《想溝到女千祈唔好學我咁》: 9.1

「啊，好多謝大家，好難得聖誕可以同大家一齊過。喺到送上第一首歌，亦係阿安特別想送俾邵月同學嘅《雙子情歌》。多謝！」

悅耳嘅鋼琴聲響起，令場內所有人都變得陶醉。唯獨阿月，佢個樣越聽越難受，仲有啲眼泛淚光，唔知以為佢聽果啲係魔音。

「咩事？」我遞上紙巾俾佢抹眼淚。

「冇。」佢答，然後呼出一啖重氣。

人純情才易分心 人無情才算花心
理智得多麼肉緊 纏綿時慈悲眾生

還請體諒我 兩個我無論在鬥在爭
思想雖分裂能被抱緊 全身都認真

「呢到好焗，不如出去抖下氣。」唱完第一首歌之後，阿月對我講。

「喔。」

我哋走到禮堂附近嘅涼亭，坐咗喺石櫈上面。所有嘅人都聚曬喺禮堂聽羅力威唱歌，周圍一個人都冇，真係靜到而家將阿月就地正法都冇人知。講下啫，當然我唔係啲咁禽獸嘅人。雖然，我承認都有呢個諗法，但阿月喎！除非係同性戀，唔係有呢個諗法都好正常姐。

「原來佢真人唱歌幾好聽喎。」阿月講。





「但你唔似好享受喎。」

「乜睇得出咩？」

「寫曬喺塊面啦。你巴閉啦，大有錢仔特登點歌俾你。」

「點解大家都要咁抬高佢，有錢真係高貴啲咩？」

「你好憎佢咩？」





「諗起啲往事姐。」

「願聞其詳。」喔，Hi各位，我叫邵月。

不經不覺轉咗校都一個學期，喺呢幾個月真係有好多好有趣嘅經歷，最估唔到嘅，係會識咗隔離呢個高分低能。佢叫李卓正，成績好似幾好，但喺讀書以外所有事都好似好遲鈍咁。

或者你都會奇怪，點解我對符文安嘅舉動一啲反應都冇。

你知道嗎，其實我都係喺一個有錢人家中長大嘅女仔。同好多貴族子弟一樣，我由一出世都已經可以享受好多平凡人勞碌一生都追求唔倒嘅嘢。

但人真係好難服侍嘅動物，窮人會因為擁有唔倒富貴生活而唔開心，但當我成為佢哋眼中羨慕嘅有錢人，我嘅人生都係唔開心。因為從小到大，我都失去最基本嘅嘢 ─ 自由。

未夠三歲，我已經被逼去學跳舞、唔同嘅樂器。十二歲已經有鋼琴嘅演奏級資格。無可否認，我後來係幾享受去活用自己所認識嘅技能，但喺建立喜好之前，我根本冇得揀學唔學、鍾唔鍾意。