[中六續集][愛情][懸疑？]擁抱，失憶(重修版): 二十四.

我離開簽品哲理中心，無奈咁點起一枝煙。

醫生冇計，算命佬又冇計，我就更加冇計。

等陣，點解佢會無啦啦比人落埋啲咁嘅嘢？

我撳熄枝煙衝返入去，想搵「向水登」答下我，點知佢已經閂咗閘。

「真係唔憂做架喎。」我嘆氣。





電話響，係啊晴。

「喂，做咩啊？」我問佢。

「你喺屋企啊？」佢繼續講：「我啱啱收工，你嚟唔嚟同我食飯啊？」

「我唔喺屋企啊，你唔想煮？」

「係啊，今日好多嘢搞，做到隻積咁，攰到想嘔。」





「咁好啦，你想去邊到食啊？」

「梗係街尾間魚蛋粉啦！」

「咁我返到去坐低等你啦。」

佢Cut線，我都行去搭巴士。

成架車都冇人，但我都係照樣去返上層最後排左邊嘅靠窗位。





過咗一陣，巴士停站。

樓梯方向傳嚟腳步聲，有人上緊嚟上層。

上嚟嘅人係一個成頭白曬嘅啊伯，個樣都幾慈祥吓。

佢成身衫褲都係黑色，仲著住件黑色大褸。


上層得我一個喺車尾，佢應該會坐去中間或者最前面。

然而事實係…

佢坐去最後，仲要喺我隔離。





好似電影裡面啲暗殺情節咁，明明成架車冇人都要坐喺個目標隔離。

雖然感覺好唔舒服，但係佢比咗錢搭車，理應咩位都坐得，我冇理由因為我唔舒服而叫佢換位。

人有自由意志架嘛，我冇權控制佢坐邊到。

我繼續撳電話扮無事，而佢就雙手捉住個扶手，左望右望。

我終於知啲警察口中所講嘅行跡可疑係點，就係好似佢咁。

過咗冇耐，我都差唔多落車。

「林晉武。」佢突然開聲。

無啦啦坐我隔離，仲要嗌得出我全名，唔通我真係做咗暗殺目標？





「做…做咩？」我把聲震曬。

「唔好落車住，有嘢同你講。」

「好。」

你坐喺我出面，你唔走，我都冇得走。