《想溝到女千祈唔好學我咁》: 5.4

「你唔試又點知自己做唔到姐！我幫你諗啦！不如做漫畫家啊？你咁鍾意睇幽遊白書。」我由細到大，都好鐘意睇幽遊白書，成日幻想，自己就係有型到爆，但好容易迷失嘅飛影。

「我都唔識畫畫。」

「咁…不如做作家？你作文叻啦啩。」

「香港做作家冇錢賺喎。」

「唔係講錢㗎嘛，要講鍾唔鍾意先！」





「咁..都鍾意嘅。」自小我對文學都好有興趣，儲儲埋埋都有好多書喺屋企，所以都培養咗寫作嘅興趣。

「喇，咁就做作家先！你第一本書嘅主角要搵我嚟做喎！」

「吓？點解？」

「咁我幫你搵到目標緊係要回報返我啦！」「做咩要幫我搵目標？」

「做人有目標先會成長，唔理啊！一定要搵我做主角！」





「都唔知係咪會做作家。」

「唔得！一定要做！」

我未來嘅職業，就係咁隨便就決定咗。雖然我當時冇應承到佢，但不知不覺間，我開始鑽研唔同作家嘅寫作風格，學吓點樣去「講故事」，有時仲會俾啲散文佢過目。

有時佢會稱讚，有時佢會批評，會俾好多佢嘅感受俾我知，令我點樣去令自己寫嘅嘢更加立體，甚至學校嘅一啲徵文比賽，我都有參加，間中更會有幸奪魁，學校會將我嘅文章刊登，令更多人睇到我嘅文字。

不經不覺間，我都相信，自己可以成為一個作家。





如果一切可以咁順遂，我諗我做唔到也斯，都可以做到孤泣。

講笑姐，但有時發下夢都得啩？發夢同夢想最唔同嘅地方，就係發夢可以諗下就算。

所以我幾鍾意無情白事就發下夢。喺我印象中，中四係一個來去匆匆嘅一年。當中好似發生咗好多嘢，但「嗖」一聲，就不經不覺過去咗。如果將一切轉變成一首歌，中四發生嘅嘢可能都只係前奏。

上到中五，Miss Lam為咗方便，繼續搵我同阿南做班長。

「今年再多多指教！」知道呢個消息之後，阿南Whatsapp我講。

果陣Whatsapp開始興起，唔洗再受到SMS因為唔同台而產生嘅收費重擔，人與人之間溝通都方便咗。我同阿南都經常會Whatsapp傾偈，無論係上堂果陣定放學返到屋企之後。一開始都係佢主動同我講佢自己嘅嘢，但慢慢，我都會同佢分享我嘅動態。

「有你唔洗我指教。」我講。

「死啦你！我唔會再幫你㗎啦，我要幫Miss Lam個手球隊！」





「幫咩？」

「佢哋暑假果陣打過幾場友誼賽，亦招募多咗人加入，學校終於應承俾佢哋搞返校隊！我應承做佢哋嘅球隊經理。」

「唔怪得洛賓成個暑假都唔見人。」我回覆，開頭仲以為佢為情所困，淨係想收埋自己。

「喂，恭喜喎，手球隊有校隊打，今次唔係後備啦。」喺我覆緊Whatsapp嘅同時，亦同坐我身邊嘅洛賓講。