MK學院: 十六.

兩條鐵鍊不斷碰撞，兩個人打得難分難解，直到…

「噹！」

兩條鐵鍊圍住大家轉咗幾廿個圈咁纏埋一齊，原本嘅比武大賽瞬間變成咗拔河大賽。

黃祥喺原位頂咗兩秒，但之後就因為唔夠蘇乞兒大力而比佢慢慢咁拉過去。

首先要讚下佢兩個條鍊都好硬淨，其次就係兩個都好講武德，因為黃祥其實只要鬆手就會令蘇乞兒直接失平衡向後扑。





黃祥比蘇乞兒拉到去佢面前，蘇乞兒鬆手踎低一腳掃埋去。

黃祥比人掃低咗之後想起身，但已經比蘇乞兒踩住咗心口，郁都郁唔到。

隨住巧大倒數完十聲，蘇乞兒得到最後嘅勝利。

蘇乞兒鬆腳，然後伸出右手想拉黃祥起身。

可惜黃祥唔領情，一嘢拍開咗佢隻手。





黃祥雙手撐住地下咁想自己起身，但無奈啱啱同蘇乞兒鬥完力，而家對手軟奶奶。

蘇乞兒再一次伸出右手，黃祥雖然一臉嫌棄，但都係捉住咗佢隻手。

蘇乞兒用力捉住佢隻手，然後…

反手扭轉佢隻手，之後再用左手向佢嘅關節位手刃落去。

「咔！」





「啊！」

蘇乞兒鬆手，黃祥撳住被手刃嘅位置攤咗喺地下。

台上嘅巧大見到呢一幕都冇譴責蘇乞兒，反而仲拍咗下手。

「點解？」黃祥問。

比賽唔係完咗架喇咩？

「你出嚟行架，唔好傻到將你嘅敵人當係朋友啦。」蘇乞兒冷笑一聲。

佢由講武德嘅練武之人瞬間變返做奸詐嘅爛仔。

「防人之心不可無。」巧大附和。





黃祥因為哽唔落呢啖氣所以用左手出拳反擊，但就比蘇乞兒一腳踢開。

黃祥面朝地下咁仆低，而蘇乞兒就起腳踩住佢背脊。