[中六續集][愛情][懸疑？]擁抱，失憶(重修版): 七十七.

你咁醒目，一定有計嘅。

「我諗到喇！」佢躂咗下手指。

都話架啦，就講就有。

「講嚟聽下。」

我盡做啦。





「隻戒指照Keep。」

吓？

「你唔係話同陌生人求婚好怪架咩？」

咁唔係一鳩樣咩？

「照Keep，但佢而家係定情信物。」





咁嘅話…

「好啦。」

你話事啦。

等陣先…

「咁戒指變咗定情信物，咁求婚嗰陣再嚟多隻咪戴滿隻手指咁滯？」





冇話唔得，但就怪怪地囉。

「咁我就唔知喇，你自己諗啦。」

嘩，你玩咁大？

「Er…咁我再諗啦。」

諗多樣嚟求婚應該易過諗點拆。

「咁就得啦。」佢壁咚我。

其實呢…

「有閉路電視架。」





我唔想喺連登見到自己。

「你諗咩啊傻佬？」佢彈咗下我額頭：「咸濕佬。」

你咁搞法，我好難唔誤會架喎。

「明明就係你問題。」

講到我對住咩都有性幻想咁。

「係喇係喇，你直頭同聖人一樣啊。」佢縮手：「行喇。」

我望下錶，原來都差唔多時間。





「行啦，返去食宵夜。」

搞搞下都肚餓。

「唔要啊，我就嚟變豬喇。」

唔緊要啦。

「變豬都係向晴就得啦。」

就算你變咗做三百磅大肥婆都好，我都係咁愛你架。

「你個傻佬今日飲完油嚟？」

冇啊。





「氹你洗鬼飲油咩。」

發自真心架嘛。

「係喇係喇，最叻係你喇。」佢伸脷：「行啦！」

//

我哋登上返去嘅巴士，照舊都係嗰兩個位。

但今次有啲唔同，因為我同佢調咗位。

「做咩今日想坐入面嘅？」我問佢：「你唔係鍾意坐出面挨住我架咩？」





突然唔同咗，有啲唔慣。

「冇啊，想知你個位睇到啲咩。」

咁諗返，你又真係好耐冇睇過街景。

「咁我挨住你架喇。」

你轉去睇街景，我轉去挨住你，成件事啱啱好。

「不嬲都挨得。」佢撥咗下個膊頭：「嚟啦。」

我挨落去，而佢就一手托頭，一手搭住我。

佢隻手扣實我，上下來回咁掃我手臂。