[中六續集][愛情][懸疑？]擁抱，失憶(重修版): 五十九.

我就咁坐喺個公園到對住條Youtube片慢慢整，同啲賣藝嘅伯伯一樣。

片裡面條友就行雲流水，唔洗好耐就織好咗隻戒指。

我呢條柒頭就痙攣發作，隻手震到連條草都揸唔穩。

雖然搞咗好耐同整爛咗好多草，不過都總算織好咗隻戒指。

我將隻戒指擺著件褸嘅內袋，希望帶返去嗰陣唔好比佢發現啦。





…

..

.

我一開門就比啊晴嚇到彈起，又或者純粹係我太驚比佢發現。

「做咩思思縮縮啊？」啊晴攤喺梳花撳電話：「叫完雞嚟啊？」





咩鬼嘢啊？

「冇啊。」我轉身行入房：「我去擺低啲嘢先。」

收埋啲嘢先。

我坐喺床上面打開衣櫃將隻草戒指塞落疊衫底，之後就轉身諗住行返出去。

啊晴喺門口裝個頭入嚟：「收埋啲咩啊？」





講完，佢就爬過張床。

佢打開個衣櫃搵咗一輪，而我就坐咗隔離越睇越慌。

「快啲講！」佢嘟長個嘴：「收埋咗啲咩？」

唔好問啦。

「唔講啊。」我擰轉面：「Surprise嚟架！」

佢睥住我：「係咪真架？」

梗係啦。

「真架。」





佢閂衣櫃爬返出去：「好啦，唔Surprise就打傻你。」

一定Surprise，拍埋心口都得。

「但係…」我望住企喺門口嘅佢：「我好似原本就傻架喎。」

原本傻嘅應該打唔傻架喎？

「咁啊…」佢用雙手整咗兩把較剪：「剪咗你。」

講完，佢就行咗出去。

我開衣櫃Check多一輪Confirm咗隻戒指仲喺到之後都行咗出去梳化到坐低，然後對大髀就變咗佢個枕頭。





跟住就係一段假日嘅休閒時光，簡單啲嚟講啫係兩個喺到撳電話。

佢擺低電話望上嚟：「傻佬。」

想出去啊？

「做咩啊？」我問佢。

定係肚餓？

「你今日做咗咩嚟啊？」

你想我點答你啊？

「冇啊，都係見客咋嘛。」





我都唔係去返工。