《想溝到女千祈唔好學我咁》: 3.6

「Hello，四位小朋友，你哋好！食咗午飯未啊？」我哋組有四個小朋友，兩男兩女，一去到，阿南就好熱情咁同佢哋打招呼，完全唔洗熱身。

「嗯…」但可能怕生嘅係小朋友，佢哋只係羞怯咁點點頭。

「等我哋介紹吓自己先，我叫做子晴姐姐，佢叫做南南姐姐，後面兩個高大嘅哥哥叫做賓哥哥同埋正哥哥，你哋呢？叫咩名啊？」子晴承接阿南嘅活躍，接力將我哋介紹俾小朋友識。可惜幾個小朋友仍然冇乜反應，佢眼神中掠過一絲不知所措。

「Roar!! 呢個小朋友叫咩名！唔講嘅話恐龍仔就會嚟咬你哋！」出聲嘅係洛賓，佢扮成恐龍仔哄啲小朋友，估唔到其中一個小朋友真係有反應，「唧！」一聲笑咗出嚟。

「我…我叫陳若儀！」





「Roar！若儀小朋友你好！恐龍仔放過你啦咁！咁你呢？」佢擰向另一個小朋友到，果個小朋友都即刻講咗佢個名。

「鄭智輝！」

「簡千千！」

成功哄到小朋友嘅洛賓對住子晴笑咗一笑，子晴眼神入面充滿咗感激。佢哋三個都分別同小朋友溝通過，只有我仍然碌木咁企咗喺到。

「最後得返你喎！」洛賓將龍爪手伸向淨低嘅男仔身邊。





「無聊。」估唔到呢一招，去到最後關頭，失咗手。

「喂，俾吓面好喎。」洛賓見失手，就用返個「成熟」啲嘅方法溝通。

「佢！過嚟啊，過嚟我就話你知！」小朋友指住我。

「我？」突然被點名嘅我都一臉茫然，但為咗活動都唯有照做。