《我老婆唔係我女朋友》【那些年／九十年代學界／真人】 第七章全新中篇！: 【第八章】 小別勝新婚（１）
小別勝新婚
「有無收到我寄畀你啲嘢…咿唔…唔好錫住，講埋…唔…」她話到嘴邊，又被我拉低來嘴唇黐嘴唇，點都唔畀佢走甩了。
我用手指指著另一邊手腕上的手繩，意謂有收到她的包裹。
「喂…喂…一陣先繼續啦，怕咗你～哎呀～變態佬。」她大發嬌嗔，再次掙脫我的封鎖。
纏綿過後，大家開始互訴分開這段時間的經歷。今次英國之旅，阿心她們一家和米叔主要是到【曼徹斯特】唐人街探望米伯（高米高原跌打佬，米叔老竇），順道寄居在他家中。
原來米伯在香港退休後，移居到英國在唐人街開了一間小型超級市場過日辰。
「點解佢可以話去就去嘅？」我有點奇怪的問。
「好似話米伯阿爸本身已經係英國華僑喎，所以米伯、米叔佢哋都係用英國護照㗎。」阿心隨口答道。
那時候居英權的討論才開始形成，不過廢青如我根本不會去留意，未識打算亦未識驚。
阿心說米伯的超市，規模其實是等同於香港的士多，屬前舗後居的格局。話說唐人街位於曼徹斯特市中心，是英國第二大的唐人街，大鄉里的我一直只知道倫敦有唐人街，而我最初也以為阿心只是去倫敦，殊不知在其他城市也有（大鄉里廿幾歲仔都未坐過飛機，最巴閉都是中學時跟老坑坐火車去昆明高原集訓，總算托賴唔使行路上廣州，所以我真心覺得阿里仔小小年紀四處飛參加比賽好勁）。