[中六續集][愛情][懸疑？]擁抱，失憶(重修版): 七十九.

「起身喇。」佢拍咗咗我膊頭。

瞓死咗。

我坐起身捽咗捽眼：「到喇？」

睇嚟我真係好攰。

「嗯，落去先啦。」





//

我伸咗個懶腰：「瞓到腰都斷咁滯。」

瞓嘅時候挨住佢膊頭，醒嘅時候去咗佢大脾。

佢有時都係咁，不過我都唔會搞佢。

費事嘈醒佢啦。





「啫係你而家怪我啦。」佢翹埋雙手。

咁又唔係。

「絕對唔關你事，一定係我條腰老化。」我摸咗摸條腰：「仆街喇，條骨移埋位添。」

年紀大咗真係搞唔撚掂。

「移左定移右啊？」佢磨拳擦掌：「講嚟聽下，啊姐我學過正骨。」





碌柒。

「應該係左，但都可能係右。」

咁樣答一定冇…

「我屌！」我痛到爆粗。

佢雙龍出海、一左一右咁拍落我條腰兩邊。

「我想問呢個係糾正緊啲咩？」我撳住條腰。

當移左拍左、移右拍右，咁你拍中間係咩事？

「冇架，純粹想拍你。」佢伸脷。





你隻野真係…

「比我捉到你就仆街！」

佢聽到就即刻起跑，而我就喺後面撳住條腰柺下柺下咁追佢。

「追到我先算啦！」佢停喺到挑釁我。

//

嚟到屋企樓下，我直頭差佢成條街。

佢開定門等我，但我好似見到啲嘢。





樹枝…好似唔應該有呢種形狀。

我嚟到啊晴身邊：「你返去先，我想打個緊要電話。」

我覺得我有必要睇下咩料。

「咁你搞掂就快啲返嚟啦。」

佢講完就入咗去，而我就行埋去嗰棵樹到。

//

「喂！」我向住樹頂嗌。

我講完之後樹葉互相磨擦而發出嘅聲音就變大咗，肯定有啲嘢。





呢個唔似係英倫啊伯，佢唔會匿埋。

「出嚟啦，聽到曬喇！」我嘆氣：「做得出唔夠膽認就唔好做啦。」

通常激將法係…

「係我。」我身後傳嚟一把熟悉又陌生嘅聲線。

有用好多。

我轉身：「我知吖。」

不嬲都知，不過之前唔Firm，而家Firm咗咁解。