[中六續集][愛情][懸疑？]擁抱，失憶(重修版): 七十三.

「搞掂咗架喇。」搞佈置嗰邊連埋張相咁Send咗個Message過嚟。

一切都嚟得啱啱好。

//

我埋單之後就返嚟帶埋佢走，行咗一陣就嚟到之前Book好咗嘅Party room出面。

我除走佢個眼罩：「到喇。」





應該一開門就會見到嗰啲超正嘅佈置。

佢眨咗下眼之後就望咗下周圍：「你唔係又抄橋啊嘛？」

咩啊？

「冇抄啊！」

真係嬲架。





「呢到就有啲似係…」佢皺眉：「酒店囉。」

咩啊？

「邊忽似啊？」我顎高頭：「都…」

其實都幾似。

「都話架啦。」





都唔知點解呢棟工廈會屎忽痕到用橙黃色燈。

「總之就唔係啦。」我開個QR Code出嚟：「一間唔好嚇親啊。」

因為我睇到張相之後都嚇親。

講真，個佈置直頭係電影級別。

「你嚇鬼啊大笨象！？」佢擺好架步：「開嚟見我！」

其實呢…

「裡面冇人要同你隻揪，可以唔洗起曬鋼咁。」

唔係去踢館啊。





「好似又係。」佢又變正常。

咁咪幾好。

「嘟！」

電子鎖解開。

我推門：「行啦。」

我哋一齊行入去，閂門之後就企咗喺門口。

「準備。」我將隻手擺落燈掣到：「三、二、一。」





隨住我倒數完，燈掣都比我啪咗落去。

啲燈眨咗幾下之後就著曬，而我哋都終於見到眼前嘅佈置。

雖然已經睇過相，但親眼睇真係震撼好多。

當然，都有可能係我未見過大蛇痾尿。

呢到成塊地都係粉紅色氣球，而正中間就有一個心心。

個心心係用玫瑰花瓣鋪出嚟、燈條圍邊，裡面仲有一個用燈條整出嚟嘅「Love」，唔講真係以為拍緊劇。

我望向啊晴：「點啊？」

佢O曬嘴、成碌木咁棟咗喺到，好似定咗格咁。





我再嗌多幾次，佢終於有反應。

「點解嘅？」

你唔記得喇？

「我之前話要表白多次同埋求多次婚架嘛。」

依家就做比你。

「咁你呢個係表白定求婚？」

呢層呢…