沙頭角與長洲的距離(重修版): 二十五.

佢拎張凳仔過嚟喺排水窿到坐低，而我就喺隔離較水溫。

「你得未啊？」佢嗌我：「再唔落去就好多人架嘛，今日星期日啊。」

「收到！」我回應。

我將花灑頭對住佢，之後伸手用力捽咗幾嘢。

「咁大力嘅，行刑啊？」佢拍咗拍我隻手：「細力啲，好似按摩咁。」





我就咁喺佢嘅指導下，論論盡盡咁幫佢洗好咗個頭。

「搞掂！」

我行出去，準備著鞋。

「做咩咁快著鞋啊？」佢問我。

「咩啊，仲有咩未做啊？」我反問佢。





「未吹頭啊死人頭！」佢鏈住我耳仔：「係咪想射後不理！？」

「唔係啊！」我拍咗拍佢隻手：「你放手先，我幫你吹。」

佢鬆手：「哼，算你啦！」

講完，佢就將個風筒擺上工作枱，自己就喺工作枱前面坐低。

「吹頭識喇啩？」佢暗串我。





「唔識架。」我坦白。

「一邊順啲頭髮一邊吹。」

「試下囉，有咩事你就出事啦。」

「嗯。」

我開風筒一邊吹，一邊用手順返佢啲頭髮。

過程中有幾次整痛佢，不過就冇發生啲咩致命性嘅事故，雖然我都唔知吹個頭會發生啲咩會死人嘅意外。

我摸咗摸佢啲頭髮：「乾曬啦，你洗唔洗照鏡執執佢？」

因為枱上面冇鏡，所以佢係唔知我吹成點。





「唔洗啦。」佢撥咗撥頭髮：「信得過你，同埋最主要都係比你睇咋嘛，你鍾意咪得囉。」

「我鍾意就得？」我問佢。

我萌生咗邪惡嘅諗法，而家淨係等佢扤頭。

「係啊，做咩？」

我伸出雙手…

摷亂佢個頭。

「我鍾意凌亂美。」我好得戚咁笑。





「你個死人頭！」佢咆哮。

講完，佢就揸實拳頭企起身。

見唔對路，我即刻起腳跑，而佢都冇怠慢，拎起隻腳就追我。

我哋就咁喺呢個得豆潤咁大嘅單位裡面跑嚟跑去，同公園嗰啲天真爛漫嘅𡃁仔一樣。