沙頭角與長洲的距離(重修版): 十.

講完，我就即刻擰轉面。

呢單嘢真係…

好撚尷啊！

「喂，你表完白就擰轉頭咁冇禮貌啊？」

我慢慢轉返去，但係隻眼個Focus都係擺咗喺第二到。





「Sorry啊，我第一次表白。」

你冇聽錯，呢個係我人生第一次表白。

「估唔到依家都仲有啲咁老套嘅人。」佢笑住咁講。

「咁即係點？」我唔明佢講緊咩。

佢冇答我，一嘢就錫咗落我塊面到，然後將個嘴靠埋我耳仔到。





「我都鍾意你啊。」佢好細聲咁講。

講完，佢就褪咗返去，然後伸隻右手出嚟要我拖住佢。

我猶疑咗一陣，之後就拖住佢隻手，帶住佢離開戲院。

「我自己返去得喇，我嗰到好遠。」佢同我講。

「我送你返去啦。」我拍咗拍心口：「約完女仔出街，點可以唔送埋返屋企？」





「但係你返到去應該好夜架喎。」

呢個時候，我諗到一個好重要但我從來冇問過佢嘅問題。

「你住邊架？」

「你住邊架？」

佢都想問。

「我住沙頭角架。」我答佢。

「我…」佢苦口苦面咁：「住長洲。」

聽到呢個消息，好似好天行雷咁。





咁好彩搵到個咁靚嘅女朋友，點知佢住到鬼打咁遠。

一個喺最北，一個喺最南。

雖然都係喺香港，但係個距離一啲都唔近。

喺香港機場起飛到去到台北桃園機場降落，最多就個半鐘。

而我由沙頭角去長洲，至少都要兩個半鐘。

嚴格嚟講，我哋某程度上都算係Long D。

「我送你返去啦。」我同佢講。





「但係你返到去會好夜架喎。」佢有啲擔心：「你咁樣返到去會唔會好攰？」

「冇事啦，我聽日放假。」我大步咁向住地鐵站行：「快啲行啦，唔等你架喇！」

佢聽到就即刻追咗上嚟，翹住我隻手。

我哋喺旺角站上咗往荃灣方向嘅車，好快就嚟到中環。

我哋原本可以搭小巴或者巴士，但係因為我想見佢耐啲，就拉住佢徒步行過去碼頭。

嚟到碼頭嘅時候啱啱好十點半，我哋上咗要搭耐啲嘅普通船。