別人名字，我的姓氏(上集): 28. 目標達成

第二局我同阿Belle會收起休息，俾其他F.1隊友上場感受下氣氛，吸收經驗
 
我地一眾F.1妹都唔係善男信女，打起波上黎完全可以好狠
 
第二局唔洗主力球員落場之下，我地仍然輕鬆贏到15分
 
中途我地仲要出左全F.1隊員落場
 
去到最後一局，小龍女俾左指示，要加強防守，盡可能唔失分
 




因為升grade，係需要計埋細分，就算我地場場3-0贏波，但係細分係贏2分嘅話，有機會會輸俾其他對手
 
所以，我地每一場都要大炒對手
 
我地一眾球員帶住呢個信念落場
 
唔洗10分鐘，我地已經將比數去到12-0
 
攻擊力超強嘅我地，邊會咁輕易放過對手
 




最後我地以25-3之下贏埋第三局
 
25:9，25:15，25:3
 
直落3-0
 
我地一眾隊員坐返去後備席時，小龍女向我地訓示
 
「今次我地第一場就俾個驚喜d老對手，妳地打得幾好，仲留左力」
 




冇錯!我地根據小龍女意思，唔用住力去打波
 
奈何對手真係魚腩部隊，我地先可以贏得咁輕鬆。相信下一場唔會咁舒服架啦
 
「妳地俾d自信自己，女拔同體藝佢地有人黎左睇波」
 
我望一望觀眾席，有幾個女仔係到Jot notes
 
係佢地口形中，我隱約見到佢地講11號
 
睇黎佢地想摸清楚我個底
 
「大家唔洗望啦，我地互相都好瞭解對方個底，今年佢地一樣會搵人摸下一班F.1妹嘅底。大家唔洗怕，我地有嘅係實力」
 
「嗨!!!!!!」




 
我地嗨完之後，媽咪帶住兩隻野落黎搵我，大家都好有禮貌咁同媽咪打招呼
 
「Miss Lam」「Miss Lam」
 
而小龍女就捉住浩翹黎玩
 
「你睇你，K3就似足你阿哥一樣」小龍女雙手搣浩翹塊面，然後再摔佢
 
「估唔到家姐妳咁勁揪喎，第一場就有咁嘅表現」
 
「洗乜講」
 
「咁又係呀，妳咁凶狠，邊個會贏到妳丫」
 




死仔包!!!!
 
然後我拎住個排球追住浩揚黎打
 
「凶狠丫啦!!!!」
 
一眾排球隊就咁望住浩揚俾我追打，而媽咪就撓埋雙手唔理我地
 
「Miss Lam，洗唔洗阻止Jasmine呀?」
 
媽咪氣定神閒「唔洗啦，呢個先係我個女嘅真面目，妳地唔好俾佢平時個樣呃到」
 
之後每個星期，我地都有學界比賽
 
而且仲好順利咁斬殺左其他學校，不論男女校或者女校




 
都一律敗係我地手下
 
我地一直打，終於去到C grade嘅最後階段
 
雖然A grade同B grade一樣係四強止步左，不過成績上，只差C grade嘅成績，就可以知道算唔升到D2
 
而且我地排球隊多年俾人笑係「無冠勁旅」
 
空有一番實力，但係獎杯櫃就空空如也
 
所以，我地c grade希望幫學校拎返個獎杯
 
唔要亞軍，唔要季軍
 




我地一捧，就要捧冠軍!!!
 
而今日，我地係修頓中心，即將上演呢一場決賽
 
我地將會對上格仔裙，最迷人嘅聖保祿學校
 
今日，婆婆同姑姐，仲有好多老師同學都黎睇呢一場比賽
 
只要我地贏波的話，就可以升上D2
 
所以，大家都好希望贏呢一場比賽

我地一早到達球場，一齊互相拉筋，仲有做D簡單基本功嘅練習
 
大家可能會問，點解仲要每次都練基本功?
 
呢個係婆婆當年訂落嘅規矩，所有野，一切都要由基本功開始
 
所以我地每一次練習，總係有1/3時間去練基本功
 
小龍女一聲令下，大家都返到後備席集合
 
然後，婆婆現身為大家打氣
 
「校長…」「校長…」
 
陪同婆婆嘅，仲有拖住慧思嘅姑姐
 
佢手上仲要拎住一包熱浪係到咬
 
「大家打到呢個地步，已經係盡左全力。校長唔要求妳地一定要贏個冠軍返黎，我只希望妳地可以放開心情去打波，有冇問題?」
 
「知道!!!!」我地成班好精神咁回應婆婆
 
然後小龍女就宣佈出場陣容，一如以往，我係主攻擊手
 
既然婆婆在場睇住，我地發揮比起平時更高水準
 
第一局我地就決定唔俾任何機會佢地反擊
 
直到最球嘅一球
 
“b!!!!!!!!”我地直落3-0將對手打低左
 
我地成功贏左C grade女排冠軍
 
當冠軍獎杯交到隊長手上之時，佢真係開心到喊
 
我地呢支「無冠勁旅」，終於成功將冠軍獎杯帶返學校
 
同時，我地都升左上D2