哇我有超能力呀!!但係點解得五秒咁撚少?!: chapter.8 會面
無幾耐eva同阿媽就過番左黎，過多陣家姐買左d三文治過黎，我同家姐都咬左兩啖，阿媽話無胃口無食到，坐坐下eva行開左一陣，跟住又番黎，然後佢又行開，來來回回左兩三次
又等左一陣，姑娘就幫我地安排左上房，疑喂佢地又幾好工作效率喎。
間房係d多人房，五張床兩左三右排響房，床同床得兩個人身位，天花唔太高，我企響度隻手唔洗伸直都掂到天花板，個感覺有少少窄，而我老豆就訓左響右邊靠窗既床位。
老豆個身左一條喉右又一條喉，塊面同個嘴同平時比青左少少，熟睡中。
阿媽坐響老豆側邊一時拎本書出黎睇，一時就吽哂望住老豆。
eva就坐響張床另一邊，周不時同阿媽傾幾句，我見到佢會拎起果塊記錄病人d資料既board睇下，又望下d儀器，又會郁下老豆身上既喉，睇佢手勢好純熟，絕對熟手過平時佢番工摺衫，見到咁，阿媽都無話阻止個三九唔識七既人搞佢老公...至少對阿媽黎講，eva仲係三九唔識七。
而我同家姐一直keep住睇電視。
「今日下午約十二點半時份旺角發生嚴重交通意外，一輛小巴失控剷上行人路，撞倒多名途人後側向剷入一間便利店停低，車禍中九名途人及小巴司機受傷，其中兩名分別四十八歲及二十五歲女子傷重不治。現時仍然有四人留醫，其中一人情況危殆，一人嚴重，二人情況穩定。」
聽到新聞報導果陣，我諗我同家姐一樣係完全無開口講野既意慾，而算係親眼見到既我個感覺仲要強烈少少，就好似個胃有舊大石沉甸甸壓住。
於是乎我同家姐只係一直安安靜靜咁睇電視過，直到夜晚十點半，我睇到電視劇都做完，呢套野平時一集都無睇過，完全係無興趣，但係我都唔知點解我仲可以一路睇到佢做完。
睇完套劇之後，我感覺自己總算係平伏番，係喎，打比林小姐先，我都唔記得左佢一路等緊我，不過，咁夜仲叫佢過黎會唔會唔係幾好？
「阿b，都夜喇，送你朋友番去先啦，佢第二朝仲要番學。」阿媽呢個時侯同我講，睇黎頭先佢地傾計果陣阿媽知道左eva係個學生。
「唔..洗啦，我可以留低幫－」都未等eva講完，阿媽同我打眼色。
「eva，」佢望住我，「我送你落去啦。」我企起身。
「...」eva諗左諗，「好。」
行到出床房門口，有兩個姑娘同eva搭訕：「作死你丫華女，撞車幾十個人送入院咁大獲你仲係咁催我地，忙死我地丫！唔請番我地食野唔放過你呀！」
「嘻..嘻嘻...好啦好啦。」 eva咪咪笑，「我走先喇，群姐儀姐，byebye。」
我響eva後面聽到佢地講既野，原來頭先eva成日行開，就係去左催d姑娘幫我地上房，唔怪之得咁好效率。
「好喇，行得。」eva回頭同我示意。
「嗯。」
行到去lift口，部lift仲響頂樓，eva提議三層樓，不如行樓梯，我贊成。eva在前我在後，響樓梯每次轉彎果陣，我視線總係隨住eva而遊離。
其實我係咪應該同eva講番句多謝？呢個朋友真係好唔話得，如果係我自己撞車就話姐，而家係我老豆撞車佢都主動撲過黎幫忙，真係無乜邊幾個會咁做，至少，我自己都唔會咁幫我既朋友。
但係一句多謝係想點？做買賣？用一句多謝黎交換佢咁頻撲過黎幫忙？定係用一句多謝減輕罪疚感，減輕果種受人因惠唔好意思既感覺？我過唔到自己果關，我選擇沉默。
一路都同eva無乜點講野，淨係問下佢搭咩車番屋企，佢話地鐵，咁我就同佢行到去油麻地a2出口。
「咁...係咁啦，阿ming，我番去先喇。」
eva轉左身行入站。
「喂喂...eva。」我開口，eva轉身望住我，「我陪你搭去樂富啦。」
「哦-好-呀。」 eva咪咪嘴笑住講，不過呢次佢笑得好似有d古惑。
