《我老婆唔係我女朋友》【那些年／九十年代學界／真人】 第七章全新中篇！: 【第七章】 來自未來的思念（１）
來自未來的思念
七月尾的星期一，阿心已經出發去旅行兩天了，雖然依舊如常工作，可是鬱悶的情緒仍難以排遣。
黃昏時正準備出門返麗池，老媽說有電話打來找我，特別提到是女的；我有點愕然，兩日咋喎，阿心點會打長途電話搵我呢？難道有甚麼意外。
那些年由於香港的電訊市場被壟斷，所以打國際長途電話是非常昂貴的玩意，縱使從外國打入會稍為便宜，可一般都會在不得已的情況下才打長途的。
「喂，係唔係阿仁呀。」電話傳來的女聲急促而且有點氣急敗壞。
「啊，妳係…？」我一時想不起聲音的主人是誰，不過聽來有點熟悉。
「我Lulu呀！」
「呿～Lu竹，點呀。」嚇得我吖，原來是Lulu。自從阿心將我家電話給她後，她還是第一次打給我。
「你知唔知阿心屋企係唔係有事呀，我搵咗佢兩日喇，打去舖頭都無人聽喎。」聽得出她語氣中的憂慮，看來她性格也有點杞人憂天，就好像上次擔心我急瘦一樣。
「喂唔使緊張啦，佢全家去咗旅行咋。」原來大家都在自己嚇自己。
「吁～嚇死我呀。」她當即鬆了口氣，頓了一頓繼續說：「原本想搵阿心去行街嘅，不過搵你都啱，上次咪提過想嚟練吓水嘅，幾時可以嚟呀？」
「哦，逢一三五晚6點都可以呀，你識唔識去麗池？呀唔係，深水埗公園泳池，喺麗閣邨嗰邊。」我經常都順口講麗池。
「呵，識呀，我喺深水埗實習㗎，嗯…我星期五晚嚟啦。」Lulu爽快的答道。