沙頭角與長洲的距離(重修版): 四.

我開始不停咁飲水，水壺啲水飲曬就叫人嚟加，加到個店員開始睥住我先停低。

但係即使我已經飲咗咁多水，我嘅心跳都係冇降返落嚟。

這個就係心動嘅感覺？幾恐怖，但係又幾幸福。

時間嚟到六點踏十，但係我仲未見到佢。

佢係咪要放我飛機？我係咪比佢拒絕咗？我係咪未戀先失？





我開始心急，整下個頭又整下隻耳。

明明出門口之前已經落咗Gel，但係我硬係覺得自己個頭好亂，係咁用手撥嚟撥去。

六點五十八分。

「叮！」電話響。

我開Mon睇咗睇，係佢Send Message過嚟。





「我到附近喇。」

佢伸連住張自拍Send比我，搞到我心跳又快咗。

我放鬆返少少，因為確定咗佢冇放我飛機，但係我對手就開始急起嚟。

我一手開電話相機反轉，一手執頭同整衫領，務求以最好嘅狀態見佢。

「叮噹！」門鐘響。





有人入咗嚟，係咪佢？

我下意識停低手上嘅動作、收埋電話同埋坐直條腰。

我望過去門口嗰邊，佢企喺門口到周圍望，應該係搵緊我。

今日佢扎咗個高馬尾，仲喺兩邊留咗令佢睇落後生啲嘅八字陰。

佢原本就已經似中學生，而家再加埋個令佢睇落再後生啲八字陰真係同小學生冇咩分別。

而我都覺得佢…

越嚟越靚女。

我嘅意思係佢好靚女，唔係啲小學生好靚女，唔好誤會咗。





她著嘅衫同上次差唔多，都係嗰對Dr.Martens嘅黑色皮鞋、白色恤衫，不過今日條裙就黑色嘅。

我舉手揈咗揈，而佢都好快就見到我，嚟到我對面坐低。

當佢嚟到我面前，我先見到佢個頭有啲亂，但係咁樣都冇損佢個靚樣，甚至為佢呢個原本已經拎咗一百分嘅樣加多咗份凌亂美同清純甜美嘅氣息。