程車一樣係好多人，差唔多人貼人咁濟，我同eva企埋一齊，無乜點傾計，響呢一刻我諗緊我做緊乜？陪eva搭佢唔鍾意既地鐵當多謝？不過...我知道，有時d野，唔係1+1=2咁簡單，如果做緊既野係對得住個良心既，又有咩所謂？
諗到呢度，我偷偷斜眼望eva，佢同之前一樣係收起笑容，不過少左份之前見到既陰鬱，唔知佢諗緊咩呢？雖然呢一刻無講任何野既dead air，但係我覺得eva咁樣企響身邊幾舒服。
列車去到樂富，我同佢行上閘口，eva終於開口：「我番去先喇，阿ming我聽日再過黎探下世伯。」
「嗯，好...」我望住eva出左閘遠去。
「等陣，佢唔係聽日仲要番學咩，仲有佢聽日都係番六收十喎，邊有時間過黎廣華？」我諗到呢點既時侯，eva已經沒入夜色中。
「疑？」我諗起一d野，我記得eva話佢自己之前黎廣華實習都係搭小巴...咁...喔！衰妹，原來佢頭先特登試我...哈哈。
呢個時侯收到個sms，係家姐既 :
「wei bro,mother said she can take daddy fine,and call me go back to home first,and u2,but she wan u to bring some daddy's cloths tmr,so c u home.」
﹝喂細佬，阿媽話佢睇得掂老豆，佢叫我同你番屋企先，但係聽朝要帶d老豆既衫番去，番屋企見。﹞
呢個濕鳩文法sms真係得我家姐先寫得出，佢之前響美國讀書，早兩年先番黎，打sms一粒中文字都唔識打，d英文仲要係用讀音，呢d應該就係外國習慣掛？
「ok。」我以最簡單既sms覆家姐。
等我番到屋企，家姐仲未番黎，沖個涼早d訓先...疑，我係咪搵一搵林小姐先？不過而家睇一睇鐘，都成十一點幾差唔多十二點，算啦，聽日再搵佢，免得人地可能訓著左嘈醒人。
第二朝早我八點就起左身，正常黎講我都係落樓買報紙食個早餐，再番屋企hea一陣番工，但係經過琴日情緒起伏，一起身個感覺同平時唔同，起初仲有少少呆呆地，我坐左響張床度定一定神，諗起今日要做既事。
除左刷牙洗面呢d起身必做既野之外，我入左老豆老母間房，執左幾件老豆d衫入袋先，望下鐘，未咁快到探訪時間，我決定落街食個早餐先。唔知番早學既eva起左身未呢？
一路食早餐一路睇報紙，今日既頭條就係講緊琴日車禍，我見到兩個女死者比人詳盡篇幅講佢咩名，佢屋企人點傷心，兩個女死者生前係幾咁受人愛戴，至於無死果d就一隻字都無提，我諗起d商業原則，報紙係要寫出黎有人睇先叫報紙，佢要寫d吸引到讀者既內容先得，d死者既背景就最岩比佢地加鹽加醋等讀者可憐死左響車禍既人。
我唔係話想老豆個名都要響報紙上面出現，講佢有幾受人愛戴....啋！啋過你咩，講埋哂d咁唔吉利既野，只不過喂而家我老豆一樣係撞到爆哂缸訓響醫院，一粒字都唔提，頂！我知有d人係可以睇世事睇得好淡然，可以對呢種商業報紙寫法一笑置之，但係我係後生仔，我容許自己比呢種衝動既情緒佔有自己，一時之間我真係嬲嬲地。
食完早餐番到屋企，打左比阿媽問咩情況，佢話時間仲未到，我諗左諗，不如打比林小姐？同佢傾完應該差唔多夠時間。
等我同林小姐道個歉因為琴晚唔記得左佢之後，佢話唔介意然後約我去同一間上樓cafe見面。
我換上一身出街衫，拎埋袋比老豆換洗既衣物，諗住見完林小姐就直接過去廣華。
我去到間cafe搵左個位坐低，之前從來未黎過呢種地方，幾十蚊得一杯野飲，點解咁on9都有人黎幫襯？
