MK學院: MK仔女活動事件簿—籃球比賽(6)

「你知我哋收咗錢架。」狼王苦笑：「大家都知我哋唔打假波嘅話就一定贏。」

咁我都知。

「但係你哋有兩分架喎。」

你哋打假波啫，咁佢哋都要自己拎個波嚟射架。

定係你哋有咩計劃？





「佢哋臨完場就會郁架喇。」

原來咁慳水慳力架。

「咁我估你哋唔洗休息架啦？」

無謂嘥十五分鐘鳩坐啦。

「可以唔洗。」狼王企起身：「不過都可以食枝煙先。」





都係嗰幾分鐘嘅事啫。

「咁你哋食枝煙先啦。」我轉身：「我去同M班嗰邊講聲。」

//

「你哋都唔洗唞架啦？」我問佢哋。

郁都冇郁過，唔撚洗唞啦。





「唔洗啊。」地龍皇望向對面：「等佢哋食埋枝煙就開始啦。」

串得你啊，雖然你串得起。

//

下半場個節奏同頭先一樣，直到最後十五分鐘。

狼王起手傳波，但佢傳嗰個方向係得M班嘅人。

睇嚟佢哋都係時候做嘢，跟住落嚟應該會比M班直接連入兩球。

地龍皇接到個波之後就慢慢向對面場進發，而F班嘅人都即刻做下樣咁回防。

其實我都唔知點解你班友要搞咁多，係人都知你哋咩事啦。





地龍皇停喺罰球線前面，又度位又拍波咁搞咗一輪先起手。

起手動作可以話係完美，但係…

「呯！」

蘇乞兒上前起跳一手拍走咗佢個波，落地嘅時候仲順勢撞低咗地龍皇。

呢下擺到明就有心撞，因為地龍皇直接飛到九丈遠。

跌喺地下嘅地龍皇用同撞鬼一樣咁驚訝嘅眼神望住蘇乞兒，而我見到呢個畫面嘅反應就同佢一樣。

唔係收咗錢架咩？





狼王收咗錢但係撞鳩人已經夠曬黐線，佢撞完人仲要伸手諗住拉返起人。

到底你班友謀緊啲乜啊？