別人名字，我的姓氏(上集): 20. 婆婆親自過問

第二日返到學校，Annabelle食左藥已經好返好多，而且仲比尋日更加精神

佢地兩個返到課室一坐低，就不停碌大隻眼望我

「有…有咩好望呀?」

對於佢地兩個對我嘅「欣賞」，我係有d唔慣

「妳真係有6分似Miss Lam喎」





我反一反白眼「咁佢係我媽咪黎架嘛，我似佢係好正常者」

「不過呢…」Katherine望一望四周後

「大白鯊都真係好靚喎」

「係囉，佢有d似Lillian 簡喎」

佢地又講得冇錯，姑姐又真係幾靚嘅





「而且佢個女，仲學哂佢D野喎」

然後我又做一做姑姐揈頭髮果個動作「冇錯」

「妳都唔弱喎」佢地笑住咁講

「我由細細個就痴實姑姐，點會唔似」

我地三個係到細聲講大聲笑





然後聽到班主任嘅聲音

「妳地三個，放學後去校長室」

校…校長室?

「係…咩事?」Katherine好驚咁問

「妳地尋晚去左邊度食飯?」Miss CHAN反問返我地

睇黎媽咪真係同左班主任講啦

「係…」佢地兩個異口同聲咁講

「妳地兩個呀，有問題要同學校講，我地先幫到妳地架。如果唔係小敏，我地都唔知妳地情況」





「係…知道…」

我地三個打開飯盒，d餸差唔多一樣

唔同嘅係，我d飯特別多，冇錯!我係一個飯桶

Katherine同Annabelle見住個飯盒係非常開心，佢地仲回味緊尋晚餐飯

「小敏，其實妳屋企晚晚都咁熱鬧架?」

「係囉?大白鯊又唔係住妳地果到，但係又成日去食飯」

我諗一諗「咁…可能係婆婆，呀，即係校長叫姑姐幫下媽咪手掛，始終爸爸成日都要飛」





「嗯，妳地兩家人關係好好呢」

「我成日諗，姑姐如果搬黎我屋企附近會點呢?」

「一定好嘈」

放學後，我地三個一齊去到校長室

當時媽咪同姑姐，仲有Miss CHAN已經坐左係婆婆身邊

佢地好有禮貌咁叫婆婆

「校長」x2

「婆婆」





然後佢地逐個人叫

而我，就靜靜企埋一邊

姑姐就拎住薯片係到咬

「何嘉瑩…」

「係」Annabelle好快回應

「梁曉晴」

「係!」Katherine都不示甘弱





「妳地平時屋企冇人照顧妳地?」

「呀…其實…」兩個人支吾以對

「Annabelle妳爸爸係工程師，媽咪係會計師」

「係..校長..爸爸係大判嘅site agent…媽咪係中型行…」

「Katherine妳爸爸係大狀，媽咪係外貿經理」

「係…爸爸係三大chamber到做….」

「妳地屋企冇人煮飯?妳地唔識煮?」

「婆婆，佢地點會識煮飯?」

婆婆望住我「難道小敏妳又識?」

「應該叻過姑姐嘅」

「咩呀!!!!!㗅…….」

「㗅…….」我都不甘示弱

媽咪同婆婆對呢個場面都見怪不怪

「既然妳地屋企冇人照顧嘅話…」

「校長，係我地父母冇咩時間理我地者…」

「ok…我想親自見一見妳地家長」

一聽到婆婆親自要見家長，真係嚇到Katherine同Annabelle彈起咁滯

佢地眼中，充滿恐懼

「唔洗擔心，校長想了解下妳地兩個屋企狀況者」姑姐咬住薯片講

可能佢兩個係驚姑姐多過驚婆婆

因為，微笑中嘅姑姐，永遠係最恐怖