《想溝到女千祈唔好學我咁》: 2.7

「喂，做咩喊。」我行過去問佢。
 
「唔關你事…你個壞人。」其實唔洗佢講，都知道係為咗咩而喊。
 
「今日收咗幾多個啊？」
 
「唔洗你假惺惺！」佢繼續喊，喊到我突然為咗我嘅絕情而有啲內疚。
 
「聽日就截止啦，但今日只係搵到三個人。今次一定冇機會啦！」之後佢又突然間回答我問題，然後喊得仲大聲。
 




「殊！！你唔好喊住先啦，一陣啲人以為我整喊你。」
 
「唔係你咩！我企到腳都軟你都若無其事！」
 
「你咁努力搵做咩？Miss Lam都話咗搵唔到都唔緊要。」
 
「應承咗人就要做到，我唔想Miss Lam唔開心。」
 
呢個白痴，為咗個只係嚟咗一個禮拜多啲嘅老師咁仆心仆命。
 




「得啦得啦，我聽日幫你一齊搵啦！實搵得齊嘅！」唔怪得林黛玉流吓眼淚就搞到賈寶玉頭都大，眼淚真係女人最大嘅武器。
 
「得返一日點搵啊？」
 
「懷著樂觀總有轉機啊嘛，我自有方法。」我強顏歡笑咁講，雖然由我講出嚟好冇說服力，但要止住佢啲眼淚，用返佢偶像嘅歌似乎係最有效嘅方法。
 
「你…唔係唔聽陳奕迅㗎咩？噻…」
 
「你講到咁好聽，咪聽下囉。」
 




「衰人、壞人、仆街！」冇啦啦比佢鬧咗一餐，但能夠令佢唔再喊，都算。
 
第二日，我一早就返咗學校，等果三個禽獸返嚟。出賣我咁多次，係時候喺佢哋身上攞返啲甜頭。
 
「哼…」當佢哋三個返到嚟，見我攞住我哋暑假貪玩買果枝電流筆，即刻臉都青埋。