！

彼得抬起手中黑棍直指eva─

「啪！」





5...

黑棍伸展速度實在快得驚人，彼得一抬手黑棍已經伸到去eva面前。

4...

我拉開eva一個身位。

3...

再用右手捉實彼得既黑棍一扯，將黑棍從佢手上扯脫。

2...

然後拎起阿星一直用右手放響後面既錐刺。





1...

我輕吻eva頭上髮絲。

0...

「...！」彼得突然發現手中黑棍甩左手。

「係...阿ming。」connie仍然係有氣無力咁講。

我隨手將彼得果支伸長左既黑棍扔落地下，畢竟我都唔識點樣縮細佢，老蓮咁長非常唔方便。

「阿ming，係而家喇！」阿星突然回頭望住我。





我一怔，然後快速諗返起頭先阿星既手勢...首先轉動手柄位既轉輪輸入距離時間同密碼...然後再禁手柄底部既按鈕...

錐刺隨住我禁左按鈕之後開始澎脹。

「唔洗旨意走！你以為我得一支黑棍？」彼得響佢破爛不堪既褲後袋中再抽出另一支黑棍，然後直指住我。

「阿ming小心！」未等到阿星警告完我，我下意識將右手手掌前舉，「啪！」

但係時間並無再一次停低，因為22分鐘未過！

我發現呢個超能力麻煩既限制將有可能令我一命嗚呼！我張開右手手掌，妄想可以用手擋住破壞力驚人既黑核質製黑棍─

但係又真係比我擋住喎！彼得另一支黑棍以極快速度伸展到我面前，但係響接觸到我右手手掌既一刻停低。

同時錐刺充能完畢，澎脹既錐刺褪開，展露內藏既黑色無光空間。





「彼得，再見喇！」呢次到阿星伸長黑棍，黑棍直接轟碎左彼得全個下半身。

然後阿星拉住connie走入黑洞內。

我留意到彼得第二支黑棍一樣無收縮，同時因為阿星打碎左佢下半身，黑棍鬆開跌左落地下，有兩支長達十幾米既黑棍就咁放響地面。

我望一望身邊既eva，緊握eva既手一齊走入黑洞。