MK學院: 十四.

淨低嘅同學嚟到禮堂，一入去就可以見到禮堂中間有一個用木凳圍出嚟嘅大圈。

巧大行上台：「相信大家見到呢個圈都知咩事架喇。」

講完，禮堂台上嘅投射幕以龜速降落嚟。

喺佢降曬落嚟之後，投映機打開。

上面得四個大字…





「比武大賽」

巧大擺出葉問姿勢，但兩隻手變咗舉中指：「一間會抽人入去打，只要令對手冧低十秒、投降或者重傷就當贏，而裁判就係嗰四個大隻佬。」

「我有問題！」台下傳嚟把女聲。

唔夠清楚咩？

「係，咩問題？」巧大回應。





點解你咁有禮貌嘅？

「想問會唔會分男女？」

我都冇諗到呢個問題添。

巧大微笑：「梗係會啦，話曬男女喺生理上有差別，但男女仔嘅人數都係單數，所以最後會有男仔打女仔嘅情況出現。」

問問題嘅女仔面都青埋：「唔該曬。」





「咁事不宜遲，即刻開始！」巧大撳咗撳電話：「第一組對戰嘅係…蘇乞兒同黃祥！」

唔知係突登定係天意，資料寫佢哋兩個都係練醉拳嘅人，不過就唔同門派。

講就咁講，都唔知真定假。

佢哋一聽到自己個名就即刻一嘢跳入圈，果然輸人唔輸陣。

但明明可以拉開張凳行入去，做咩係都要跳呢？

不過跳入去又真係型過行入去嘅。

佢哋入咗圈之後對住大家咁企喺圈邊等巧大宣佈，真係好有武德。

「準備！」





佢哋嘅上半身開始擺嚟擺去，完美咁展示咗醉拳嘅特色。

「行醉意不醉，步醉心不醉。」

通常打交會握實拳頭，但醉拳就會鬆開隻手，好似拎住隻杯咁。

無論佢哋係咪真係識打，佢哋而家個樣都已經呃到下人。

當然都有可能係佢哋真係醉咗。

「開始！」

佢哋雖然上身搖擺不定，但從步伐可以睇得出係直線咁向住對方行緊過去。