《我老婆唔係我女朋友》【那些年／九十年代學界／真人】 第七章全新中篇！: 【第七章】 火雲邪神現真身（３）
「哦～我都知嘅，有做老師嘅威嚴嘛，不過妳就嚟嚇死佢哋嘞。」我不以為然，可能自己一向有點反威權的性格吧。「而家我都唔知叫邊個帶妳入場好。啊，跟我嚟先。」
帶她去跟肥直打個招呼。「阿直，帶個朋友嚟練水，今晚多一個。」
然後我再向Lulu解釋：「呢個肥佬係我哋教練，成日亂噏嘢嘅，有怪莫怪。」
「哦歡迎，呃…姿娘仔…上次…」肥佬看來有點愕然，剛剛在家駒悼念日先叫我珍惜眼前人。
「我知你想問乜，上次嗰個係媳婦仔，呢個係佢朋友。嗱，咪亂噏嘢，人哋老師嚟㗎。」上次「義氣心」大鬧麗池、惡鬥細豬，肥佬對她頗有印象。
「教練你好，打搞晒。」Lulu禮貌的打招呼。
打過招呼走開後，Lulu悄聲問我：「佢頭先話上次乜嘢姿娘仔？」
「哦，上次帶阿心嚟游水，佢梗係以為我又換畫啦。」我聳聳肩輕鬆的答道。
她帶著懷疑的眼神問：「咦，你帶過阿心嚟咩？你…成日換畫？」
「係喎，佢游得幾好呀，我記得佢話套泳衣都係同妳一齊買嘅。哈，妳咁睇得起我呀，唔怕同妳講啦，妳係第二個同我傾得最多偈嘅女性朋友咋，第一個係邊個唔使問都知啦。唏，不如等陣再傾，先搵條盲公竹畀妳先。」我邊說邊四處張望。
懾於邪神的氣勢，入場前成班細路都遠遠避開，原本搵攣毛就最合適，只是再嚇她一下，恐怕會心臟病發，暴斃於麗池，無計可施之下，只好捉住妹豬來𢳆了。