等左一陣，林小姐到左，今日佢無戴cap帽，身上亦無相機，一頭微曲長髮落響兩肩，身上一件淺藍色jacket，入面係黑灰色相隔既及膝裙，條裙既cutting岩岩好突出左佢既玲瓏曲線身驅，襯上一對奶白色既高踭鞋，原本眼前既林小姐唔洗點打扮都已經令我覺得佢係一個標準美女，而當佢套埋富時代感既優雅衣飾，實在令我詞窮，令我唔太識形容。
「咳咳...」眼前既林小姐實在太搶眼，除左cafe裡面三兩隻小貓望到實一實，連我都睇到眼突，我唯有扮咳然後dup低頭。
「hi，阿ming。」 佢響我對面坐低，「你daddy點？有無咩野事？」
「你好...林小姐。」 我定一定神，「無咩野既，只不過仍然訓緊。」
「嗯，無事就好，等佢醒左代我慰問一聲。」
「嗯，有心。」
「咁...我直接入正題，我想你講下你身上發生既事。」
「我身上發生既事...」我諗左諗，「其實就好似你影到既，你見到既咁。」
「我只係見到好幾次都係一d物件，或者係某個人...當然好多時呢個人就係你，都會突然好似魔術一樣，由一個地方去左另一個地方，而每次你都在場。」林小姐以指尖輕點下巴續道：「奇怪在於，每次你都會好快離開現場，所以我對你產生好大既好奇心。」
我見到林小姐雙眼清晰而堅定，「其實，事實係...好天方夜譚，超乎現實，而你可能根本好難相信。但我覺得我應該可以直接同你講實話。」我舉起右手作勢要啪手指，「事實就係，我有超能力，我右手啪手指呢個小動作，可以令我周圍所有事物停頓，周圍除左我之外所有人包括物體都會定格，維持時間大約係五秒。」
我都好自然將所有事實講出黎，我唔怕cafe裡面其它客人聽到，因為佢地同我有d距離。
「我相信你。」林小姐微笑，「可唔可以實際示範一次？」
「示範丫...你等陣，我諗下點示範先...有喇，咁啦。」
「等等，」我望一望cafe其它人，確認無人留意我同林小姐呢邊，「我黎喇。」
「啪。」眼前所有人，包括林小姐統統呆滯不動，吧台既熱水機流出既熱水同樣定格。
我起身，行去林小姐後面，五秒過左，我篤一篤林小姐膊頭，「我響你後面。」
「就係咁。」我坐番落自己個位。「嗯...點樣？」
「好神奇。」林小姐臉上保持一抹笑容。
下，就咁？小姐你都幾老定喎，咁不可思議既野你反應都咁平淡？
「林小姐你都幾淡定下，我仲諗住你會好驚訝添。」
「因為我亦都唔算第一次見到你既超能力。而且我見過更加不可思議既事。」
「更加不可思議？」
「嗯，不過唔係重點，既然係咁，我想問你一個問題，你介唔介意我打後日子會耐唔耐阻你幾日？」
「點解？」
「我需要你幫忙。」
「下？」等陣先，我堂堂一個廿一歲男仔，無事業無車無女無樓乜柒都無，錢就更加唔好提，佢真係果個connie lam既話，佢擁有既錢我打十世工都搵唔到，我有咩可以幫佢忙？
「um...唔知你記得唔記得我同你講過，我係攝影師，當我見到你身上既事，我就有個idea，我想你協助，一齊將呢個idea拍攝出黎。」林小姐好誠懇咁講，「當然你會有報酬。」
「我想問一個問題。」我摸一摸鼻頭，「我想問the human呢本攝影集既connie lam係咪就係你？」
「係，其實你可以直接叫我connie，已經好耐無人叫我做林小姐。」林小姐...connie莞爾一笑。
「好，connie，我拒絕，我無辦法應承你。」我好爽快咁拒絕。
「點解？」
「如果我真係幫你影左出黎，出左集，又一次賣到全球收益9位數字，我諗到時實有人會調查係咩一回事，check到最後就會搵到我，知道我咩料。無論結果係好定壞，我都唔想咁。」
我諗我傻撚左。
如果我肯幫佢影相，事成之後佢就算淨係分一個巴仙比我，都已經係一百萬以上既數目，呢個數目對廿一歲既我黎講，係只有響打機果陣開金手指無限金錢先會見到。
