《我老婆唔係我女朋友》【那些年／九十年代學界／真人】 第七章全新中篇！: 【第七章】 肥矮毒都有市場（６）
我扮作一臉無辜的說：「我話呢，確實係有條囡又攬我，又請我食波餅呀。」
「你真係畀人攬過？！食…波餅添？」她連帶聲線都開始尖銳。
「係哩，嗰條囡啱先仲大大力扭我耳仔添。」我斜眼陰陰笑的看著她。根本由第一天開始，她的扭耳功都是輕輕的，毫髮不傷。
她終於醒悟到我是講緊佢獨家代理的小饅頭，鬆開手彈開，狠狠地白我一眼。「金魚佬！無良心。」
我乘機拖返實佢隻手，封鎖唔畀佢再放上我耳仔。呵呵…我相信只有個低能妹先信我咁有魅力會吸引到女同學，肯定因為有以前泳池邊收金牌的「童年陰影」了。哈，連我自己都唔信我會咁有吸引力，咪玩啦。
「你咁開心做咩呀。」她淡淡的掃我一眼。
「無吖，邊有呢，唔笑唔通喊咩。」經過長時間的鬥智鬥力，我已經「被」訓練到把嘴「有力一駁」，唔使吓吓「話不還口」。
「噉點解個表妹特登搵你幫手嘅？Leon都識游水㗎。」她突然又轉回之前的話題。
死火，又開始捐窿捐罅。「誒…唔關表妹事，我唔識表妹㗎，係表哥搵我啫，佢貪我『梗頸四』又有拯溺牌嘛。」要極速割蓆劃清界線，唔係又硬哽生豬肉。
「吓，你有拯溺牌？！」她瞪大眼盯著我。
「…有…呀，中學時考咗…」我知道我又舐嘢了，只好硬著頭皮回話。
「你唔話我知嘅？噫～～以前識游水又唔講我知！我唔鍾意你乜都唔講我知呀～噫呀～」果然不出所料，又怪我收收埋埋了。
我只好無奈的答她：「係嘅大王，我以為呢啲咁廢嘅嘢妳唔想知嘛。哎呀，小學雞隨便都考到㗎啦，游水冠軍又通街都係，我都醜到唔敢提呀。」唉～小野蠻發作又真係咩嘢位都入到嘅，唔通我識「電光毒龍鑽」又話妳知咩。