《想溝到女千祈唔好學我咁》: 2.10

「咁得啦，我哋呢到冇符文安，我亦對佢冇好感。」我答。


「好，同仇敵愾，近排又冇嘢做。我應承你。」佢好爽快咁答應。


「多謝你啊！報名表！」一聽到有人參加，阿南即刻遞上表格。


「姑娘客氣。」呢個人…真係以為自己喺武俠小說。






胡一刀走後，立即有好多人都想挑戰阿星，奪得嗰一百蚊。


「計劃成功。」我暗暗笑道。


「咩計劃？」阿南問。






「以阿星嘅實力，絕對可以同頭先嘅武俠男打個平分秋色。我哋之前訂下嘅策略，只要遇到一個勁嘅對手，佢就會遇強即屈，擴大對手發揮空間，從而令我哋搵到一啲有潛質嘅球員加強說服，增加球隊實力。其次亦可以俾接下來嘅對手一個錯覺，誤以為阿星實力稍遜，加入挑戰。」


「咁如果冇一個好似胡一刀咁嘅人出現咪…」


「咪嚇走曬啲人囉。」






「原來係咁…」阿南似懂非懂咁答。


認真起上嚟嘅阿星，好少人會打得過。


接下來嘅時間，有唔同嘅同學發出挑戰，但都係鎩羽而歸，而一一歸順手球班，當中亦不乏運動神經發達嘅同學。

「明明有啲好啱打籃球，真係唔抵啊！」阿星唔忿氣咁講。


「你哋好犀利！一個午休就搵到咁多人，好過我企足成日都係得一個吉。可惜…仲係差五個人先夠數，喺放學前搵到根本冇可能…」阿南失望咁講。


「嗄！嗄！」突然阿雄氣喘吁吁咁跑過嚟，身後仲跟隨咗幾個同學。






「咁遲㗎！」阿星講。