《我老婆唔係我女朋友》【那些年／九十年代學界／真人】 第七章全新中篇！: 【第八章】 全民學星（１）
全 民 學 星
這時候有幹事宣佈說講座即將開始，眾人才陸續歸位。Lulu拉著阿心一起坐，我和Leon兩條麻甩仔只好一起坐了。
負責做MC的幹事先說了些開場白，原來今晚這個聯校晚會主要分成三個部份，由天文講座打頭陣，然後是燒烤晚會暨聯誼配對，最後才是自由活動觀星。
接著介紹了【山大】各字頭的天文學會「莊頭」，原來阿腸職司總務和外事，是今次的主力搞手，難怪成個新郎哥噉款。到介紹天文講座的講者了，原來那位中年男是【神都】的高級講師李廣美博士，主修大氣科學，說是對研究氣候變化有一定成就噉啦，而他還是活躍於民間的氣象組織——暗黑天文台的台長。
嘿～失覺晒，門小你鹵味原來係IQ博士兼高級講師，我仲當佢係公園吹水大叔。
「呵～原來係呢條友！」Leon在旁發出輕聲驚嘆。
「咦，你識佢㗎？！」我非常奇怪，如果不是因為他去過士多買啤酒，我根本唔會知有個這樣的人。
「咩呀，佢成日喺雜誌度寫漫畫與星嘅關係喎，五月停刊嗰本《漫畫周刊》，最後一期有幾篇唔同作者啲收皮感言，佢都有份寫㗎，久唔久《A-Club》都有佢寫嘅嘢啦。」Leon對於媒體出版的觸覺是比較敏銳，相反我卻不甚了了。況且睇《漫周》時，多文字描述的部份，我多數會直接揭過唔睇，睇公仔書嘛，梗係睇公仔啦，要睇字我不如睇《姊妹》！
「你會唔會搞錯呀，【神都】Lecturer兼又博士喎，有無咁大落差呀。」事關出面仍在絮絮不休的介紹著，我只能輕聲的回應。
「門小你啦，我最記得佢個名嘞，『超英趕美』嘛。佢自己寫簡介時，話佢老母唔想用『趕』字，所以用『廣』，廣州個廣。」Leon非常肯定的回答。