但係...由細到大我屋企尚算小康之家，老豆老母做小生意從來未比我餓過，電視做得太多豪門內鬥，而且屋企阿爸阿媽間中又會為盤生意點做而嘈交，自細養成怕錢既心態，唔會特別為錢而行動，總係覺得好容易為左錢而同身邊人鬧交，無興趣買樓，無興趣買車，無興趣炒股，真係比一百萬咁大舊錢我，你教我點洗好？
「咁如果我淨係拍攝，唔會寄比出版商呢？只係作為我對興趣既收藏。」connie補充，「一樣會有報酬。」
「唔好喇...可免則免。」我諗起陳冠希d閃卡，希哥當初都唔會估到佢既珍藏會流出。
「.....」connie呢個時侯輕咬下唇，皺眉，似係爭紮緊。
隔左一陣，佢開口：「咁，你有無興趣做我助手？我...我缺少一個助手。」
「唔啦，而家我份工做得好地地。」
connie無迫落去，只係嘆左一啖氣，「好啦，我唔勉強你，我地講番你既...應該點講，你既超能力？」
「其實好似琴日咁既情況，你有無辦法阻止？」connie聽到我連續拒絕佢既請求之後，已經索性拓住腮，扁扁地嘴，心不在焉咁望住我講。
比佢咁樣一問，我先開始諗起，係，我有超能力，只要我啪手指全世界都會為我停低五秒，如果琴日我有運用呢五秒，我老豆仲洗唔洗比車撞？
由琴日親眼望到車禍，望到街邊撞爛哂既物件，望到一地都係既血，望到訓響街邊無反應既老豆，全部都係我咁大個仔未經歷過既事情，當中震撼令我一直無諗其它野。直到而家，經connie不經意一問，我先醒起我自己，我係阿ming，雖然我外表係個一街都係既普通男仔，但我同其它任何人都唔同，我有超能力，我真係有超能力，我真係可以令全世界停低五秒，如果琴日我響架小巴失控之前停低五秒，我可以跑番轉頭，我可以推開老豆，係，我係有咁既能力。
「我...我唔知。」沉沒響深思中，我隨便答左connie一聲。
「咁你覺得有無可能呢？」 connie繼續問。
「我唔知...」嘴上如是的說，而我個腦不停咁諗緊另一回事。
絕對有可能，係，有可能，我可以，但係我無做到，點解我唔咁做？明明我有超能力，點解我唔去救我老豆？我救番老豆，我琴日可以同老豆食餐午飯，我救番老豆，老豆今日唔洗訓響醫院，我救番老豆，老豆就唔會成為班仆街報紙佬忽視左既傷者。
等陣先！我思想開始偏激，係，我係有超能力，但係我自己有實際試過，每一次要等22分鐘先可以再用，而撞車之前我唔係救左個阿姐，等佢唔洗比石屎責死咩？係，無錯，炒車果陣就算我醒起有超能力可以用，我都無辦法用，係，無錯，唔係我唔做，係我無辦法做...係，無錯。
「其實呢個...呢下啪手指呢，係有少少麻煩，好似頭先咁樣示範完比你睇一次之後，要過22分鐘之後先可以再用。」我總算將個精神集中番現實。
「22分鐘？」connie對呢個準確數字有疑惑。
我向connie簡短咁講我親身既實驗，「就係咁，因為車禍前一刻我先用超能力幫左另一個人，所以就算我想，我都阻止唔到架小巴。」
「原來係咁。」connie思考片刻，然後呷手叫waiter埋單，「我地講到呢度先啦，你仲要去探你daddy，係咪？」
connie連我果份錢都比埋，當我想比番錢佢果時，connie張手示意拒絕，「你同我分享左咁多事，比我請你飲杯野，唔算過份，岩唔岩？」
「唔好啦，咁樣唔好意思。」
「咁你當我係你家姐啦，我都經常咁樣請我細佬。」佢已經收番waiter既找續，拎住銀包起身，「係呢，你而家係要去醫院丫麻？不如我車你過去？」佢指住我隻手袋衫。
「唔洗啦，廣華好近姐，我行過去啦。」
「嗯，好，咁下次有機會再見。」connie同我落樓後，響門外道別。
connie逕自走向停車場，而我自己就向廣華醫院方向行過去。