《想溝到女千祈唔好學我咁》: 2.13

連阿星同阿雄都有聲「唔該」，反而我冇得到任何感激嘅說話，心底竟然有種失望嘅感覺。

去到放學前嘅班主任課，阿南將所有表格交到Miss Lam手上。

「你哋真係好叻啊，咁都搵到最低門檻嘅人數。」Miss Lam雙手合十咁多謝我同阿南。

「好彩有壞人…阿正咋，都係因為佢招遇強即屈先搵到咁多成員。」阿南講。

「遇強即屈？」Miss Lam好疑惑咁望住我。





「啊哈哈哈…細個睇戲學返嚟之嘛，呃細路㗎用嚟。」我以笑遮醜。

「點都好啦，麻煩晒你哋，我請你哋食下午茶啊！」

「唔洗啦Miss Lam，你教好佢哋就可以啦！」阿南笑住回答。

「喂…」手到拿來嘅下午茶，咁就飛走咗…仲諗住當補貼返個四百蚊。

亦都因為呢件事，令我第一次同阿南有多咗接觸，亦係我第一次，為咗一個異性去做一啲自己本來毫不願意做嘅事。唔知點解，當我見到阿南放下心頭大石果一刻，自己嘅心情都感到無比暢快，當見到佢好開懷咁笑，自己個心亦會砰砰咁跳得好快。





「仆街啦，你戀愛啦李卓正。」當我將我嘅感覺話俾三個禽獸聽，佢哋反應異常地大。