沙頭角與長洲的距離(重修版): 十二.

我停咗落嚟，岳高頭望住佢：「氹你囉。」

「你真係。」

講完，佢就用手撳住額頭，應該係唔知嬲定笑好。

不過我就冇理佢，繼續捽，因為呢個感覺…

都幾舒服。





唔知捽咗幾耐，佢終於拍咗拍我個頊。

我岳高頭望住佢：「唔嬲喇？」

「唔嬲喇，死人頭。」佢好似摸狗咁摸咗摸我個頭：「成隻船都望住我哋喇，快啲起身啦。」

「吓，點解嘅？」

佢反咗個白眼：「不雅動作啊死人頭！」





我諗咗諗，好似又係。

我企起身，喺靠窗個位坐返低。

「唔記得咗添。」我傻笑：「咁你信唔信我啊？」

佢冇答我，淨係一嘢錫落我個嘴到。

「你話呢？」佢微笑。





佢個笑容，好甜。

「都忙咗成日，你要唔要瞓陣啊？」我問佢。

「好啊。」

講完，佢就將個頭挨落我寬厚嘅膊頭上面。

我將手搭落佢手臂到，輕柔咁、有節奏咁拍。

唔洗好耐，佢就扯曬鼻鼾。

我想睇下佢瞓教個樣，但係又唔夠敢有太大動作，驚一郁就會嘈醒佢，唯有用電話自拍。

影完拎嚟一睇，個心即刻融曬。





佢瞓教個樣同動漫角色一樣咁得意，差在冇用鼻水吹泡泡。

…

..

.

船到咗長洲碼頭，但係佢仲未醒。

我用力拍咗佢幾下，佢先醒咗過嚟。

瞓到懵下懵下嘅佢捽咗捽眼：「到喇？」





「係啊，行啦。」我企咗起身。

講完，我就拉咗佢起身。

我哋拖住手漫步，好快就嚟到佢屋企樓下。

「我行先喇，仲要趕船返去。」我同佢揈手Say Goodbye。

佢拉住我衫角：「唔好走住先。」

「做咩啊？」

「我自己住架嘛，你唔記得喇？」

佢喺上次個酒局有同我講過，但係呢單嘢…





唔關我事啩？

「所以呢？」

「上嚟啦，唔好又夜嘛嘛先搭到返去。」

「都…得嘅。」

事情嘅進展有啲快，快到令我懷疑自己係咪中咗桃色騙局。

不過佢講得啱，咁夜先返到屋企都幾攰下。