沙頭角與長洲的距離(重修版): 七十一.

我倒咗試味隻羹啲嘢就跟咗入去，嚟到門口就見到佢𠺘緊口。

「做咩啊你？」

應該係冇咩味架？

「你想謀殺定想搞到我有糖尿？」佢用紙巾抺乾個嘴。

咩啊？





「我啱啱飲係冇味架喎？」

一啲味都冇喎。

「冇你個死人頭啊！」佢拉住我行返去廚房：「你自己飲下！」

飲咪飲囉，講到好似食毒藥咁。

我拎羮嚟𢳂咗一啖，之後就豪爽咁將佢隊入口。





為咗試真啲，我決定要含住佢細心品味一輪。

嗯⋯

好撚甜啊！

我忍唔住就將啖嘢噴咗落鋅盤，之後直接用廚房個水龍頭浪口。

我全身都喺到排斥緊煲嘢，不自覺咁退後咁幾步。





甜都算啦，佢仲有後勁。

嗰浸甜味殘留喺我個口裡面，搞到我打曬冷震。

「係咪呀？」佢敲咗敲我額頭：「都話好甜架啦！」

「對唔住啊。」我扁嘴：「我唔係特登架。」

我都唔想架。

佢摸咗摸我個頭：「唔緊要啦，煲唔到嘢飲咪幫我撳下穴位囉。」

撳穴位？

「要撳邊個位架？」





等我表演下。

佢行去電腦枱到坐低指住小腿內側：「呢個位。」

我行過去踎低撳住佢指嗰個位：「呢到？」

係就嚟料架喇喎。

「啱呀。」

咁我用力架喇。

我用力撳落去，之後⋯





「啊！」佢彈咗起身。

吓，又做咩啊？

「好痛啊！」佢撳住嗰個位：「做咩咁大力啊？」

吓？

「好大力咩？」

我冇點用力架喎。

「就嚟碎喇啲骨！」

可能係我大力開啩。





「咁我細力啲。」

我試下。

//

「你想幾點返去啊？」佢問我。

我覺得⋯

「食埋晚飯先啦。」我答佢。

係喎。





「你想食咩啊？」我問佢。

我去買。

「我想⋯」佢諗咗陣：「你煮。」

吓？你認真架？

「你想死啊？」

我都唔識。

「唔識咪要學囉。」

咁⋯試下囉。

//

既然佢想我煮，咁就煮下啦。

我嚟到街市行咗幾個圈總算係買到想要嘅食材，之後就返去準備大戰。