《我老婆唔係我女朋友》【那些年／九十年代學界／真人】 第七章全新中篇！: 【第七章】 條粉皮係有啲嘢嘅（１）
條粉皮係有啲嘢嘅
一小時後大家在「歷險池」集合，稍事休息，兩個女生結伴去洗手間，阿材起身去買飲品請大家喝，我和Leon就攤在淺水區休息。
「喂老表你唔好去深水嗰邊呀～」我遠遠的叫過去提醒阿材，他應了一聲後逕自去了。
「嘩頂你，我攰過去比賽呀。」確實今朝開工到現在，一直都未停過，不禁對著Leon呻兩句。頓了頓見他無甚反應，再繼續說：「好似有啲失望喎，呵？」我嘗試提起今次我們同意「陪」老表嚟玩的其中一個原因——見識表妹。
「唔係呀，佢幾可愛吖，個人又爽朗又無機心。」Leon眼望遠方隨口應道。
我愣住了好一會在想，佢係唔係講緊第二個人呀，順著他的目光看過去，見到老遠深水區高台上，有個疑似是Lulu身影的人在對著他狂揮手。「喂門小你咩，我話表妹呀，你講邊個呀。」
「喔…呵～梗係啦，估唔到表妹啲『易容術』咁勁，無化妝真係差啲。」Leon如夢初醒有點慌張的答道。
「不過阿高妹就算無化妝都唔太差嘅。」乘機調侃一下老友。我心諗，少年你太年輕了，你見識過我家雅典娜的「易容術」，你就知道乜嘢叫「女神降臨」了。